Numera 14
14
1KE ame tenge hwege ûkhacaköu hia, kʼ ame tenge thungaû tavat hnyi lit eling. 2Ke ame haiö Mose me Arona hnen lakon Isaraela hia: ke ame ha ködru hnen ûkhacaköu hia, ka habe, Ohmun na mokcu hnyi hnyei Aigupito! ke ohmun na mokcu hnyi hnyebuba eang! 3Ke ieû e ga Iehova a hum ohmun ka hnyi hnyei eang he ka mok ge hele vat? Adre me he ka hûgûnâ laöiöhmun me lakuhmun je wanakat: hawa e ca so kohmun he ka hmetu Aigupito ai? 4Ke adre me uhaköuâ, ka habe, E so ötin e ûca at me me than, kʼ ate me he ka hmetu Aigupito ai. 5Me haba Mose me Arona ödru me ta ju hnyimaködru hnyikânâi hnyi hnyimakan tavat hia, wale ûkhacaköu anyin lakon Isaraela. 6Ke haba Josua nöku Nuna, me Kaleba nöku Jefuna, ödre hnyi ecmâkâ hnyei, me, ödru me kia but anyidru je ûkhaû: 7ke ödre ha ka ûkhacaköu hia anyin lakon Isaraela, ka habe, Haba hnyei ohmun e vheno me ecmâkâ me hnyei ae so hmönyin. 8Ame ne senyin köta Iehova, me e ame he ka hum ota ka hnyi hnyei, me ham köta; a hnyei ame di hnyin debai me hani. 9Ke so bi ca he öbun ke ivinö me Iehova, ke ca he öbun ka outen tavat a idra hnyei; anyin a ödra areto bi hobi köhmun: kʼ adre hia but hom unyidra ûnyi hnân tuʼ ödra bi, ke e unyita Iehova: ca oûtʼ ödra. 10Ke haba ûkhacakoû hia adre me ha he ka luʼ ödru ge veto. Me ame manen hmanenangi Iehova hnyi uma ûkhacaköu ka lakon Isaraela hia.
11Ke Iehova ame ha kö Mose, ka habe, Ame he tavat eang ka hûkötiö nya ke ne o but kehö? adre me ca he ka labageju könya ke ne o but kehö, ge ta je ûöman hia waleji oge ânyâ unyidra? 12Oge me he ka kuc ödra ge mok me ohia hwajeköûdra, ke oge me he ka wiö u hnân hnyei ae gan me man hudra. 13Ke haba Mose ame ha kö Iehova, ka habe, Me ame he ka löng hnen at Aigupito; anyin a u je hom tavat eang ûnyi gadra ge manâm man; 14ke adre me he ka thumeto tavat a gadra hnyei ang: ke adre löng a u Iehova unyin tavat eang; anyin a u Iehova u me ûhnyimaköu mödra, ke ame tot hudra ânyâm ûlâ, ke haba u hnyimakan anyidra bunyen, hnyi ûlâ ame tot wisa hnyi lany, me meic ame tot wisa hnyi lit. 15Ke walang ang u ka hlingâ tavat eang helâ me at a khaca, awe, ame he ka ha hnen je hnyei adre me löng ânyam lung, ka habe, 16Anyin ae ca khanö Iehova he ka hom tavat eang ka hnyi hnyei e ame khemanyin ködra, me wale e ame hlingʼ ödra hnyi hnyebuba. 17Ke walang ang, ö e gan dut man manin Than, hoton hnâm hna kû, ka habe, 18At ae bec he ka hmönyin Iehova, ke gan hmâ anyin ibetengiö, kʼ ame degecâ hulö, me monu, kʼ ame ca he ka ha ae ba kongon at ae kong; ke e ame bi hwaban monu anyin je kamen ka je lakon, ke ne o but ka hnyi dö a kuniny me vakiny. 19Ö u degec ut konginy tavat eang hoton ûganiny ânyâm ibetengiö, ke hoton hnâm hna thang monu anyin tavat eang, waleji hwân hnyi Aigupito ke ne o but hnyi bong ang. 20Me haba Iehova ame thu, ka habe, Awe oge me hna degecâ hoton hwâm hofuc. 21Ke kia inya inya a g ame he ka unöngöt hmeledrany hia ge hmanengi Iehova; 22ke can anyin a olibenyita cubic nya hnen tavat hia eang adre me wâ hmanenangik me anyik je ûöman, waleji oge ânyâ hnyi Aigupito, me hnyi hnyebuba, kʼ adre ca löng hok hofuc; 23awe, adre me ca he ka wâ hnyei waleji oge khemanyin ka lakamödra, kʼ ame ca he ka wâ e hnen tavat adre me hûkötiö nya: 24ke haba athnyabaik a Kaleba, anyin a e at ae ke hnyekon, ke e ame tha löng hotuk, awe oge me he ka hom e ka hnyi hnyei wale a mwi hnyin; kʼ ame he je mâtrâniny ka hu e. 25Haba at Amaleka me Kanana adre me laba hnyi hnyigöulen bucen: ke haba nyi öbun e he ka hwiö me he ka hnyi hnyebuba, gethen ka hnyi Köiö ae Dra.
