2 REYES 24
24
1Joacim mandacui punzhacunami Babilonia llactata jatun mandac Nabucodonosorca macanacungapac shamurca. Macanacushpa aticpimi, Joacimca quimsa huatata Nabucodonosorta servishpa causarca. Chai quipaca mana paita cazushpami, cariyarca. 2Ashtahuanpish Mandac Diosca Joacimhuan macanacuchunmi caldeocunapac, siriocunapac, moabitacunapac, amonitacunapac soldadocunata cacharca. Mandac Diosca pai ima nishcata huillac, paita serviccunaman huillashca shinallatacmi Judá llactapi causaccunata tucuchichun cacharca. 3Manasés juchacunata ruhuashcamanta, tucui imatapish pai ruhuashcamantami paipac ñaupamanta anchuchingapac Mandac Diosllatac Judá llactata llaquichichun cacharca. 4Shinallatac mana faltayuc gentecunata huañuchishcamantapishmi, chashnaca ruhuarca. Mana faltayuc gentecunapac yahuarca Jerusalenpimi jundarca. Chaimantami Mandac Diosca mana perdonasha nirca.
5Joacimpac shuctac ruhuashcacunapish, imacunallata ruhuashcacunapish Judá llactata jatun mandaccuna imata ruhuashcacunata quillcashcapimi tiyacun. 6Joacim huañushpa, paipac ñaupa taitacunahuan tandanacugricpica, paipac churi Joaquinmi paipac randi mandai callarirca.
7Egipto jatun yacumantaca Eufrates jatun yacucaman Babilonia llactata jatun mandac quichucpimi, Egipto llactata jatun mandacca paipac llactamanta mana ashtahuan llucshirca.
Joaquinta, paita serviccunandi
Babiloniaman prezu apashcamanta
(2 Cr 36.9-10)
8Joaquinca chunga pusac huatata charishpami mandai callarirca. Paica quimsa quillatami Jerusalenpi mandarca. Paipac mamaca Jerusalenmanta Elnatanpac ushi Nuhustami carca.
9Joaquinca paipac taita shinallatacmi Mandac Diospac ñaupapi mana allita ruhuashpa causarca.
10Chai punzhacunapimi Babilonia llactata jatun mandac Nabucodonosorta serviccuna Jerusalenpi causaccunahuan macanacungapac shamushpa, pueblota muyushpa shayarirca. 11Chashna shayacucpimi, Babilonia llactata jatun mandac Nabucodonosorca, Jerusalenman chayarca. 12Chaimantami Judá llactata jatun mandac Joaquinca paipac mamandi, paita serviccunandi, pai churashca mandaccunandi, caishuc mandaccunandi jatun mandac Nabucodonosorpac maquipi prezu yaicurca. Jatun mandac Nabucodonosor Babilonia llactata pusac huatata mandacucpimi, chashnaca tucurca. 13Chai quipami Nabucodonosorca Mandac Diospac huasipi, mandana huasipi tucui alli huacaichishcacunata llucchirca. Chai curimanta ruhuashca charinacunataca tucuimi ñutuchirca. Chai charinacunataca Israel llactata jatun mandac Salomonmi Mandac Dios nishca shinallatac Mandac Diospac huasipi charingapac ruhuachishca carca. 14Chai quipami Jerusalenmantaca tucui mandaccunata, ashtahuan sinchi soldadocunata, artesanocunata, fierrota huactaccunatapish tucuita tandachishpa, chunga huaranga runacunata prezu aparca. Judá llactapi causac huacchacunallami chaipica saquirirca.
15Jatun mandac Joaquintapish, paipac mamatapish, paipac huarmicunatapish, paita serviccunatapish, Judá llactapi causac chayuccunatapish Jerusalenmantaca Babilonia llactamanmi prezu aparca. 16Babilonia llactata jatun mandacca canchis huaranga macanacuc soldadocunata, artesanocunata shinallatac fierrota huactaccunataca huaranga runacunata shinallatac macanacunata pudic gentecunata japishpami Babiloniaman prezu aparca.
17Chai quipaca Babilonia llactata jatun mandacca Joaquinpac tio Mataniastami Joaquinpac randi jatun mandac cachun churarca. Mataniastaca Sedequiastami shutichirca.
Sedequías Judá llactata mandashcamanta
(2 Cr 36.11-16; Jer 52.1-3)
18Sedequiasca ishcai chunga shuc huatata charishpami Judá llactata mandai callarirca. Paica chunga shuc huatatami Jerusalenpi mandarca. Paipac mamaca Libna pueblomanta Jeremiaspac ushi Hamutalmi carca.
19Paipish, paipac taita Joacim shinallatacmi Mandac Diospac ñaupapica mana allita ruhuarca. 20Chaimantami Mandac Diosca Jerusalenpi causaccunahuanpish, Judá llactapi causaccunahuanpish yallita piñarishpa, paipac ñaupamanta llucchishpa cacharca.
Sedequiasca Babilonia llactata jatun mandacta mana cazushpami cariyarca.
Currently Selected:
2 REYES 24: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.