Псалм 105
105
[104-р.с.] 1Парикирэ́н, тумэ́, Ра́скэ-Дэвлэ́скэ! Кхарэ́н Лэ́скиро лав! Роспхэнэ́н манушэ́нгэ, со Ёв кэрдя́.
2Бага́н Лэ́скэ, бага́н псалмы Лэ́скэ, розлэн сарэ́ Лэ́скирэ ди́вна бутя́. 3Сла́ва Лэ́скирэ свэнтонэ́ лавэ́скэ; мэк тэ радынэ́лпэ ило́ до манушэ́нгиро, кон родэ́ла Рас-Дэвлэ́с. 4Родэ́н Рас-Дэвлэ́с и Лэ́скири зор, родэ́н Лэс усады (сак): 5рипирэ́н Лэ́скирэ ди́вы, со Ёв кэрдя́, Лэ́скирэ древа́н барэ́ ди́вы и лава́, савэ́нца Ёв сэндякирдя Пэ́скирэ мо́са. 6О, тумэ́ сан Аврамоскиро ро́до, Лэ́скирэ-писхарискирэ, тумэ́, Яково́скирэ чхавэ́, савэ́с Ёв выкэдыя́. 7Ёв исын Рай Дэвэ́л, амаро́ Дэвэ́л, Ёв сэндякирэ́ла пир сари́ пхув. 8Ёв усады (сак) рипирэла Пэ́скиро Зако́но, лава́, савэ́ Ёв припхэндя́ барэнгэ (тысёнцэнгэ) родэ́нгэ, 9савэ́ Ёв дыя́ Авраамо́скэ, и пал савэ́ Ёв дыя́ совла́х Исакоскэ, 10и Ёв чхудя́ зор пэ далэ́ лава́, сыр пэ стату́то Яково́скэ, сыр ве́чно Зако́но Израилёскэ, 11пхэни́: “Мэ да́ва Ханаано́скири пхув ту́кэ, сыр паш тумарэ́ мэкнэ́ миштыпна́стыр”, 12ке́ли лэн сыс на́бут, манушэ́н одо́й, древа́н на́бут, и ёнэ сыс чу́жа мануша́ одо́й. 13И тумэ́ джа́нас екхэ нацыятыр кэ яви́р, екхэ кралипнастыр кэ яви́р мануша́. 14Дэвэ́л на дыя́ во́ля никонэ́скэ тэ тасавэл. Дэвэ́л выракирэлас зоралэ́с кралье́н пал лэ́ндэ, 15ракири́: “На чилавэн Мирэн, Савэ́н Мэ помакхцём. На кэрэ́н чорипэ́н Мирэ́ пророкэнгэ.” 16И Ёв выкхардя бокх пэ пхув, Ёв хасякирдя́ кажно раслина, со дэ́ла маро́. 17Ёв бичхадя́ манушэ́с анги́л лэ́ндэ: Ёза (Иосифо) сыс бикиндло сыр писха́ри. 18Ёнэ дукхадэ Лэ́скирэ ґэра́ зандирьенца, а лэ́скиро ди гия́ дрэ састыра́, 19анги́л дава́ часо, сыр лэ́скиро лав явдя́: Ра́скирэ-Дэвлэ́скиро лав спробиндя лэс, 20Кра́ли бичхадя́ и вымэкця лэс пэ во́ля, чхудя́ лэс барыдырэ́са пир манушэ́ндэ и мэкця́ лэс пэ во́ля. 21Ёв кэрдя́ лэс ра́са пир лэ́скиро кхэр и барыдырэ́са пэ саро́, со сыс лэ́стэ, 22соб (кай) ёв тэ упхэнэл лэ́скирэ крали́скирэ сэмэнцэнгэ, сыр трэй лэ́скэ, и тэ сыклякирэ́л годыпнаскэ лэ́скирэ пхурэн. 