Roma 13
13
1E SO ka tavat hia he ka long hoton ta je musi ae gan: anyin ae ba ke musi a ca ûnyi ge Khong; haba Khong ame otilâ ta je musi ehele. 2Anyin a wale haba at ame thu musi, me ame thu hna otilâ hnen Khong: kʼ ame he ka kap hnaûhango hnen hnyat adre me thu. 3Anyin a haba tavat musi, me ca hnân ootâ bi at ame mâdrâ so, ke so bi at ame mâdrâ monu. Hawa, e wem u me ca he ka outen at ame musi? ânyâ thö hwakecin ae so, me wale ûnyi ame he ka haisoi u: 4anyin a e athnyabainy Khong unyâm hobi kâu so. Ke u je ne mâdrâ hwakecin ae kong, ot ju; anyin a e ame ca vadren bâûâ hele vat: anyin a e athnyabainy Khong, at ame bi hwaban ge hmonyin ka at ae kong hwakecin. 5Anyin a wale e ti ûcû köbun he ka long hoton, ca can hmonyin thibi, ke ûnyi minya bi ge ûnykûm sah. 6Anyin a wale öbun e bi fat minya; anyin a ödrin lathnyabainy Khong, kʼ ödrin e tuö bala hanymen eling. 7Ham dö ka tavat hia anyidra ta je ûnyi: khûö ka at adre me khûö kâu; fat ka at adre me fat kâu, ot ka at adre me ot kâu; ogânâ at adre me ogânâ.
8Ca hom bah ûnyi anyin ke at, ke so bi he ka ibetengiököu: anyin ame ohwâdâ hnanyibu at ame betenge ka ke at. 9Ke walang ka habe, U ca he ka bi ûnyi monu, U ca he ka ûlingö, U me ca he ka venöu, U ca he ka behnyekom, ke a ne hu ke hnanyibu, wale thibi e hnyin hofuc ang, ka habe, U me he ka betenge ge at ame laba hakekenyi u helâ me u bi. 10Haba ibetengiö, ca at ame okongoâ at ae hakekeny: anyin a wale haba ibetengiö wale at ame ohwâdâ hnanyibu.
11Ke walang ang, e khanʼ öta ûen, a ûen dut ang öbun e he ka hmak ûhebun hnyi hna mokut: anyin ae hakekeny jut walang ang möt, ke sâkâû ehac waleji kʼ ate me labageju. 12E beû hmâ but lit ke hakekeny jut lany: anyin a wale ate me he ka hna degecâ but ta je huliwa anyin lit, ke so ate me he ka khavâ ûkhaû hnân vat anyin lany. 13E so ate me he fâfâ helâ me hnyi lany; ca hnyi walak me ic monu, ca bi ûnyi monu me wagelue, ca hnyi iwatretra me ihunyinköu. 14Ke khavâ ju öbun Than Iesu Keriso, ke ca penapena bi hobi kâu unyin, be ka ohwâdâ je weny e.
Currently Selected:
Roma 13: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
