Numera 13
13
1KE Iehova ame ha kö Mose, ka habe, 2Kunâ ke je hnyat he ka ecmâkâ hnyei Kanana, wale oge ham ka lakon, Isaraela: öbun a he ka kunâ ûsa khaca ûnyi hnyi je tribu hia anyin lakamödrin, a je than hia. 3Ke Mose ame kunʼ ödrin ûnyi hnyi hnyebuba Parana, helâ me Iehova ame ha: haba ödrin hia ödrin je taben lakon Isaraela. 4Ke walang je iödrin; Samua, nöku Zakuri, ûnyi hnyi tribu Reubena. 5Ke haba ûnyi hnyi tribu Simeona, Safata nöku Hori. 6Ke ûnyi hnyi tribu Juda, Kaleba, nöku Jefune. 7Ke ûnyi hnyi tribu Isakara, Igala, nöku Josefa. 8Ke ûnyi hnyi tribu Eferaima, Hosea, nöku Nuna. 9Ke ûnyi hnyi tribu Beniamina, Paleti nöku Rafu. 10Ke ûnyi hnyi tribu Zebulona, Gadiela, nöku Sodi. 11Ke ûnyi hnyi tribu Josefa, a wale tribu Manase, Gadi, nöku Susi. 12Ke ûnyi hnyi tribu Dana, Amiela, nöku Gemali. 13Ke ûnyi hnyi tribu Asera, Setura, nöku Mikaela. 14Ke ûnyi hnyi tribu Nafatali, Nahebi, nöku Vofesi. 15Ke ûnyi hnyi tribu Gada, Geuela, nöku Maki. 16Wale ien hnyat Mose ame kunâ he ka ecmâkâ hnyei. Ke Mose ame hwenyi iö Hosea, a nöku Nuna, me, Josua. 17Ke Mose ame kunʼ ödrin he ka ecmâkâ hnyei Kanana, me ha ködrin, ka habe, Öbun e he ka ölö hnyi Hwaiöu, ke öliâ thö je bucen: 18me wâ hnyei habe ehö; ke tavat adre labā, hawa ödra tavat ae hwege, ame ne tavat ae ngâ, ame ne tavat ae se hia ame ne wakhalet thibi; 19ke ehö hnyei adre me labā, ame ne so, ame ne kong; ke ehö je taun adre me labā, ame ne je hna hunuma, kʼ ame ne je hnabâ ae hwege; 20ke ehö kânâ, ame ne pipikhenya ame ne delâ, ame ne hu je ûö, ame ne ba. Ke hwege thʼ öbun, ke öbun e he ka hom jem hanen jeûiny kânâ. Haba ûen eling, me ûen wan vine a bân. 21Ke ödrin e ölö thö me ecmâkâ hnyei hwân hnyi hnyebuba Zine ke ne o but Rehoba, ke ne o but hnyi gethen ûheny Hamath. 22Ke ödrin e ölö hnyi Hwaiöu, me o hnyi Heberona; wale Ahiman, me Sesai, me Talemai, a laku Anaka. (Ke haba Heberona, me adre bödra ka op e ehac seven ta huna e tiga ca op Zoana hnyi Aigupito.) 23Ke ödrin e o but hnyi Esekolo a hnyigöulen bucen, me sö but eling ke vheiny me thi wan vine a khaca, me vadren hnyi venyâ hnen li at a lo; ke ödrin e hom minya je wan rimona, me je wan ometâ. 24Ke adre hwenyi ien dok eling Esekolo hnyi hnyigöulen bucen, can thi vine a sö lakon Isaraela eling. 25Ke ödrin e hmetu ûhedrin hnyi hna ecmâkâ hnyei hwaban je bong a fâte. 26Ke ödrin e hmetu but me o kö Mose me Arona, me ûkhacaköu hia anyin lakon Isaraela, ka hnyi hnyebuba Parana, wale Kadesi; me oâ ûthumetu ködru, me ûkhacaköu hia anyin lakon Isaraela, me omanenâ ködra waniny kânâ. 27Ke ödrin e thumeto e, ka habe, Ohmun e o but ka hnyi hnyei u je kunʼ ohmun ka hnyin, ke e hnathu ame di ge debai me hani; ke walang waniny. 28Ke so bi e hwege tavat a idra hnyei, ke adre up haginy je taun, ke e ti gan: ka ohmun e wâ eling je laku Anaka. 29Kʼ ame laba Amaleka hnyi ke keihen ka hnyi Hwaiöu: ke haba hnyi je bucen ame laba hnyat Heth, me Jebusi, me Amora: kʼ ame laba at Kanana hnyi hobat köiö me hnyi baten Joridano. 30Me haba Kaleba ame thawâ tavat hnyi hnyimakö Mose, me ha, ka habe, E so ötin e ie he me hûgûnâ; anyin ae khanʼ ötin he ka hwege hon. 31Ke haingen tavat ödrin e tha ölö mē, ka habe, E ca khanʼ ota he ka ölö thö ka tavat eling, anyin a ödra hwege huta. 32Ke ödrin e haikongoâ hnyei ödrin e ecmâkâ ka lakon Isaraela, me ha, ka habe, Haba hnyei ohmun e vheno me ecmâkâ, me hnyei ame ohia aten, ke haba tavat hia ohmun e wâ eling, me tavat ae beû. 33Ke ohmun e wâ eling ta je hmai ae beû hmâ, a je laku Anaka, a mâtrâniny je hmai ae beû, ke ohmun helâ me je wahamon hnyi hnyimaköhmun, ke helâe minya hnyi hnyimaködrin.
Currently Selected:
Numera 13: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society