Ẹyano 18

Jẹtro rhe Asan ri Mosis

1Jẹtro, orherẹn ri Midian, ọgọ ri Mosis, o de nyo obo rẹ Ọghẹnẹ ru kẹ Mosis vẹ Izrẹl rẹ ihwo rọye, obo rẹ Ọrovwohwo rọye Izrẹl nẹ otọ rẹ Ijipt rhe. 2Asakiephana Jẹtro, ọgọ ri Mosis, da rọye Zipora, aye ri Mosis, ro siobọ nu kpo jovwo, 3ọ vẹ emeshare rọye ivẹ, odẹ rẹ ọvo Gẹshọm (fikiridie ọ tare, Mẹvwẹ ọrhorha vwẹ otọ rẹ ọrhorha), 4odẹ rẹ ọrivẹ, Ẹliẹza (fikiridie ọ tare, Ọghẹnẹ rẹ esẹ mẹ ọye ọchuko mẹ, o de sivwe nẹ ọlọkọ ri Fero). 5Jẹtro, ọgọ ri Mosis, ọ vẹ emeshare rọye ivẹ vẹ aye rọye de bru Mosis rhe aton na vwẹ asan ro mu erhọn phihọ vwẹ ugbenu rẹ Ọghẹnẹ na. 6Ọke rẹ ohwo ọvo vwọ ta kẹ Mosis, Nighe, ọgọ wẹn Jẹtro o bru we cha ọ vẹ aye wẹn vẹ emeshare rọye ivẹ; 7Mosis da ra vwa ọgọ rọye, o de shiguẹ ọ da fiọnfiọn; ayen da nọ ekpẹn rẹ ohwohwo, ayen da ro uwevwi. 8Mosis de gbe obo rẹ Ọrovwohwo ru Fero vẹ ihwo rẹ Ijipt fiki rẹ Izrẹl, emu egangan rẹ ayen mrẹre vwẹ idjerhe, vẹ obo rẹ Ọrovwohwo sivwi ayen wan. 9Oma da vwerhe Jẹtro fiki rẹ emu esiri ejobi rẹ Ọrovwohwo ru kẹ Izrẹl, ro vwo si ayen nẹ obọ rẹ ihwo rẹ Ijipt.

10Jẹtro da ta, Ebruphihọ kẹ Ọrovwohwo, ro si ovwan nẹ obọ rẹ ihwo rẹ Ijipt vẹ obọ ri Fero. 11Asakiephana me riẹnre nẹ Ọrovwohwo rhonọ eghẹnẹ ejobi, kidie o sivwi ihwo na nẹ obọ rẹ ihwo rẹ Ijipt, ọke rẹ ayen vwọ kpare oma kpenu kẹ ayen. 12Etiyin Jẹtro ọgọ ri Mosis na o de ze izobo rẹ ẹtorhẹ kugbe izobo diodi kẹ Ọghẹnẹ; Erọn vẹ ekpako rẹ Izrẹl ejobi de rhi nene Mosis vẹ ọgọ rọye re emu vwẹ obaro rẹ Ọghẹnẹ.

A vwẹ Iguẹdjọ mu

(Urhi Rivẹ 1.9-18)

13Vwẹ irhiọke rivẹ Mosis de tidia ro guẹdjọ rẹ ihwo na, ihwo na de mudia yariẹ Mosis nẹ irhiọke re te ovwọnvwọn. 14Ọke rẹ ọgọ ri Mosis vwọ mrẹ obo ro ruẹ vwọ kẹ ihwo na, ọ da ta, ọnana die wo ruẹ kẹ ihwo na? Die wẹ ọvo vwo tidia, rẹ ihwo na ejobi vwo mudia yariẹ owẹ phihọ nẹ irhiọke re te ovwọnvwọn? 15Mosis da ta kẹ ọgọ rọye, Fikiridie ihwo na cha nọ ekpẹn rẹ Ọghẹnẹ vwẹ obọ mẹ; 16ayen de rhe vwo ẹghwọ, ayen mi bru vwe rhe ki mi guẹdjọ rẹ ohwo vẹ ọrivẹ rọye, mi mi rhe dje iji rẹ Ọghẹnẹ vẹ erhiẹn rọye kẹ ayen. 17Ọgọ ri Mosis da ta kẹ, Obo wo ruẹ na yovwiri-i. 18Te owẹ te ihwo wẹn na oma cha ghwọrọ ovwan, kidie oghwa na họhọ nọ kẹ wẹ; wẹ ọvo che se suo-o. 19Kerhọ mẹ; me cha jẹ iroro kẹ wẹ, rere Ọghẹnẹ nene uwe dia! wẹ kọye che mudia obaro rẹ Ọghẹnẹ kẹ ihwo na, wọ me ghwẹ eta rẹ ayen rhe Ọghẹnẹ; 20ku wo yono ayen irhi na vẹ erhiẹn na, wo mi rhe dje idjerhe rẹ ayen yan nene vẹ obo rẹ ayen ru vwọ kẹ ayen. 21Ọ rọmarho wọ me sanọ ihwo re goma vwẹ ohri rẹ ihwo na, ọtiẹ ihwo re djẹ oshọ rẹ Ọghẹnẹ, ihwo ra vwẹ ẹro so rẹ udiẹriọ tuoma, keye wo phihọ enu rẹ ihwo na re dia isun rẹ ihwo na i ri ujori ihwe, e rẹ ujori e rẹ ujuvẹ gbẹ ihwe, vẹ e rẹ ihwe. 22Gbe jẹn ayen guẹdjọ rẹ ihwo na vwẹ ọke ejobi; ota rode kọye ayen vwo rhe we, ayen mi rhe brorhiẹn rẹ eta itete kẹ omoma rayen, ọnana kọye ọ vwọ pharhe kẹ wẹ, kẹ ayen nene uwe ghwa oghwa na. 23Wo de ru ọnana, Ọghẹnẹ da je ta ọtiọye kẹ wẹ, etiyin ku wo se chirakọn, ihwo nana ejobi ki ji se kpo ẹdia rayen vwẹ ufuoma.

24Mosis de nyo urhuru rẹ ọgọ rọye o de ru obo rọ tare na. 25Mosis da sanọ ihwo re goma nẹ evun rẹ Izrẹl rhe, ọ da vwẹ ayen ru ilori rẹ ihwo na, ilori rẹ ujori ihwe, e rẹ ujori, e rẹ ujuvẹ gbẹ ihwe, e rẹ ihwe. 26Ayen de guẹdjọ rẹ ihwo na vwẹ ọke ejobi, ẹdjọ rẹ ganre kọye ayen vwo rhe Mosis, ẹkẹvuọvo omota otete ayen mi rhe brorhiẹn rọye. 27Etiyin Mosis de si obọ nẹ ọgọ rọye kpo, ọ da yanran kpo orho rọye.

Currently Selected:

Ẹyano 18: UBV77

Highlight

Copy

Compare