Ио́во 38
38
Дэвэ́л Ракирэ́ла Иовоса
1И отпхэндя́ Рай Дэвэ́л Иовоскэ рискирибна́скирэ балвалятыр (бурятыр) лавэ́нца: 2“Кон исын кадава́, кон калякирэла Мирэ́ задумы нагодьварэ лавэ́нца? 3Подпхандэпэ и яв скэдыно́, Ио́во, сыр мурш, и Мэ ява́ва тэ пхучав ту́тыр, ту явэ́са тэ отпхэнэс Ма́нгэ. 4Кай са́нас ту, сыр мэ зачхувавас пхув? Пхэн Ма́нгэ, ко́ли ту сан барэ́-годя́киро? 5Кон припхэндя́ барипэ́н пхувьякэ? Ци джинэ́са ту дава́? И кон роздиндкирдя пэ ла́тэ шэло тэ меринэл? 6Кэ со пхувья́киро фунда́менто причхудо зорья́са? И кон чхудя́ ла́киро вэнглытко бар; 7ке́ли багандлэ кхэтанэ́ чэргэня́ пэ зло́ко (пэ ра́нко), и сарэ́ Дэвлэ́скирэ чхавэ́ дэ́нас го́дла радыма́тыр? 8Ци кон запхандя мо́рё (дэрья́в) вударэнца, ке́ли ёв пхарадёлас барэ́ панингэса, сы́рбы ёв джа́лас яври́ лочатыр; 9ке́ли мэ кэрдём облокэндыр лэ́скэ и́ди и пхэрдэ́ цёмныматыр патькирибнаскирэ пхэрнэ (пелёнки). 10Ке́ли мэ чхудём мири́ ме́ра морёскэ, и ке́ли мэ чхудём штабы и вудара́; 11ке́ли мэ пхэндём: ‘Фэ́ни адя́кэ дур ту́кэ сашты́ тэ джас, нэ, на дурэды́р, и ада́й тырэ́ пхутькирдэ́ валны исын бангэ́ тэ тэрдён.’ 12Ци припхэнэсас ту злокоскэ (ранкоскэ), сыр ту лыян тэ дживэ́с, и ци кэрэсас ту адя́кэ, соб (кай) ра́нко тэ джинэ́л пэ́скиро штэ́то, 13соб (кай) злокоскиро дуд тэ доджал кэ пхувья́кирэ яго́ры, и, соб (кай) фуе́ манушэ́н тэ тринскирэн ла́тыр, 14соб (кай) ёй, пхув, тэ рисёл сыр ґлэя тэл якхи́тко (печать), и соб (кай) ёй тэ парувэл пэ́скири мастин (цвято) сыр и́дя, 15тэ пририкирэл дуд анги́л фуе́ манушэ́ндэ, и соб (кай) тэ пхагирэл ґаздыно́ васт. 16Ци са́нас ту адя́кэ дур, кай морёскирэ (дэрьявэ́скирэ) ґанингорэ лэнапэ? Ци псирдян ту пир морёскиро (дэрьявэ́скиро) дугно тэ розґалёс хорипэ́н? 17Ци псирадяпэ анги́л ту́тэ мэрибнаскири по́рта? Ци дыкхця́н ту вуда́р кэ мэрибнаскири зэр (тень)? 18Ци ґалыян ту хор пхувья́киро буґлыпэ́н? Пхэн зоралэ́с Ма́нгэ, ко́ли ту джинэ́са саро́ дава́? 19Кай исын дром кэ штэ́то, каты́р дуд джа́ла? И кай цямлыпэ́н ячэ́лапэ, 20соб (кай) ту могинэсас тэ лыджас лэн кэ лэ́нгирэ кустыка (границы), и тэ бичхавэс лэн кэ лэ́нгирэ кхэра́? 21Ци джинэ́са ту дава́, пал-дова́ со тэды ту ужэ са́нас пэ свэ́то, ци пал-дова́ со ту́тэ исын барэ́ бэрша́ пир дывэса́? 