Galatia 3

1AT Galatia ae monu lö, adre me sihnalimen hnyi je hnyimaköbun Iesu Keriso at adre osatauroa, ke ie at ame iyâwʼ öbun? 2Wale thibi ang ûnyi ame bekhanö nya gabun, ka habe, Hawa, öbun e kap ju Hanu ûnyi hnyi ta je huliwa hnyi hnanyibu, kʼ ame ne hnen long ûnyi hnyi labageju? 3Hawa, öbun e monu helâe? öbun e hwân hnyi Hanu, ke walang ang öbun e he bi ka oumo hnyi unyin? 4Hawa, öbun e hia but vec baû hnyi ta je ûnyi ae se hia? ame ne he ka ûnyi baû bi. 5Anyin a wale, haba at ame ham köbun Hanu, me ânyâ ta je huliwa ae man unyibun, hawa, ame ânyâ e hnyi je huliwa hnyi hnanyibu, ke ame ne ânyâ hnen long hnyi labageju? 6Helâ me Aberahama ame labageju ka Khong, me adre me hâiâ e kâu me hwakecin ae wisa. 7Anyin a wale, khanʼ öbun ju, a haba tavat adre me labageju, me ödra je mâtrâni Aberahama. 8Ke manen dut ehac hnyi hna sihnalimen a gʼ ame he Khong ka haiwisa Aten je hnyei ûnyi hnyi labageju, ke a khetâ evangelia kö Aberahama, ka habe, Ame he ka hnahic ta je hnyei hia ûnyi gam. 9Wale me me tha hnahic tavat adre me labageju me Aberahama at ame labageju. 10Anyin a haba tavat adre me laba hnyi ta je huliwainy hnanyibu, me ödra but hnyi hmelen hnaûhango: anyin adre hia but sihnalimen, ka habe, E ve hnaûhango but ödra hia adre me ca tethmâ hnyi ta je ûnyi hia thithö adre me sihnalimen hnyi tusiny hnanyibu he ka ânyâ. 11Ke e manen ae ba at adre me haiwisa hnyi hnyimakan Khong ûnyi ge hnanyibu: anyin, Ame he ka möt at ae wisa hwakecin ûnyi hnyi labageju; 12ke haba hnanyibu me ca hanen bi labageju; ke, Haba at ame he ka vheno e, me e ame he ka möt kâu. 13Haba Keriso ame ûcû öta ûnyi hnyi hnaûhangöiny hnanyibu, anyin a e ame wia me hnaûhango hobi köta: anyin adre hia but sihnalimen, ka habe, E hnaûhango but tavat hia adre me uhni ödra hnyi ûtö: 14me me o but hnahic anyi Aberahama ka Aten je hnyei ga Keriso Iesu; me me hu thö köta hnen labageju Hanu adre ha bânâ.

15Hnyat me lakeiny lö, oge me ha helâ me hwan at: ka habe, Eja ke ne a ne ûhihinyköu anyin at, kʼ adre hia but ohmâ, me ba at ame he ka thang, me bi hanen hmetu. 16Ke adre ha ta je hna ha bânâ kö Aberahama me mâtrâniny. E ame ca ha, ka habe, Ka ta je mâtrân, helâke me se hia; ke helâke me khaca thibi, ka habe, Ka mâtrânâm, wale Keriso. 17Ke inya oge me ha, ka habe, haba ûhihinyköu hnen Khong hna ohmâ kâû adrem, ae ca khana hnanyibu he ka thang hmetu, waleji a foa haded me thote je huna hwaban ûhihinyköu, me me oûnyibâûâ hna ha bânâ. 18Anyin a ne ûnyi hnyi hnanyibu hwajekhon me ca ûnyi bi hnyi hna ha bânâ: ke Khong ame ham e kö Aberahama hnyi hna ha bânâ. 19Ke hnân eû hnanyibu? Adre bi hanen e can ta je hna hanyâûâ, ke ne o but ame o thö mâtrân, wale adre ha bânâ kâu; ke hnen ta je angela hna otilâ e hnyi hnyamen at ame oûsoköuâ. 20Ke haba at ame oûsoköuâ me ca hnân hobi kâu at a khaca; ke haba Khong me khaca thibi. 21Ke hawa, haba hnanyibu me ûcon ta je hna ha bânâ ge Khong? Ohe: anyin a ne hu hnanyibu adre ham ae khana he ka omelö, awe, adre me ne he ka haiwisa ûnyi hnyi hnanyibu. 22Ke haba hnyi hna sihnalimen adre hia but thelöng ta je ûnyi hia hnyi hmelen hulo, mʼ adre me he ka ham ka tavat labageju hna ha bânâ ûnyi hnyi labageju kö Iesu Keriso.

23Ke adre tuʼ öta ehac hnyi hmelen hnanyibu, waleji ke tiga ca o bi labageju, ke adre theling öta ke ne o but ame manen dut labageju ame he ka o. 24Wale me haba hnanyibu, me hnân at ûne köta he ka lili öta ka Keriso, mʼ adre me he ka haiwisʼ öta ûnyi hnyi labageju. 25Ke walang ang ame o but labageju, me ame ca musi öta hmetu bi hnen at ûne. 26Anyin a je lakon Khong öbun hia a deny labageju kö Keriso Iesu. 27Anyin a haba öbun hia, adre bapataisoâ ka Keriso, me öbun e khaû öbun ge Keriso. 28Ke ba hmetu at Juda, ke ba at Helene, ke ba at hwenbâ, ke ba at he baû, ke ba baga, ke ba momo; anyin a khaca thibi öbun hia unyin Keriso Iesu. 29Ke öbun e ne laten Keriso, awe, öbun je mâtrâni Aberahama, a tavat tren hwajekhoû helâ me hna ha bânâ.

Currently Selected:

Galatia 3: IAAI

Highlight

Copy