Psalmy 78
78
[77-r.s.] 1Asafoskiro Sykliakiribén.
O, miré manušále! Šunén miro sykliakiribén, pričhuvén kaná ke lavá miré. 2Me otphandava miré uštá te phenáv priphenybén (pritča) tuménge; me javáva te rakiráv šerepharibnytka (zagadki) ĥalyibnasa, so rakirdé ĥará, 3savé ame šundiám, i so ame džinása, i so amaré dadá rosphendlé aménge. 4Dalé lavá ame na garavasa léngire čhavéndyr, sob (kaj) te piriphenas rodénge, so javéna angíl, savé javéna te šarén Ras-Devlés, 5pal léskiro zoralypén i Léskire baré dívna réndy, so Jov kerdiá. 6Pal-dová so Jov čhudiá Léskiro dophenybén dro Izrailjo, dyjá Zakóno Jakovóske, pal savó Jov priphendiá amaré dadénge, sob (kaj) jone te sykliakirén léngire čhavén; sob (kaj) ródo, so javéla angíl, te moginel te džinél, i, sob (kaj) čhavé, savé angíl bijandjona, adiáke-pac' te rosphenén Zakóno péskre čhavénge, 7sob (kaj) jone zoralés te užakiren lačhipén Devléstyr, i te na bistren Devléskire butiá, a te kandén Léskire priphenybená. 8Mek te na javén jone syr léngire dadá, savengiro ródo sys nakanduno i buntiaritko, i konéskiro ródo na sarésa riskirdiá Peskro iló Devléske, i konéskiro dúho (fáno) na sys patiaibnýtko Devléske. 9Jefriemóskire čhavé, savénde sys dre vastá luki, risiné pale dro maribnaskiro dyvés. 10Jone na kandyné Devléskiro Zakóno i otphendlepe te dživén pir Léskiro Zakóno; 11i jone bistyrde pal dová, so Jov kerdiá i Léskire baré dívy, savé Jov sykadiá lénge. 12Angíl léngire-dadengíre jakhá Jov kerdiá dívy pir Jegiptóskiri phuv, pe Coanoskiri félda. 13Jov roskerdiá pe duj pašá mórjo (derjáv) i pirilydžija len pir paní. Jov kerdiá adiáke, so paniá terdiné syr vánta. 14I Jov lydžijá len bolybnáskire oblokosa dyvesé, a jagakire dudesa (svetosa) ratý. 15Jov roskerdiá pe duj pašá skaly pe čhučí phuv i paniakirdia len čalés léndyr, syr baré paningendyr; 16i Jov kerdiá adiáke, so sygna paniá thadyne skalendyr, i so paniá thadyne sýges syr baré paningá. 17Ne jone saroiekh butýr kerdé gréhi proti Léste i ĥazdenas búnto pe čhučí phuv pe Naj Vučedyreskireste, 18i jone propatiakirenas Devlés dro péskiro iló, kiéli jone mangné xabén pir péskiro di; 19i jone rakirdé pe Devléste, phení: “Ci déla ráda Devél te kerél skamínd pe čhučí phuv?” 20Dykhén! Jov pekadiá dre skála i paniá dynepe te thaden i baré paningá pherdiakirde saró. Ci déla ráda Jov adiáke-pac' te del maró? Ci doreséla Jov mas Péskire manušénge? 21Paldavá Raj Devél šundiá davá, i Jov drieván xoliásyja, Léskiri xolý roshačija pe Izrailjoskire manušénde i adiáke-pac' xoliakiribén ĥazdyjápe pe lénde, 22so jone na patiandyné dre Devléste i na rikirde nadiéia, so Jov déla vast lénge. 23Ne Jov priphendiá oblokenge, so isyn uprál, i Jov psiradia (otkerdia) bolybnáskire vudará, 24i Jov čhudiá syr bryšýnd pe lénde (manna) te xan i Jov dyjá lénge bolybnáskiro giv. 25Manušá xanas Jangoléngiro xabén: Jov bičhadiá lénge xabén čalés. 26Jov kerdiá te phurdel vastokitko balvál te phurdel dro bolybén i lydžijá angle te phurdel balvál zervone (lievone) rigátyr, 27I Jov kerdiá te perél mas pe lénde syr práho i čiriklen phakenca, syr práho pe morjoskiro (derjavéskiro) brégo. 28I Jov kerdiá adiáke, so jone pyné maškír péskiro taboro (lod), trusciál péskire šátry; 29i jone xané i čalyne pherdés i Jov dyjá lénge dová, so jone bitukoskiro kamlé. 30Jone na giné krig péskire xabnastyr, so sys lénde bitukoskiro, léngiro xabén usá sys dre léngire muiá, 31kiéli Devléskiri xolý javdiá pe lénde i muliakirdiá naj thuledyronen léndyr i, ake, zaradia vykedyné manušén Izrailjostyr. 32Ne na dykhí pe davá, jone ŭsa kerdé gréhi, i jone na patiandyné dre Léskire baré dívna butiá, 33paldavá Jov i domekcia, so léngire dyvesá sys syr balvaliakiro phurdypen, a léngire beršá džánas dre dar ke meribén. 34Kiéli Jov zamarelas len, tedy jone rodenas Les, i jone riskirenas péskiro iló i zoralés rodenas Devlés, 35i jone ripirenas nevéstyr, so Devél isyn léngiri skála, i so Naj Vučedyreskiro Devél isyn Odová, Kon zrakhéla len. 36Jone šarenas Les na iléstyr péskire mujenca, i léngire čibá xohavenas Léske, 37a léngiro iló na zoralés patialas dre Léste i jone na sys patiaibnytka angíl Léskiro zavieto. 