23Израилё адя́кэ-паць явдя́ дро Еги́пто и Яково адя́кэ-паць притрадыя пэ Хамоскири пхув. 24И Дэвэ́л дыя́ бут чхавэ́н лэ́скирэ манушэ́нгэ, и Ёв кэрдя́ адя́кэ, со ёнэ ячнэ́ зоралэды́р пэ́скирэ вэргэ́ндыр. 25Ёв рискирдя́ Египто́скирэ-манушэ́нгирэ илэ зоралэ́с тэ на дэн паты́в Лэ́скирэ манушэ́нгэ, тэ отлыджанпэ фрэнтымаса Лэ́скирэ дынарье́нца. 26Дэвэ́л бичхадя́ Мойза́с, Пэ́скирэ писхари́с, и Аронос, конэ́с Ёв выкэдыя́, 27ёнэ сыкадэ Лэ́скирэ знаме́нии (ґертыка́) машки́р лэ́ндэ дро Еги́пто, и кэрдэ́ ди́вы пэ Хамоскири пхув. 28Дэвэ́л бичхадя́ калыпэ́н (цямлыпэ́н) и кэрдя́пэ калэс и ёнэ на кэрдэ́ бу́нто проти Лэ́скирэ лава́. 29Ёв пирикэрдя пани́ ратэ́са и хасякирдя́ лэ́нгирэ мачхэн. 30Пхув сыс пхэрды́ цапненца аж дрэ крали́скирэ шту́бы. 31Дэвэ́л дыя́ припхэныбэ́н и явнэ́ бут дукханэ матля (насекома) и дзындзарья (комары) пэ сари́ доя́ пхув. 32Ёв дыя́ градо заме́ст брышы́нд, бичхадя́ яг, со саро́ халас, пэ лэ́нгири пхув. 33Ёв адя́кэ-паць хасякирдя́ лэ́нгирэ-винаградоскирэ кашта́ и лэ́нгирэ инжыритка кашта́ и роспхарадя вэша́ пэ лэ́нгири пхув. 34Ёв пхэндя́ и явнэ́ пхакитка скочки (саранча) и бут скочкэнгирэ кирморэ, со нашты́ тэ пиригинэн. 35И ёнэ ханэ́ упрэ́ сарэ́ раслины пэ кадая́ пхув и поханэ сарэ́са дова́, со бия́ндыя пэ лэ́нгирэ фэ́лды. 36Дэвэ́л адя́кэ-паць мулякирдя́ сарэ́н пэрвонэ́ биятэ́н, савэ́ бия́ндынэ дро Еги́пто, ра́дыма и зор сэм΄якири. 37Тэ́ньци Ёв лыджия́ лэн криг рупэ́са и сувнака́са, и на сыс нико́н, саво́ тэ явэ́л бизорья́киро машки́р кадалэ́ екхэ́-чиба́кирэ / чанга́ (колены). 38Еги́пто сыс радо, со ёнэ гинэ́, пал-дова́ со пэ лэ́ндэ пыя́ дар Юдэндыр. 39Дэвэ́л росчхудя́ о́блоко тэ гаравэн лэн, и яг тэ явэ́л лоса́са (свэ́то чхонэстыр) лэ́нгэ раты́. 40Ёнэ помангнэ и Ёв дыя́ перепёлэн лэ́нгэ и чалякирдя чалэ́с лэн марэ́са болыбна́стыр. 41Ёв отчхакирдя́ бэ́рга-ска́ла, и паня́ дынэпэ тэ тхадэн, потхадынэ сыр рэка (лэнь) пир шукэ́ штэ́ты. 42Пал-дова́ со Ёв рипирдя лэ́скиро свэ́нто лав, Саво́ Ёв дыя́ Аврамоскэ, Лэ́скирэ дынари́скэ; 43и Ёв вылыджия́ Лэ́скирэ манушэ́н радыма́са, Лэ́скирэ выкэдынэ́ манушэ́н радыма́са; 44Ёв дыя́ лэ́нгэ пхувья́ Наюдытконэ́ нацые́ндыр и ёнэ дорэснэ́ сыр мэкно́ миштыпэ́н далэ́ манушэ́нгирэ обкэрдэ фэ́лды: 45соб (кай) ёнэ могинэ́нас тэ рикирэнпэ зоралэ́с кэ Лэ́скирэ стату́ты (уставы), и тэ рикирэнпэ кэ Лэ́скирэ зако́ны. Аллилуя Ра́скэ-Дэвлэ́скэ.
Currently Selected:
Псалм 105: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
