Numera 12
12
1KE haba Miriama me Arona ödru me haikongo Mose can momo Kuza e ame hom, anyin a e ame hom mome a at Kuza. 2Ke haingödru, ka habe, Hawa, ame hake fuc Iehova kö Mose? a ca hnyi ha minya köhmu? Ke Iehova ame löng e. 3Haba Mose, me wale at ae ti menyik hon tavat hia eang hmelen. 4Ke Iehova ame ie ha kö Mose me Arona me Miriama, ka habe, Ai öbun kun ka hnyi uma ûkhacakoû. Me ödrin kun ödrin e he. 5Me Iehova ame utut hnyi ûlâ ame tot wisa, me tot hnyi hwanumen uma ûkhacaköu, me hawo Arona me Miriama: ke ödru me o thö. 6Ke e ame ha, ka habe, Löng ju hok hofuc: a ne hu perofeta unyibun, me haba Inya Iehova oge me he ka omanenö nya kâu hnyi hna omanenâ, me fuc kâu hnyi bwi. 7Ke haba athnyabaik Mose, me ca helâe; e bi at ae hnathu hnyi hnyabak hia: 8me oge me he ka ûcû hnyem mē me ha manenâ, ke ca hnyi je hofuc ae lit; ke e ame he ka wâ unyu Iehova: ke ieû gabu a öbu ca ot he ka fuc ga Mose a athnyabaik 9Ke ame ubâhlâ thö hmonyin anyi Iehova ködru; ke e ame he but. 10Me ame he but ûlâ ûnyi hnyi hon Uma; ke wâ bi, e lepera but Miriama helâ me kiona: ke Arona ame ō Miriama, ke wâ bi e lepera. 11Ke Arona ame ha kö Mose, ka habe, Ekölö than lö, ö u ca he ka ip köhmu hulö, can öhme ânyâ monu, me can öhme ânyâ hulö. 12Ö e ca he ka helâ me komok, ke helâ me at ame o ûnyi hnyi hnyekon hinyen, kʼ ame aû but unyin. 13Ke Mose ame tenge kö Iehova, me ha, ka habe, Khong lo, ö u omelö thö momo walang ang. 14Ke Iehova ame ha kö Mose, ka habe, Hawa, a ne hangöjâ hnyimakan, ge kamen ame ca he ka hmehma seven ta bong? e so adre me tuö e hoton hnyaba hnyi seven ta bong, ke hwaban e adre me he ka hom hmetu e. 15Me adre me tue Miriama hoton hnyaba hnyi seven ta bong: ke ame ca he tavat ke ne o but adre hum Miriama hmetu thö. 16Ke hwaban e ame he tavat ûhedra Hazeroth, me hunuma hnyi hnyebuba Parana.
Currently Selected:
Numera 12: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society