Псалм 104
104
[103-р.с.] 1Славин и парикир Ра́скэ-Дэвлэ́скэ, миро ди. О, Раё Дэ́вла, миро Дэвэ́л, Саво́ баро́ Ту сан! Ту учхакирдян Пэс патыва́са и райканэ слава́са.
2Ту сан учхакирдо дудэса (свэтоса) сыр урибнаса, Ту росчхудян трусця́л (кругом) болыбэ́н сыр шатракирэ рига́. 3Ту чхудя́н бэльки (страпилы) тэл стрэ́ха (чхаки́н) ваш шука́р шту́бы (комо́ры), со исын тэл паня́, Ту кэрдя́н облокэндыр Пэ́скэ марибны́тко вурдэ́н, Ту псирэса ўсендзе (везде) пэ балвалякирэ пхака́, 4Ту создыян Тырэ́ Янголэн духэ́ндыр, Ту создыян Пэ́скэ бутярнэн ягакирэ чибэндыр. 5Ту чхудя́н пхув пэ фунда́менто адя́кэ, со ёй на чилавэлапэ штэто́стыр ние́кхвар. 6Ту учхакирдян пхув хорэ штэтэнца сыр урибнаса; паня́ тэрдинэ́ вучэды́р бэргэндыр. 7Сыр Ту бангякирэса лэн, ёнэ нашлэ, ёнэ дэнапэ тэ прастан Тырэ́-громоскирэ занятыр (глосятыр), 8Ёнэ пириджана бэ́рги, ёнэ змэкэнапэ пэ долы, пэ штэ́ты, со Ту зачхудян ваш лэ́нгэ. 9Ту чхудя́н кусты́к (граница), со ёнэ на пириджана, соб (кай) ёнэ на могиндлэ́ нэвэ́стыр (нэвэ́с) тэ чхакирэн пхув. 10Ту кэрэ́са ґанынга́ пане́са дрэ долы, ёнэ тхадэна машки́р бэ́ргицы, 11ёнэ панякирэна кажнонэ́ рискирибна́скирэ мурдалэс (зверёс), со исын пэ фэ́лда, хрустытко бу́со о́сло (мега́ри) ячэ́ла во́льно пэ́скирэ трушатыр (смэгатыр). 12Болыбна́скирэ чирикля́ дживэ́на одо́й пашы́л лэ́ндэ, ёнэ явэ́на тэ дэн го́дла пэ́скирэ рандендыр (вэткэндыр). 13Ту панякирэса бэ́рги Пэ́скирэ упратунэ шукаронэ штубэндыр, пхув исын чалы далэ́ пхабэнца, со Ту барьякирэса. 14Ту кэрэ́са адя́кэ, со чар барьёла кхэритконэ́ мурдалэ́нгэ (скотоскэ), и раслины ваш манушэ́нгиро лачхипэ́н, соб (кай) тэ бияндёл хабэ́н пхувья́тыр, 15и мол (вино), сави́ веселинэла (лошакирэла) манушэ́скиро ило́, и оливи́тко дзэт, соб (кай) тэ зяинэл манушэ́скиро муй, и маро́, со кэрэ́ла манушэ́с зоралэса. 16Ливаноскирэ зоралэды́р кедры, со Ту почхудян, Тырэ́, Ра́скирэ–Дэвлэ́скирэ кашта́, исын пхэрдэ́ соко́са (хумэ́са) и санапэ, 17Кай чирикля́ кэрэ́на пэскирэ гня́зды (ку́фы), кай бусло кэрдя́ пэ́скэ кхэроро пэ эгли (ёлки). 18А вучэ́ бэ́рги исын ваш миргэнгэ (сарненгэ), барунэ́ крутымы гараибэн ваш шушуенгэ (зайцэнгэ), 19Ту создыян чхон тэ сыкавэ́н уляґи (поры); кхам джинэ́ла, ке́ли лэ́скэ трэй тэ заджа́л. 20Ту кэрдя́н калыпэ́н (цямлыпэ́н) и дава́ исын рат, ке́ли сарэ́ вэшытка рискирибна́скирэ мурдала́ (звери) чорьёна. 21Тэрнэ́ шчэра́ (левы) рыкинэна пал пэ́скиро дорэсыбэ́н, и родэ́на пэ́скиро хабэ́н Дэвлэ́стыр. 22Кхам уштэ́ла: ёнэ дэнапэ палэ и исын паштэ́ дрэ пэ́скирэ пасибня (ле́жыцы). 23Ману́ш выджа́ла пэ пэ́скири буты́ и кэрэ́ла буты́ пхарэ́с, пака явэ́ла бэльвэ́ль. 24О, Раё Дэ́вла, кицы́ бут Ту создыян! Ту кэрдя́н лэн сарэ́н барэ́ годыпнаса, а пхув исын пхэрды́ Тырэ́ барвалыпнэнца. 25Ѓа́да, исын баро́ и буґло́ мо́рё (дэрья́в), пэ дуй рига́, кай исын ра́зна цапня́ (пресмыкаюшчы), со ту на дэ́са ра́да тэ гинэс; ра́зна тыкнэ́ и барэ́ мурдала́, 26Акэ, па́рмы (корабли) джа́на пир дава́ мо́рё (дэрья́в), и, ґа́да, Левиафано, со Ту создыян, соб (кай) лэ́скэ тэ броинэл одо́й. 27Сарэ́ ёнэ ужакирэ́на, соб (кай) Ту тэ дэс хабэ́н лэ́нгэ дро пэ́скиро часо (цы́ро): 28Ту дэ́са лэ́нгэ, ёнэ прилэ́на, ту роскэрэса Пэ́скиро васт и ёнэ ха́на чалэ́с. 29Ту рисёса лэ́ндыр и ёнэ страхадёна; Ту отлэса лэ́ндыр ду́хо (фа́но), ёнэ мэрэ́на и рисёна кэ пэ́скиро пра́хо. 30Ту бичхавэса Тыро́ ду́хо (фа́но) и ёнэ создэнапэ, и Ту кэрэ́са адя́кэ, со Ту нэвякирэса джиибэ́н пэ пхув. 31Ра́скирэ-Дэвлэ́скири сла́ва ячэ́лапэ зоралэ́с пэ сарэ́ ве́ки, Рай Дэвэ́л явэ́ла тэ радынэ́лпэ Пэ́скирэ бутендыр. 32Ёв подыкхэла пэ пхув и ёй издрала, Ёв чилавэ́ла бэ́ргицы и лэ́ндыр тхув джа́ла. 33Мэ ява́ва тэ бага́в Ра́скэ-Дэвлэ́скэ саро́ пэ́скиро джиибэ́н; мэ ява́ва тэ бага́в мирэ́ Дэвлэ́скэ, пака мэ сом джидо́. 34Мэк тэ явэ́н шука́р и лачхэ́ Лэ́скэ мирэ́ ду́мы, мэ ява́ва тэ радынавпэ Лэ́стыр. 35Мэк тэ хасён грэхи́тка мануша́ пхувья́тыр, мэк тэ на явэ́н буты́р пэ свэ́то чорэ́ манушэ́н. Вышар и парикир Ра́скэ-Дэвлэ́скэ, миро ило́. Аллилуя.
Currently Selected:
Псалм 104: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
