1 Korinfianenge 16
16
Pal Khangirjákire Lové vaš Javire Patiaibnaskirende
1Pal dová, syr te keden lové vaš sventonenge, kerén adiáke, syr me uphendjom pir Galatijakire khangirja. 2Dro pérvo kurkitko dyvés mek kažno tuméndyr te otčhuvel dre rig i te rakhél adákicy lové, pe kicý léskiro mištypén vybarjola, sob (kaj) tumé te na keden lové, kiéli me javáva ke tumé. 3I kiéli me javáva, tedy kodolé manušén, savén tumé vykedyné, me bičhaváva lylenca te lydžán tumaré lové, so isyn skedyné pir tumarí lačhé-ilýtkima dro Jerusalimo: 4i kóli davá javéla kuč, sob (kaj) adiáke-pac' i mánge te javav, tedy jone moginéna te džán mánca.
Pavliskire Mysli
5Ne me javáva ke tumé, kiéli me prodžava pir Makiedonija; pal-dová so me džáva pir Makiedonija. 6Ne mánge zdelape, so me javáva te dživáva nábut (kutý) ke tumé, ci až jačavpe pe ivant (zima), i tedy tumé prolydžana man, karik mánge trej te džav. 7Pal-dová so me na kamám te dykhavpe tuménca sýrby pir drom, pal-dová so me užakirava lačhipén te jačavpe ke tumé pe vari-savó časo, kóli javéla pe davá Ráskire-Devléskiri vólia. 8Ne me jačavpe ke Efieso ke Duhoskiro svénko. 9Pal-dová so baró i buglo vudár sýrby psiradyja vaš mirí butý, a isyn but vérgi. 10Kóli Xima (Timofiejo) javéla ke tumé, kerén, syr isyn fedýr, sob (kaj) jov te javél bi darákiro ke tumé, pal-dová so jov keréla butý vaš Ráske-Devléske, adiáke-pac', syr i me. 11Mek nikón te na dykhél pe léste baré minasa, a bičhaven les ramanjosa, sob (kaj) jov te javél ke me; pal-dová so me užakirava les pšalénca. 12Ĥáda, pal pšaléste Apolososte, me but mangavas les te džal pšalénca ke tumé, ne jov iščo (inké) nane skedynó dro dúho (fáno) te džal, a javéla tedy, kiéli léste javéla lačhí vakancyja (slučajo).
Palatuné Lavá
13Rakhénpe, rikirén patiaibén; javén murškané, javén zoralé. 14Mek saró te kerélpe tuménde laskása i patyvása. 15Me mangáva tumen, pšalále, tumé ž džinéna Stehfanoskiri sém'ia (irí), savé isyn pérva patiaibnaskire dre Ahaiia, i so jone otdyné pes, sob (kaj) te dynarinén sventonenge; 16sob (kaj) tumé te kandén len i kažnoné manušés léndyr, kon lénca keréla butý i dynarinela. 17Me radynavpe, so javné Stiehvano, Fartunato i Ahaiko; pal-dová so jone sýrby parude tumen, kiéli na sys tumen. 18Pal-dová so jone podrikirde syr miro adiáke-pac' i tumaró dúho (fáno): kutiakiren (patyvakiren) kadasaven. 19Piridena “ramánjo” tuménge khangirjákire skedyibena Lieijatyr. Akila i Priskila piridena “ramánjo” saré iléstyr Rása-Devlésa léngire kheritkoné skedyibnasa. 20Saré pšála piridena “ramánjo” tuménge. Piridén “ramánjo” jekh jekhéske sventoné čamudypnasa. 21Me čhindjom péskire vastésa “ramánjo” tuménge mándyr. 22Kóli vari-kon na rikiréla syr Drógima Ras-Devlés dro péskiro iló, Isusós Xristosós, te javél léske Anafiema (Mara-Tafa). 23Mek bahtalypén amaré Ráskire-Devléskire, Isusóskire Xristosóskiro te javél tuménca. 24Mek mirí patýv ke javír manušá pir Xristosóste Isusóste te javél sarénca tuménca. Amín'.
Currently Selected:
1 Korinfianenge 16: ROMBALTR
Highlight
Share
Copy
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