26Ke Iehova ame ha kö Mose me Arona, ka habe, 27Oge me he ka hokhnyokâ ke ne o but kehö ûkhacaköu eang ae kong, tavat adre me ulidri nya? oge löng ut ulit anyin lakon Isaraela wale adre me ulidri nya. 28Ha thö ködra, ka habe, Haingö Iehova, kia inya inya oge me he ka ânyâ köbun helâ me hnöbun hna ha hnyi li hnyikönyök: 29kʼ ame he ka mok ta je unyibun hnyi hnyebuba eang; ke öbun hia wale tavat adre aû, hoton hna sihnalimibun hia, hwân ge tavat a twente huna me gan hon e, a tavat adre ulidri nya, 30e hnathu öbun e ca he ka o ka hnyi hnyei waleji oge hai hnyamok he ka olabʼ öbun hnyin, ke so thibi Kaleba nöku Jefune, me Josua nöku Nuna. 31Ke haba lakubun je wanakat wale öbun e ha a gʼ ame he ka hûgûnâ hnen vat, me oge me he ka hum ödrin bi, ke adre me he ka wâ hnyei öbun e hûkötiâ. 32Ke haba öbun, me ame he ka mok je unyibun hnyi hnyebuba eang. 33Kʼ ame he lakubun ka he monumonu hnyi hnyebuba hnyi je huna a fâte, kʼ ödrin e he ka hijen tilâ hnöbun je hna bi ûnyi monu, ke ne o but ame aû degecâ je unyibun hnyi hnyebuba. 34Helâ me ûseiny je bong öbun e ecmâkâ hnyin hnyei, a fâte je bong, me haba khaca bong ame he ka khaca huna, kʼ öbun e he ka hijen tilâ anyibun hulö, hnyi je huna a fâte, ke öbun e he ka wâhmakhmetoâ hnok hna hwio. 35Inya Iehova oge me fuc, kʼ oge me he ka ânyâ eling ka ûkhacaköu hia ae kong eang, adre tot meta könya: adre me he ka ohiʼ ödra hnyi hnyebuba eang, kʼ adre me he ka mok eling. 36Ke haba tavat a kunâ Mose he ka ecmâkâ hnyei, wale hnyat ödrin e hmetu me oâ ulidro ûkhacaköu hia gan, ke ödrin e haikongoâ hnyei, 37haba hnyat eling ödrin e hom ûthumeto ae kong ge hnyei, me ödrin e mok hia hnyi hnyimakö Iehova hnen mok ae gan. 38Ke haba Josua nöku Nuna, me Kaleba nöku Jefune a li at ödre hnyi ecmâkâ hnyei, me ödre möt biju. 39Ke Mose ame thumetu lakon Isaraela hofuc eling: me ame tenge hwege tavat. 40Ke adre me vesâkong, me öliâ bucen, me ha, ka habe, Walʼ ohmun ang, ke ohmun e he ka he ka hnyi hnyei ame ha Iehova, anyin ae kong hwakecihmun. 41Ke Mose ame ha, ka habe, Ieû gabun öbun e hanyâûâ hnanyibu anyi Iehova, kʼ ame ca he bi ka hwâdâ? 42Ca ölʼ öbun, anyin a ca e unyibun Iehova, wâ e nye kuc öbun hnen je iwahnaihmiony möbun. 43Ke wala at Amaleka me at Kanana hnyi hnyimaköbun, kʼ öbun e he ka ta ge hele vat; anyin a öbun e hmetu ûnyi ga Iehova, me waleling ame ca he Iehova ka tha e möbun. 44Ke hwege hnyimaködra he ka i öliâ bucen: ke so bi ame ca he ûnyi hnyi hna hunuma tangen ûhihinyköu anyi Iehova, me Mose. 45Ke ame utut at Amaleka me at Kanana, a wale tavat adre me laba hnyi bucen eling, me adre me kuc ödra me hnu ödra hmetu ke ne o but Horema.
Currently Selected:
Numera 14: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society