Ẹyano 16

Ọghẹnẹ kẹ Ayen Mana

1Ayen de mu oyan vwẹ Elim, ukoko rẹ ihwo rẹ Izrẹl ejobi de rhi te aton ri Sin, rọ uvwre rẹ Elim vi Sinae vwẹ ẹdẹ ihwiori rẹ emeranvwe rivẹ rẹ ayen vwo nẹ otọ ri Ijipt na. 2Ukoko rẹ hwo rẹ Izrẹl ejobi de gun Mosis vẹ Erọn vwẹ evun rẹ aton na, 3ayen da ta kẹ ayen, Manẹ kẹ avwanre ghwuru vwẹ obọ rẹ Ọrovwohwo vwẹ otọ rẹ Ijipt vwonẹ, ọke rẹ avwanre vwo tidia kerẹ evwẹrẹ rẹ eranvwe rẹ avwanre da re ikara vọn evun; etinẹ na wọ rọye avwanre rhe aton nana rere wọ rhe vwẹ owẹvwe hwe ukoko nana ejobi ghwu.

4Etiyin Ọrovwohwo da ta kẹ Mosis, Nighe, Me cha rhọ emu nẹ enu rhe kẹ ovwan, ihwo na ke ra tọrọ uche rẹ ẹdọke ọvuọvo, rere mi vwo vughe ovwan, sẹ ayen yan nene urhi mẹ eyẹ ẹjo. 5Vwẹ ẹdẹ esan ọke rẹ ayen de chere obo rẹ ayen ghwẹ koko, ayen me tọrọ koko akuava kirobo rẹ ayen tọrọ kẹdẹ kẹdẹ. 6Ọtiọye Mosis vẹ Erọn ta kẹ ihwo rẹ Izrẹl. Vwẹ ovwọnvwọn wa me riẹn nẹ Ọrovwohwo re rọye ovwan nẹ otọ rẹ Ijipt rhe, 7vwẹ irhiọke ku wọ cha mrẹ urinrin rẹ Ọrovwohwo, fikiridie o nyo iguegun wẹn kpahe Ọrovwohwo. Kidie avwanre epha, ru we vwo guẹ avwanre? 8Mosis da ta, ọke rẹ Ọrovwohwo da vwẹ eranvwe ke we re vwẹ ovwọnvwọn, irhiọke kẹ wa re ikara vọn evun, fikiridie Ọrovwohwo nyo iguegun rẹ ovwan gun kpahọ, die avwanre epha? Ọ dia avwanre we guẹ-ẹn ẹkẹvuọvo Ọrovwohwo we guẹn.

9Mosis da ta kẹ Erọn, Ta kẹ ukoko rẹ ihwo rẹ Izrẹl ejobi, We rhi si kẹrẹ Ọrovwohwo, kidie o nyo iguegun rẹ ovwan. 10Rẹ Erọn vwọ ta ota kẹ ukoko rẹ ihwo rẹ Izrẹl, ayen de ni obo aton, nighe urinrin rẹ Ọrovwohwo da phia vwẹ obenu. 11Ọrovwohwo da ta kẹ Mosis, 12Mi nyo iguegun rẹ ihwo rẹ Izrẹl, ta kẹ ayen, Vwẹ ovwọnvwọn wa cha re eranvwe, vwẹ irhiọke evun rẹ ikara kọ vọn ovwan, ọke yena ko wa cha riẹn nẹ Mẹvwẹ Ọrovwohwo Ọghẹnẹ rẹ ovwan na.

13Vwẹ ovwọnvwọn, irurẹ da rhe rhi rhurhu erhọn na; vwẹ irhiọke evwru de rhi mu riariẹ erhọn na phihọ. 14Re evwru na vwọ ghwiẹ nu, eravwọ ẹvo kọre kọre kerẹ ibi rẹ ivwerhiyan da hẹ otọ vwẹ evun rẹ aton na, 15ọke rẹ ihwo rẹ Izrẹl vwọ mrẹ, ayen da ta kẹ ohwohwo, ọnana didi emu? Kidie ayen riẹn obo rọ epha-a. Mosis da ta kẹ ayen, ọnana ikara rẹ Ọrovwohwo vwọ kẹ ovwan re. 16Ọnana obo rẹ Ọrovwohwo tare: Wa ohwo ọvuọvo ghwẹ, uche rọ sa re; wa rọye omer ọvuọvo, kerẹ uche ihwo re ria emu vwẹ uwevwi wẹn. 17Ihwo rẹ Izrẹl de ru ọtiọye; ayen da ghwẹ, ẹvo buru, ẹvo hanvwere. 18Ẹkẹvuọvo ọke rẹ ayen vwọ vwẹ omer vwavwọn, ọ rọ vwavwe bu vwo ọvuọvo ro chekọ-ọ, ọ rọ vwavwe otutuno ọ je karọ-ọ; ohwo ọvuọvo da vwavwe uche rọ sa re. 19Mosis da ta kẹ ayen, We jẹn ohwo ọvuọvo je emerha vwo phrọke-e. 20Ẹkẹvuọvo ayen kerhọ ri Mosis-i; ẹvo da yan jẹ abọvo rayen vwo phrọke, ihori da ro ayen ki gbo; ivun de miovwi Mosis kpahe ayen. 21Irhirhiọke kọye ayen vwọ ghwẹ, uche rẹ ohwo ọvuọvo sa re, ẹkẹvuọvo ọke re uvo da rhovwo rhe, ọ me wran.

