Притчы 16
16
Соломоно́скирэ Годыпэна
1Ману́ш придуминэла пэ́скирэ илэ́са, нэ дова́ со ёв Ра́стыр-Дэвлэ́стыр пэ дава́ отпхэнэлапэ чиба́са (чибьяса). 2Дрэ манушэ́скирэ якха́ сарэ́ лэ́скирэ дрома́ исын бидошэнгирэ, нэ Рай Дэвэ́л роскэдэла (важынэла) тумаро́ ду́хо (фа́но). 3Допатя Тыри́ буты́ Ра́скэ-Дэвлэ́скэ, и тырэ́ ду́мы рисёна дро чачипэ́н. 4Рай Дэвэ́л кэрдя́ саро́ ваш Пэ́скиро задуминыбэн; и, аж фуе́ манушэ́с ваш хасибны́тко дывэ́с. 5Кажно (сва́ко) пхутькирдо илэ́са ману́ш исын джунгало́ (брыдинэла) Ра́скэ-Дэвлэ́скэ, мэк ёнэ исын дро екх васт екх екхэ́са, мэ совлахава: ние́кх на нашэла бибангипнаскиро. 6Лачхэ́-илыткимаса и чачипна́са отмэкэлапэ банг пал чорипэ́н, кон дарэ́ла Дэвлэ́стыр, кодова́ отджала (дурьёла) бибахтятыр (чорорипнастыр). 7Ко́ли манушэ́скирэ дрома́ исын лачхэ́ Ра́скэ-Дэвлэ́скэ, Ёв кэрэ́ла адя́кэ, со аж лэ́скирэ вэ́рги исын дро рама́нё лэ́са. 8Фэды́р тэ явэ́л на́бут, нэ дорэсно чачипна́са, сыр тэ явэ́л баро́ ко́фо, нэ начачипнаса. 9Манушэ́скиро ило́ обдуминэла пэ́скиро дром, нэ Рай Дэвэ́л сыкавэ́ла (мамуякирэла) лэ́скиро дром. 10Крали́скирэ ушта́ исын дэвлякирдэ, лэ́скирэ москэ нашты́ тэ обджал чачипэ́н (тэ хохавэ́л) пэ сэ́ндо. 11Чачунэ́ ублады́тка (весы) и ублады́тка чашы исын Ра́стыр-Дэвлэ́стыр; сарэ́ тырдынэ (гири) дро гоно́ исын Лэ́скиро кэрибэн. 12Кральенгэ исын стэтка (древа́н джунгалэ́) кодолэ́, кон кэрэ́ла чорипэ́н, пал-дова́ со троно рикирлапэ чачипна́са. 13Чачунэ́ ушта́ зоралэ́с радынэна крали́с, и лэ́скэ исын дро́го одова́, кон ракирэ́ла чачипэ́н. 14Крали́скиро холякирибэ́н сыкавэ́ла пэ мэрибэ́н, нэ годо́ ману́ш ковлякирэла крали́с. 15Сыр крали́скиро муй зяинэла, то джиибэ́н дэ́ла сарэ́нгэ, и лэ́скири ла́ска исын сыр о́блоко вэснакирэ брышындэса. 16Пэ бут фэды́р исын сувнака́стыр тэ ячэс годэдыр, и тэ ячэс барэ́-годякирэса исын фэды́р рупэ́стыр. 17Чачуно́ дром ваш дэвлытконэнгэ исын дрэ дова́, соб (кай) тэ дурьён чорипна́стыр. Кон рикирлапэ кэ пэ́скиро [ракхэ́ла-р.с.] дром, одова́ ракхэ́ла пэ́скиро ду́хо (фа́но). 18Пхутькирибэ́н исын усады (сак) кэ хасибэ́н, ману́ш, саво́ задэлапэ, сыг пэрэ́ла. 19Фэды́р исын тэ явэс напхутькирдэ духо́са машки́р кандунэ / простонэ манушэ́ндэ, сыр тэ роскэрэн чордо дорэсыбэ́н машки́р пхутькирдэ́ манушэ́нца. 20Кон прилэ́ла лав годя́са, одова́ латхэ́ла лачхипэ́н, и кон рисёла кэ Рай Дэвэ́л тэ зракхэлпэ, одова́ исын бахтало́. 21Конэ́стэ исын годо́ ило́, кодова́ кхарэ́лапэ барэ́-годя́киро, гудлэ́ ушта́ барьякирэна сыклякирибэ́н. 22Конэ́стэ исын годыпэ́н, дава́ исын джиибна́скири ґаны́нг (источнико); нэ тэ сыклякирэс дукханэс пал доша дылынэн-дава́ исын дылныпэ́н. 23Годэ́-манушэ́скиро ило́ сыклякирэ́ла лэс, со тэ ракирэ́л, и дэ́ла буты́р джиибэ́н лэ́скирэ уштэнгэ. 24Куч лава́ исын сыр авги́н (мэда): гудло́ ваш ди, и састыпэн ваш кокалы́. 25Исын дром, сыр здэлапэ манушэ́скэ, соб (кай) ёв исын чачуно́, нэ ёв ладжала кэ мэрибэ́н. 26Ману́ш, саво́ кэрэ́ла буты́ пхарэ́с, кэрэ́ла буты́ пхарэ́с ваш пэ́скэ, пал-дова́ со бокхало муй зачхувэла лэс. 27Бидэвлыткари [фрэнтари-р.с.] ґанавэла биба́хт, и лэ́скирэ ушта́ исын сы́рбы яг, сави́ хачкирэ́ла. 28Начачуно ману́ш розлыджала чинга́рд, кон гундяринэла (шэпчынэла), одова́ роскэрэла фэдыршонэ малэн. 29Нахрато ману́ш притырдэла кэ пэ лэ́скирэ пашатунэс, и лыджа́ла лэс налачхэ́ дромэ́са. 30Кон марэла якхаса (пришчуринэ́лапэ), одова́ придуминэла чорипэ́н; кон дандырэла пэ́скирэ ушта́, одова́ кэрэ́ла чорипэ́н. 31Сыво шэро́ исын сы́рбы крали́скири стадык (коро́на) барипнаса, саво́ исын пэ дром кэ чачипэ́н. 32Кон поволинькэс (ле́нтэс) холясо́ла, исын фэды́р зоралэ́ манушэ́стыр, и одова́, кон рикирэ́ла зор пэ пэ́скиро ду́хо (фа́но), исын фэды́р одолэ́стыр, саво́ лэ́ла фо́ро. 33Жрэбиё чхурдэлапэ дрэ ангаля (полы), нэ кажно мо́ло саро́ кэрэ́лапэ Дэвлэ́скирэ годя́са.
Currently Selected:
Притчы 16: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