38Ne Jov isyn lačhé-iléskiro: Jov otmekciá čoripén i na phagirdiá len. But móly Jov riskirelas krig Péskiri xolý, i Jov na džangavelas Péskiri bari xolyn. 39Pal-dová so Jov ripirdia, so jone sys féni (tóka) manušýtko loč (plot'), saví isyn na viéčno, sýrby balvaliakiro phurdypen, so džála krig i na risjola pale. 40Syr but móly jone na kandenas Les pe čhučí phuv, jone xoliakirenas Les pe bimanušengiro štéto. 41I jone nevéstyr i nevéstyr risjonas pale, propatiakirenas Devlés i dukhavenas Sventoné Devlés Izrailjostyr. 42Jone na ripirde Léskiro vast dro dová dyvés, kiéli Jov rakhciá len vergostyr, savó tasadia len, 43syr Jov sykadiá Péskire znamiénii (ĥiertyká) dro Jegípto, syr kerdiá Péskire dívy pe Coanoskire féldy; 44i pirikerdia léngire réki (leniá) i rekicy dro rat, sob (kaj) jone na moginénas te p'jen. 45Jov bičhadiá dukhane matlien (nasiekomonen) te xan léngire masá i capnien (žamben), savé xasiakirenas len; 46Jov adiáke-pac' otdyjá léngire-givengiro umaloto raupénge (gusinicénge) te xan, a léngire butiá skočkenge; 47Jov xasiakirdiá léngire vinagrady (drakhá) ĥradosa i léngire sikamorytka drevy mrazosa. 48Jov otdyjá léngire murdalén tel ĥrado i léngire ĥurty tel baré bliskavícy 49Jov bičhadiá pe lénde sýrby jag Péskire xoliátyr, xoliakiribén, xoliakiri, zor i pharipén, kiéli meribnaskire Jangóly pyné pe lénde. 50Jov vymekcia Péskiri xolý, Jov na vyrakhelas léngire dijá meribnástyr, a Jov otdyjá len meribnytkone fransenge (morovóske). 51I Jov muliakirdiá kažnoné pervoné bijatós dro Jegípto, pervoné rodoskires, savéstyr lélape zor pe Xamoskire šátry, 52I Jov kerdiá, so Léskire manušá giné angíl syr bakré i Jov lydžijá len pir čhučí phuv syr ĥurto; 53i Jov lydžijá len bidarakires, jone na strahadjonas, a mórjo (derjáv) čhakirdia upralestyr léngire vergén. 54I Jov dolydžija len ke kustýka (ke granícy) Péskire Sventoné-Phuvjakiri, ke bérga, so léskiro čačó vast doresciá; 55I Jov tradyjá krig Najudýtka nácyi angíl lénde, i Jov roskerdiá pe pašá phuv maškír lénde, syr meknó mištypén pir čerta, i Jov kerdiá, sob (kaj) Izrailjoskire ródy te dživén pe péskire šátry. 56Ne jone propatiakirenas Naj Vučedyreskire Devlés, prezentynenas Les i jone na rikirenaspe ke Léskire dophenybena. 57I jone dynepe pale i sys napatiaibnytka syr léngire dadá: jone vyrisjonas syr bangó lúko. 58I jone xoliakirde Les péskire štetenca pe bérgicy, kaj jone dénas patýv i jone prezentynenas (dražninenas) Les léngire vyčingirde idolenca. 59Devél šundiá davá, Jov xoliásyja, i Jov tradyjá krig Izrailjo dur Péstyr: 60Jov mekciá Péskiro Štéto Silómo, šátra, kaj Jov dživdiá maškír manušénde, 61I Jov otdyjá Péskiro zoralypén dro pliéno i Péskiri sláva dre vergéngire vastá; 62I Jov adiáke-pac' otdyjá tel kurtála Léskire manušén i sys xoliamó pe Léskire čhavénde: 63iag shaia Léskire-tyrne manušén i Léskire patyvalé džuvlién na bagandle bjavitka giliá. 64Léngire rašaja xasjonas kurtalátyr, léngire pivlia (udovy) na mogindlé te rovén. 65Tén'ci Raj Devél džangadyja sýrby soibnastyr, sýrby kodová zoralypnaskiro manúš, savó radynélape ĥodlasa moliátyr (vinostyr); 66I Jov tradyjá krig Péskire vergén, Jov čhudiá len pe ladž, so nijékhvar na končynelape. 67I Jov otphendiape Jozáskire šatratyr, i Jov na vykedyjá Jefriemoskiro ródo, 68ne Jov vykedyjá Judáskiro ródo, Sionóskiri bérga, saví Jov vykedyjá Péske; 69I Jov ĥazdyjá Péskiro Svénto Štéto vučés syr bérgi, syr phuv, saví Jov začhudia pe saré viéki. 70I Jov vykedyjá Davidós, Péskire pisharís, i Jov lyjá les bakréngire gredatyr (dvorostyr): 71Jov lyjá les bakréndyr, Savó dénas ciuci (kolýn) tyknorenge, Jov lyjá les te čaravel Péskire manušén, Jakovoskiren i Izrailjoskiren, Péskire čhavengiren. 72I Jov čaliakirdia len sarén Péskire iléstyr, i lydžijá len Péskire god'varé vastésa.
Currently Selected:
Psalmy 78: ROMBALTR
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