22Ци са́нас ту вари-ке́ли одо́й, кай исын пиралы́ ваш ив? Ци дыкхця́н ту пиралы́ ваш градо, 23со Мэ ракхцём ваш дава́ часо (цы́ро); сыр явэ́ла пхарипэ́н, сыр явэ́на дывэса́ ваш марибэ́н и война? 24Савэ дромэ́са дуд (свэ́то) роскэрэлапэ пэ паша́, ци балва́л вастоко́стыр (бэльвэлитконэстыр) розурнялапэ пир пхув? 25Кон кэрэ́ла дром барэ́ панингэскэ тэ чхувэлпэ дурэды́р, ци кон сыкадя́ дром ваш громоскири блискавица? 26Ци кон кэрэ́ла адя́кэ, соб (кай) тэ джал брышы́нд пэ пхув, кай нико́н нанэ, пэ чхучи́ пхув, кай нанэ манушэ́с, 27соб (кай) тэ панякирэл кэ чалыпэн наобдживдлэ штэ́ты, и тэ кэрэ́л адя́кэ, соб (кай) чаринки тэ барьён кэ ґэнсто чар. 28Ци исын брышындэскиро дад? Ци кон яндя́ пэ свэ́то пахлынякирэ (росакирэ) капки? 29Дрэ конэ́скири лоч (чрево) латхэлапэ лёдо? И кон яндя́ мразо пэ свэ́то? 30Паня́ кэрэ́напэ сы́рбы бара́, и саро́ панескиро буґлыпэ́н, кай исын хор тэла́л, мразёла дро екх кова? 31Ци могинэ́са ту тэ пхандэс чэргэнгиро рядо, со кхарэ́лапэ Плеяды, и ци могинэ́са ту тэ роспхандэс вольнэдыр Орионоскирэ-чэргэненгири кусты́к? 32Ци могинэ́са ту тэ лыджас анги́л чэргэненгиро зодиако дро пэ́скиро часо (цы́ро), и ци могинэ́са ту тэ лыджас ричыха ричорэнца? 33Ци джинэ́са ту болыбна́скирэ–статутно упхэныбэ́н? Ци могинэ́са ту тэ чхувэ́с лэс тэ раинэл пэ пхув? 34Ци могинэ́са ту тэ ґаздэс пэ́скири зан кэ болыбэ́н, соб (кай) бут – бут паня́ тэ чхакирэн тут? 35Ци дэ́са ра́да ту тэ бичхавэс блискави́цы, соб (кай) ёнэ тэ джа́н, и соб (кай) ёнэ тэ пхэнэ́н ту́кэ: “Акэ, амэ сам.” 36Кон дыя́ годыпэ́н манушэ́скирэ годякэ? И кон дыя́ годьварипэн илэскэ. 37Кон дэ́ла ра́да тэ погинэл о́блоки пэ́скирэ годыпнаса? Ци, кон дэ́ла ра́да, соб (кай) о́блоки тэ вычхувэн паня́ болыбна́стыр сы́рбы гонэстыр, 38ке́ли пра́хо кэрдя́пэ дрэ тварда комки, а пхувья́кирэ котэра́ липниндлэпэ кхэтанэ́. 39Ци ту, Ио́во, старэса ваш шчэрицакэ (львицакэ), соб (кай) ёй тэ рискирэ́л вари-со дандэнца, ци ту дэ́са чалэ́с хабэ́н тэрнэ́ шчэрорэнгэ? 40ке́ли ёнэ подчорьёна дрэ пэ́скирэ вэнты (логовы), ци подракхэна, пасиндой, вари-со дрэ лэ́нгирэ чораханэ штэ́ты (засады)? 41Кон дорэсэ́ла хабэ́н коракоскэ (вороноскэ), ке́ли лэ́скирэ чхавриня (птенцы) годлэна кэ Дэвэ́л и псирэ́на трусця́л пир дова́, со лэ́ндэ нанэ мас.
Currently Selected:
Ио́во 38: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
