Псалм 59
59
[58-р.с.] 1Хоро́скирэ Дирижоро́скэ. “На хасякир” пэ Мелодия, Давидоскири гарады Наде́я, ке́ли Савло бичхадя́ Манушэ́н и ёнэ дыкхнэ́ цямкэс пал Кхэр, соб (кай) тэ замарэ́н лэс.
2Дэ́вла миро! Зра́кх ман мирэ́ вэргэ́ндыр, чхув ман пэ вучипэ́н одолэ́ндыр, савэ́ ґаздэ́напэ пэ ма́ндэ. 3Зра́кх ман манушэ́ндыр, савэ́ кэрэ́на чорипэ́н и зра́кх ман одолэ́ндыр, кон исын нахрата кэ рат. 4Пал-дова́ со ґа́да, ёнэ подракхэна тэ замарэ́н ман; зор мануша́ скэдэ́напэ пэ ма́ндэ: на пал мирэ́ чорэ́ рэ́нды ци пал миро грэ́хо, о Раё Дэ́вла! 5Ёнэ праста́на и сыклякирэ́на екх екхэ́с, на дыкхи́, со нанэ банг ма́ндэ. Джанґадёв тэ помогинэс ма́нгэ и подыкх. 6И Ту, о Раё Дэ́вла, болыбна́скирэ-янголэ́нгиро, Израилёскиро Дэвэ́л, ушты́ и яв тэ дыкхэ́с сарэ́ на́цыи, на тангинэ ни екхэ́с, кон зракирэлапэ тэ кэрэ́л чорипэ́н. Сэ́ла. 7Бэльвэленца ёнэ рисёна палэ, ёнэ выинэна сы́рбы джукэла и обджана трусця́л фо́ро, 8акэ, лэ́нгирэ муендыр чадэла, лэ́нгирэ уштэндыр джа́на лава́ сы́рбы востро (чолалы́) курта́ла, и ёнэ думинэ́на пэ́скэ: “Кон дава́ шунэ́ла?” 9Нэ Ту явэ́са тэ саспэ лэ́ндыр, Раё Дэ́вла, Ту явэ́са тэ просас яви́р на́цыи. 10Ту сан миро Зоралыпэ́н, пэ Ту́тэ мэ ява́ва тэ рикирав наде́я; Ту, Дэ́вла, сан мири́ тва́рдыма тэ гарадёвав ма́нгэ. 11Миро Дэвэ́л, Саво́ тангинэла ман, явэ́ла тэ дыкхэлпэ ма́нца, Дэвэ́л дэ́ла ма́нгэ тэ дыкха́в, сыр мирэ́ вэ́рги пэрэ́на. 12На замар лэн, соб (кай) мирэ́ мануша́ тэ на бистрэн лэн, росчхурдэ лэн Тырэ́ зорья́са и рав тэлэ́ лэн, амаро́ Раё Дэ́вла, Ту сан шчы́то амаро́. 13Лэ́нгирэ мо́стыр джа́на грэхи́тка лава́, мэк ёнэ тэ дэнпэ дукха́ (тэ хохавэнпэ) пэ́скирэ пхутькирибнастыр пал дова́, со ёнэ прокошэнас и хохавэнас. 14Хасякир лэн дрэ Пэ́скири холы́, хасякир, соб (кай) ёнэ тэ на явэ́н, соб (кай) ёнэ тэ джинэ́н, со Дэвэ́л кралинэла Яковостыр аж кэ яго́ры (кэ краи́) пхувья́кирэ. Сэ́ла. 15И ёнэ явэ́на палэ бэльвэленца, и мэк ёнэ тэ выинэн сы́рбы джукэла и тэ псирэ́н трусця́л фо́ро; 16мэк ёнэ тэ псирэ́н одори́к и палэ пал хабэ́н, мэк ёнэ тэ рыкинэн, ко́ли тэ на явэ́н чалэ. 17Нэ мэ ява́ва тэ бага́в пал Тыро́ зоралыпэ́н; чачо́ мэ ява́ва тэ бага́в зоралэ́с пал Тыри́ лачхэ́-илы́ткима злокостыр (ранкостыр): со Ту са́нас ваш ма́нгэ сы́рбы зоралы́ тва́рдыма (диз) тэ гарадёвав и наде́я дрэ пхарэ́ дывэса́. 18[р.с.] Мэ ява́ва тэ бага́в: “Ту сан мири́ Зор, Ту сан миро Дэвэ́л, Саво́ приракхэла ман. Миро Дэ́вла, Саво́ тангинэла ман.”
Currently Selected:
Псалм 59: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