22Vwẹ ẹdẹ resan ayen me ghwẹ ọtiọye akuava, omer ivivẹ; ọke rẹ isun rẹ ukoko na rhe vwọ ta kẹ Mosis re. 23Ọ da ta kẹ ayen, ọnana obo rẹ Ọrovwohwo tare, Odẹ ọye ẹdẹ ofuefu rẹ omaerovwo, edidjala fuanfon kẹ Ọrovwohwo; kake obo ru wo sa kake, chere obo ru wo se chere, obo ri chekọ ejobi gba sẹro rọye te irhiọke. 24Ọtiọye ayen de jovwo te irhiọke, kirobo ri Mosis ta kẹ ayen; o rhe gbo-o, o rhe ji vwo ihori-i. 25Mosis da ta, Wa riọ nonẹ, kidie nonẹ na ọye edidjala kẹ Ọrovwohwo, nonẹ wa gbe cha mrẹ vwẹ evun rẹ aghwa-a. 26Ẹdẹ esan wa vwọ ghwẹ, ẹkẹvuọvo ẹdẹ righwrẹn, rọ dia edidjala na, ọvuọvo cha dia-a. 27Vwẹ ẹdẹ righwrẹn na ihwo na ẹvo da je ra ghwẹ, ayen gbe rha mrẹ ọvuọvo-o. 28Ọrovwohwo da ta kẹ Mosis, Mavọ okrite wọ vwọ sen nẹ wọ yọnrọn irhi vẹ iji mẹ-ẹ? 29Nọ! Ọrovwohwo na vwẹ edidjala na vwọ kẹ wẹn, fiki rẹ ọtiọye na vwẹ ẹdẹ resan ọ da kẹ wẹ ikara rẹ ẹdẹ ivẹ. Jẹn ohwo ọvuọvo daji asan rọ epha, e jẹn ohwo ọvuọvo nẹ ẹdia rọ epha vwẹ ẹdẹ righwrẹ-ẹn. 30Ọtiọye ihwo na de rovwo oma vwẹ ẹdẹ righwrẹn na.

31Etiyin uwevwi rẹ Izrẹl de se odẹ rọye Mana; ọ họhẹ ubi rẹ iphorhiyan, fuanfon, avwerhe rọye kerẹ ikara pẹpẹghẹ ra vwẹ ọnyọn ru. 32Mosis da ta, ọnana obo rẹ Ọrovwohwo tare na: E jẹn a sẹro rẹ omer rọye ọvo nu vwẹ uvwiẹ rẹ ovwan ejobi, rere ayen vwọ mrẹ ikara re me vwọ ghẹrẹ ovwan vwẹ evun rẹ aton, ọke re me vwọ reyọ ovwan nẹ otọ rẹ Ijipt rhe. 33Mosis da ta kẹ Erọn, Reyọ ichago, ru wọ vwavwẹ omer ri mana phihọ, ru wo muo phihọ obaro rẹ Ọrovwohwo, ra sẹro rọye vwẹ uvwiẹ wẹn na ejobi. 34Kirobo rẹ Ọrovwohwo ta kẹ Mosis, ọtiọye Erọn de muo phihọ obaro rẹ Iseri na, rere a sẹro reyọ. 35Emọ rẹ Izrẹl da re mana na ikpe ujuvẹ, bẹsiẹ rẹ ayen rhi vwo te otọ ro fo ẹdia; ayen da re mana na, bẹsiẹ rẹ ayen rhi vwo te ughwru rẹ otọ ri Kenan. 36(Eghẹghẹrẹ ọvo ọye abọvo vwẹ ẹbẹre ihwe rẹ iputusẹ.)

Currently Selected:

Ẹyano 16: UBV77

Highlight

Copy

Compare