Roma 11

1ANYIN a wale, inya oge me ha, ka habe, Hawa, a hia but Khong degec lakeiny? Ohe. Anyin a inya at Isaraela minya, ûnyi hnyi mâtrâni Aberahama, ke hanen tribu Beniamina. 2A ca degec bi Khong lakeiny waleji e ame wâhmakhmeto ehac. Ke ca khanʼ öbun hna ha hnen tusi ga Elia? waleji e ame khöû ka Khong ge at Isaraela, ka habe, 3Than lö, adre hia but hlingâ ânyâm je perofeta, me thö degecâ ânyâm je taben hut: ke hake inya thiju kolon, ke adre me elöm nya be ka hlingö nya. 4Ke ieû hna thu kâu hnen Khong? walang, Oge me ip biju hobi könya tavat a seven thauzan, waleji adre me ca hnyi cibouca kö Baala. 5Ke helâe minya walang ang, e hu wan hoton hna ûca hnen ibetengiö baû. 6Ke a ne hnen ibetengiö baû, awe, ca hnen bi huliwa: a ne ca helâe, me ca ibetengiö baû hmetu bi ibetengiö baû. 7Ke ieû hmetu? E ca hu ge at Isaraela hnödra hna elâm: ke e hu bi ge tavat adre ûca, ke adre onâkâ keihen: 8helâ me hna sihnalimen, ka habe, Khong ame ham kodra hnyok ae bemokut, me je ecmak ame ca bwela bi, me je hnyiköny adre me ca long, ke ne o but hnyi bong ang. 9Ke haingö Davita, ka habe,

E so ame wia anyidra laulau me hnân hnewe me ofific,

Me hnân othöâ me hnân bi hwaban kodra:

10E so adre me ölidrâ je emaködra, madre me ca bwela bi,

Me onomâ bala ju je judra.

11Inya oge me ha, ka habe, Hawa, adre me thö me me û but? Ohe: ke haba hnyi ta a ödra me ame o but ûhomeli ka Aten ta je hnyei hnân oihunyinköu ödra. 12Ke a ne tang omjehen dut hmeledrany ta a ödra, me tang omjehen dut Aten ta je hnyei hna otheduoci ödra; hawa, ame ca he ka ti gan hmâ anyidra hnahic?

13Ke oge me ha köbun Aten ta je hnyei. Ke anyin a inya ang aposetoloiny Aten ta je hnyei, me inya oge me ogânâ hanymök: 14me heleû deny he ka oihu-nyinköuâ lahanök, me omelö keihen gadra a ne khana. 15Ke a ne hu ge hmeledrany ûsoköu hnyi hna digic ödra, ame he ka hu ieû hnyi hna he ka kap hmetu? ca möt bi ûnyi hnyi hna mok? 16Anyin a ne kap wan a bân, ame he ka helâe hia: ke a ne kap iwân ame he ka helâe minya je anginy. 17Ke adre ne thu degecâ but ke je anginy, ke u elaioiny hnyot adre ûhûjâköuâ unyidra, ke u me tha hu mödrin iwân me dân elaio; 18u ma ca bi gan bi ka ta je vheiny: ke u je ne bi gan, me ame ca möt iwân ûnyi gam, ke u bu u möt ûnyi ge iwân. 19U je ne ha, ka habe, Adre me subâ degecâ je angin mʼ adre me ûhûjâköuö nya bi. 20Eke, adre subâ degeci ödra ûnyi hnyi ca labageju, ke u je tethmâ ûnyi hnyi ânyâm labageju. Ca bi gan, ke ot ju: 21anyin a ne ca betenge Khong ge je hing vheiny, me ame ne ca he minya ka betenge gam. 22Anyin a wale, wâ bi betenge me hmonyin anyin Khong: hmonyin ka tavat adre me kolu; ke betenge anyin Khong köu, u je ne tethmâ hnyi anyin ibetengiö: ke e ka ba, me adre me he ka subâ degeci u minya bi. 23Ke adre me he minya bi ka ûhûjaköu Ödra wale adre me ca tethmâ hnyi ca labageju: anyin ae khana Khong he ka ûhûjaköu ödra hmetu. 24Anyin adre ne subö u ûnyi hnyi elaio a kû hwege hnyi hnyot, ke adre me ûhûjâköuö u hnyi hing elaio ke ca bongon bi ûö: hawa, adre me ca he ka ûhûjâköu ödra hia ta je hing vheiny hnyi anyidra bi elaio?

25Hnyat me lakeiny lö, oge me wek e me khanʼ öbun ûnyi eang ae iyong, wâ öbun nye bemetâ hnen je ûnykûmenöbun, a gʼ adre hia but onâkâ keihen tavat Isaraela, ke ne o but ame o hnahic ka Aten ta je hnyei; 26mʼ adre me he ka omelö at Isaraela hia thithö; helâ me hna sihnalimen, ka habe,

Ame he ka o At ûhomeli ûheny Ziona;

Ke ame he ka ohia hwakecin ae kong unyi Jekob:

27Ke wale hnok hna ûhihinyköu mödra,

Iny ka he ka hom degecâ anyidra hulo.

28Je iwahnaihmiony ödra me ûthumetu ae so, can öbun: ke haba hnyi hna ûca at, me adre me betenge kodra can lakamen. 29Anyin ame ca ietra Khong ge hnen hna ham, me hnen hna hawâ. 30Anyin a öbun e ca long hoton Khong ehac, ke walang ang adre me betenge gabun ûnyi hnyi hnödra hna ca long hoton, 31haba ödra, me adre me ca long hoton walang ang, mʼ adre me he ka betenge gadra minya bi, helâ me hna betenge köbun. 32Anyin a tha hna Khong tavat hia thithö ka hnyi hna ca long hoton, me me he bi ka betenge ge tavat hia thithö.

33Shaiba ge ûdiliny metâ ae nua me wâ ûnykûme anyin Khong! e iyong hmonyin anyin owisa, ke ca hnân wâ bi deny ta je gethen! 34Anyin a ia ame wâ ûnykûme weny Than? ke ie at ame tha ûhnenamö më? 35ke ia a bân ka ham ûnyi kâu, me e ame he ka bi hwaban hmetu kâu? 36Anyin a haba ta je ûnyi hia thithö, me ûnyi gan, me hnen e, me hnân hobi kâu, E so he ka ogânâ e nyiele balua. Amen.

Currently Selected:

Roma 11: IAAI

Highlight

Copy