Roma 12

1ANYIN a wale, hnyat me lakeiny lö, inya oge me ûjongi öbun ûnyi hnyi ibetengiö anyin Khong, möbun e he ka ham je unyibun me hnân hut ae möt, me kap, me so ka Khong, wale hanymöbun ae ûcû. 2Ke ca he ka tha hwakecibun me hmeledrany: ke so he ka wiʼ öbun hnen ohâtâ je hnyekubun, me me khanʼ öbun weny Khong ae so, me hnân osenyinâ, me wisa.

3Anyin a inya oge me ha köbun hia thithö, hnen betenge baû adre ham könya, ka habe, ca he ke at ka ûnykûme ogânâ e bi hon ûnyi ae ûcû he ka ûnykûme, ke ûnykûme ûhnyûkongoâ thibi, hoton hna khenâ ka ke at me ke at tulutiny labageju hnen Khong. 4Anyin ae hu gata je outhunyin ae se hia hnyi unyin a khaca, ke ca tha hanymen hia bi je ong outhunyin: 5helâe minya öta, at se hia, khaca thibi unyin unyi Keriso, ke je ong outhunyin öta ke at ka ke at. 6E hu but gata je hna ham bâûâ ae ve bongon bi hoton ibetengiö baû adre ham köta, a ne hnân operofeta, e so e ânyâ hoton kahmen labageju: 7ame ne dikona, ânyâ thö hanymen dikona; ame ne at ûne, ûne thö; 8ame ne at khet, khetâ thö: ke a ne at ame ham, ham hnathoâ thö; at ame musi, musi wia ju, at ame betenge, betenge thö me senyin. 9E so betenge ke ba thoi hnyin. Ikikiâ thö ûnyi ae kong; kece ju ka ûnyi ae so. 10Ibetengiököu ju öbun ge ibetengiö anyin liamekeiny; bebân he ka ogânâ ke at me ke at; 11hnyi huliwa wia ke ca sënyin bi; hwege ju hnyi oûnykûmibun; athnyabainy dö Than: 12senyin hnyi gejon; hokhnyokâ ju vec; labö hic bala; 13haomjehen ju tavat ae kap hnyi hnödra hna theduoc; khenen ju he ka imetenyimwi me ta je atkanyua. 14Hahnahici ödra ju waleji adre me oveci öbun; hahnahicâ, ke ca hangâ bi. 15Tha senyin dö me tavat adre me senyin; tha tenge me tavat adre me tenge. 16Tha hnyokköuâ juöbun. Ca ûnykûme bi ta je ûnyi ae görany, ke ca höcö he ka vheno ta je ûnyi ae hnyikânâ. Ca bemetâ bi öbun hnyi je ûnykûmenöbun. 17Ca bi hwaban bi monu anyin ke at ge monu. Penapena thö ta je ûnyi ae ûcû hnyi hnyimakan tavat hia. 18Laba ûsoköu me tavat hia a ne khanʼ öbun. 19Je oûnykûmik lö, ca he öbun ka bi hwaban monu, ke nom ju ka at ae tren hmonyin: anyin adre hia but sihnalimen, ka habe, Haingen Than ame ha, Hamök he ka bi hwaban monu, oge me he bi nya ka bi hwaban. 20Ke a ne mekihnânem iwahnaihmiony möu, hân ju; ame ne beic, habelen: anyin a u je ne ânyâ e, me u me ûkhöûnâ je walep ae möt hon ban bi. 21Ca he ka ngʼ öbun ge monu, ke ngâ but monu ge so.

Currently Selected:

Roma 12: IAAI

Highlight

Copy