2 REYES 25
25
Jerusalén pueblo urmashcamanta
(Jer 39.1-7; 52.3-11)
1Sedequías Judá llactata iscun huata chunga quilla chunga punzhata mandacucpimi, jatun mandac Nabucodonosorca paipac tucui soldadocunahuan Jerusalenman shamurca. Chashna shamushpaca, tucui pueblo muyunditami torrecunata macanacungapac shayachirca. 2Sedequías chai pueblota chunga shuc huatata mandangacamanmi chai pueblo muyundipi carcacuna. 3Chai huata callari chuscu quilla iscun punzha tucucpimi, Jerusalenpi causaccunaca imata mana micui pudishpa yallita yarcaihuan carca. 4Chaimantami jatun mandac Sedequiasca jatun pircata jutcushpa caldeocuna muyundipi chapacucpipish, tucui paipac soldadocunahuan llucshirca. Paipac huertata rishpa, ishcai pirca chaupipi tiyac punguta chai tutallatac llucshishpami, Arabá pambaman rina ñanta rirca. 5Ashtahuanpish caldeocuna catishpa rishpami, jatun mandac Sedequiastaca Jericó pueblo lado pambapi japirca. Paipac soldadocunaca tucuimi paita shitashpa, caita chaita rirca. 6Jatun mandac Sedequiasta japishpaca, Babilonia llactata jatun mandacpacmanmi, Ribla puebloman apamurca. Chaipimi ima shina llaquichinataca huillarca. 7Sedequiaspac churicunataca paipac ñaupallapitacmi cungata pitishpa huañuchirca. Sedequiastaca ñahuita surcushpami, cadenahuan huatashpa, Babilonia llactaman aparca.
Judá llactapi causaccunata prezu apashcamanta
(2 Cr 36.17-21; Jer 39.8-10; 52.12-30)
8Babilonia llactata jatun mandac Nabucodonosor chunga iscun huata, pichca quilla, sucta punzhata mandacucpimi, paipac soldadocunata mandac paita servic Nabuzaradanca Jerusalenman shamurca. 9Chashna shamushpami, Mandac Diospac huasitapish, mandana huasitapish, Jerusalenpi tucui huasicunatapish, mandaccunapac tucui huasicunatapish rupachirca. 10Chai mandac-huan shamuc tucui caldeo soldadocunaca Jerusalén muyundi jatun pircatami urmachirca. 11Soldadocunata mandac Nabuzaradanca chai pueblopi maijan saquirishca gentecunatapish, Babilonia llactata jatun mandac-huan tucushca gentecunatapish, huaccha gentecunatapish prezumi aparca. 12Chashna cashpapish Nabuzaradanca Judá llactapi causac ashtahuan huaccha gentecunataca uvas chagracunapi, pambacunapi trabajachunmi mana apashpa saquirca.
13Caldeocunaca Mandac Diospac huasipi shayachishca ishcai jatun bronce pilartapish, yacu apana carretacunatapish, yacu churana pailatapish paquircami. Chai broncetaca Babilonia llactamanmi tucuita aparca. 14Shinallatac chaipi tiyac mangacunatapish, lamparacunatapish, mechata pitinacunatapish, cucharacunatapish, broncemanta ruhuashca shuctac charinacunatapish tucuimi aparca. 15Soldadocunata mandacca curimanta, cullquimanta ruhuashca inciensota rupachinatapish, jatun tazoncunatapish tucuimi aparca.
16Ishcai jatun pilarcunata, yacuta churana pailata, yacuta apana carretacunataca Mandac Diospac huasimanmi Salomón ruhuachishca carca. Chai tucui charishcacunaca maita mana pezaipac yalli achcami carca. 17Cada pilarmi pusac metro yalli carca. Chai pilarpac umapica broncemanta ruhuashca capitelta churashcami carca. Chai capitelca shuc metro quimsa chunga pichca centimetromi carca. Chai capitelpac jahuapica tucuimi broncemanta ruhuashca granadillacunata muyuchishca carca. Chaishuc pilarpish, chashnallatacmi muyuchishca carca.
18Soldadocunata mandacca curatapish, chai quipa Sofonías curatapish, Diospac huasipi tiyac platocunata cuidac quimsa runacunatapish aparcami. 19Shinallatac Jerusalenmantaca soldadocunata mandacta, jatun mandacta cunac pichca mandaccunatami aparca. Soldadocunapac shuticunata quillcashpa charic mandactapish aparca. Paimi chai llactapi causaccunapac shuticunataca quillcac carca. Shinallatac pueblopi cashca sucta chunga gentecunatami aparca. 20Tucui paicunata japishpami, soldadocunata mandac Nabuzaradanca Babilonia llactata jatun mandacpacman Ribla puebloman aparca. 21Chaipimi Babilonia llactata jatun mandacca Hamat llactapi huañuchirca. Chashnami Judá llactapi causaccunataca paicunapac llactamanta caruman prezu aparca.
Judá llactapi saquirishcacuna Egiptopi causagrishcamanta
22Babilonia llactata jatun mandac Nabucodonosorca Judá llactapi saquirishcacunata mandachunca Ahicampac churi Gedaliastami churarca. Ahicamca Safanpac churimi carca. 23Babilonia llactata jatun mandacca Gedaliastami Judá llactapi saquirishca gentecunata mandac cachun churarca. Chashna churashcata soldadocunata mandaccuna shinallatac soldadocuna yachac chayashpaca, Mizpa pueblopimi tupangapac shamurca. Chai shamuccunaca Netaniaspac churi Ismael, Careapac churi Johanán, Netofa pueblomanta Tanhumetpac churi Seraías, Maaca pueblomanta shuc runapac churi Jaazaniasmi paicunapac soldadocunahuan shamurca. 24Chaimantami Gedaliasca paicunamanpish, paicunapac soldadocunamanpish ari nishpaca: «Caldeocunata serviccunataca ama manchaichicchu. Babilonia llactata jatun mandacta servishpa, chai llactapi causashpaca allimi causanguichic» nirca.
25Ashtahuanpish chai huata canchis quillapimi jatun mandacpac huahua huahuapuramanta Ismaelca chunga runacunahuan Mizpa puebloman rishpa Gedaliasta huañuchishpa, chaipi causacuc Judá llacta runacunatapish, caldeocunatapish huañuchirca. Ismaelca Netaniaspac churimi carca. Nataniasca Elisamapac churimi carca. 26Chaimantami caldeocunata manchashpa tucui gentecuna, uchillamanta callarishpaca, yuyaccunacaman soldadocunata mandaccunahuan miticushpa Egiptoman rircacuna.
Joaquintarac carcelmanta llucchishpa allipi churashcamanta
(Jer 52.31-34)
27Judá llactata jatun mandac Joaquín quimsa chunga canchis huatata prezu causacucpimi, Evil-merodacca Babilonia llactata jatun mandac tucurca. Paimi mandai callarishca chunga ishcai quilla, ishcai chunga canchic punzhapi Joaquintaca carcelmanta llucchirca. 28Paihuan sumacta parlashpami, Babilonia llactata jatun mandacca paihuan cac shuctac mandaccunamanta ashtahuan yalli tiyarinapi tiyachirca. 29Shinallatac carcelpi cana churanata llucchishpa, shuc churanata churachishpami, paipac tucui causaipi jatun mandac-huan micuchun saquirca. 30Paica tucui causaipimi punzhanta paipac ima illashcata jatun mandacmanta chasquishpa causarca.
Currently Selected:
2 REYES 25: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.