Притчы 3
3
Упхэныбэ́н Тэрнэ́ Манушэ́нгэ
1Миро чхава! На бистыр, сыр мэ сыклякирава тут, мэк тыро́ ило́ тэ ракхэ́л (тэ рикирэлпэ) кэ мирэ́ припхэныбэна́, 2пал-дова́ со буты́р дывэса́ тэ дживэ́с, длэнго джиибэ́н и рама́нё (миро) явэ́на упралэстыр дынэ́ ту́кэ. 3Мэк тэ на мэкэ́н тут лачхэ́-илы́ткима и чачипэ́н; пхандэ лэн трусця́л мэн, зачхин лэн пэ тыро́ ило́ сы́рбы пэ таблицы тырэ́ илэ́скирэ; 4и ту явэ́са дро́го и дрэ бари паты́в Дэвлэ́стэ и манушэ́ндэ. 5Патя зоралэ́с дрэ Растэ-Дэвлэ́стэ сарэ́ тырэ́ илэ́стыр, на древа́н допатя пэ́скирэ годыпнаскэ. 6Ри́пир пал Растэ-Дэвлэ́стэ, соб (кай) ту тэ на кэрэсас, и Ёв мамуякирэла (кэрэ́ла прямонэса) тыро́ дром. 7На сыка́в пэс годэдыр, сыр ту сан: дар Ра́стыр-Дэвлэ́стыр и дурьёв чорипна́стыр. 8Дава́ явэ́ла састыпэн тырэ́ масэнгэ лочакэ и драб тырэ́ кокалэнгэ. 9Дэ паты́в Ра́скэ-Дэвлэ́скэ сарэ́ тырэ́ миштыпна́стыр, и пэрвонэ́ барьякирдэндыр (плодэндыр), со ту́тэ выбарьёна; 10и тырэ́ шурны явэ́на пхэрдэ́ пхэрдэ́с и тырэ́ пресы явэ́на тэ пиричхувэнпэ моляса (виноса). 11Ми́ро чхава! На дыкх вучипна́стыр, ке́ли Рай Дэвэ́л пхарэ́с сыклякирэ́ла тут, адя́кэ-паць и на холясов зоралэ́с, сыр Ёв сыклякирэ́ла дукханэс пал доша: 12пал-дова́ со Рай Дэвэ́л сыклякирэ́ла дукханэс пал доша (промэкибэна) кодолэ́с, кон исын дро́го Лэ́скэ, адя́кэ-паць сы́рбы дад чхавэ́с, савэ́скэ Ёв зоралэ́с радынэ́лапэ. 13Бахтало́ исын кодова́ ману́ш, саво́ яця́ годо́, и ману́ш, кон яця́ бут тэ ґалёл. 14Дава́ исын фэдэды́р сыр тэ дорэсэс руп, дава́ исын кофиткэдыр (прибыльнэдыр) сувнака́стыр. 15Годыпэ́н исын дрогэдыр куч барэндыр, и сарэ́ кучипэна, со ту кэ исын дро́га, нанэ ра́вна (шэра́) годыпнаскэ. 16Годыпэ́н рикирэ́ла длэнга бэрша́ дро чачо́ васт, а барвалыпэ́н и паты́в исын дро лэ́скиро зэ́рво (ле́во) васт. 17Годыпнаскирэ дрома́ исын лачхэ́, а лэ́нгирэ дрома́ дэ́на рама́нё (миро) ту́кэ. 18Годыпэ́н исын сы́рбы джиибна́скири пхабэлын кодолэ́скэ, кон ха́ла лэ́скирэ пхаба́: бахтало́ исын кодова́ ману́ш, саво́ рикирэ́лапэ кэ дава́ кашт. 19Рай Дэвэ́л Пэ́скирэ годыпнаса создыя́ пхув, Ёв Пэ́скирэ ґалыибнаса создыя́ болыбэ́н. 20Лэ́скирэ джиныбнастыр хор ґанынга́ откэрдэпэ и болыбэ́н почхудя пахлыняса (росаса). 21Ми́ро чхаво́! На мэк лэн, соб (кай) тэ джа́н криг тырэ́ якхэ́ндыр: ракх састо́ годыпэ́н и хор розлыибэн: 22и ёнэ дэ́на джиибэ́н ту́кэ, и ёнэ явэ́на тэ гожакирэн тыри́ мэн. 23Тэды ту джа́са пэ́скирэ дромэ́са бидаракиро, и тыри́ ґэро́й на обштавэлапэ. 24Сыр ту пасёса тэ совэс, ту на явэ́са тэ дарэс, сыр ту засовэса, тыро́ соибэн явэ́ла гудло́. 25На дар трашаибнастыр кэ мэрибэ́н, ци пхарипнастыр, со явэ́ла пэ фуе́ манушэ́ндэ. 26Пал-дова́ со дрэ Растэ-Дэвлэ́стэ явэ́ла тыро́ зорало́ патяибэ́н, и Ёв явэ́ла тэ ракхэ́л тыри́ ґэро́й тэ на обштавэлпэ. 27На дэпэ палэ тэ кэрэ́с лачхипэ́н кодолэ́нгэ, савэ́нгэ трэй тэ кэрэ́с, ко́ли дава́ исын пир зор тырэ́ вастэскэ. 28На пхэн тырэ́ пашатунэ́ манушэ́скэ: “Джа́, тэ́ньчи, рисёв палэ. Атася́ мэ да́ва ту́кэ, ко́ли ту́тэ исын дава́.” 29На придумин чорипэ́н пэ тырэ́ пашатунэстэ, пал-дова́ со ёв дживэ́ла би дара́киро пашы́л ту́тэ. 30На кошпэ манушэ́са ни палсо́, ко́ли ёв на кэрдя́ чорипэ́н (бэдыпэн) ту́кэ. 31На зэвлынэ нахратонэ манушэ́скэ, на выкэдэ пэ́скэ вари-со лэ́скирэ дромэ́стыр. 32Пал-дова́ со ману́ш, кон джал криг чачунэ́ дромэ́стыр, явэ́ла джунгало́ (брыдинэла) Ра́скэ-Дэвлэ́скэ, а лэ́скиро гарадо́ кхэтаныпэн исын чачунэ́ манушэ́нца. 33Рай Дэвэ́л прокошэла кхэр, кай исын фуй ману́ш, нэ Ёв бахтякирэ́ла штэ́то, кай чачипна́скиро ману́ш дживэ́ла. 34Ёв салапэ холямэс одолэ́ндыр, кон салапэ холямэс явирэндыр, нэ Ёв дэ́ла бахталыпэ́н одолэ́нгэ, савэ́ исын на пхутькирдэ́. 35Годэ́ мануша́ дорэсэ́на (долэна) сла́ва сыр миштыпэ́н, нэ ладж явэ́ла тэ учхакирэл дылынэн.
Currently Selected:
Притчы 3: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
