Galatia 4

1KE inya oge me ha, ka habe, E ka tiga wanakat bi atö, me ca ve bongon bi e me athnyabainy, ke so bi e tuhan hia; 2ke ame muso e hnen tavat ûne, me tavat tue, ke ne o but hnyi ûen a thu hnen kamen. 3Helâe minya öta, waleji kʼ öta tiga je wanakat, me adre me musi öta hnyi je hna ûne a bân anyin hmeledrany: 4ke ame o but ûen adre thu, me haba Khong ame kunâ Nokon, adre hnokoâ hnen momo, a hnokoâ hmelen hnanyibu, 5me me he ka ûco tavat adre me laba hmelen hnanyibu, mʼ adre me he ka kop öta helâ me je hing lakon. 6Ke can öbun je hing lakon, me Khong ame kunâ Hanon Nokon ka hnyi je hnyekubun, kʼ ame hongot, ka habe, Aba, Cica. 7Anyin a wale, u ca athnyaba hmetu bi, kʼ u nokon; ke u nokon, awe ame he ka hu hwajekhom ûnyi ge Khong.

8Ke haba ehac, waleji ae tiga ca khanʼ öbun Khong, me adre me hwenbʼ öbun hnen ta je ûnyi a ca je hing khong: 9ke e khanʼ öbun Khong walang ang, ke khana Khong öbun, me ieû gabun öbun e hwio hmetu ka hnyi ta je ûnyi a â bân, ke sënyin, ke ca ûnyi hnathu, wale ame webun hmetu he ka hwenbâ kâu? 10Öbun e tuö je bong, me je tehi, me je ûen, me je huna. 11Inya oge me ot gabun, wâ e nye ûnyi baû anyik huliwa köbun.

12Hnyat me lakeiny lö, inya oge me khöû köbun he ka helâ mönya, anyin a haba inya, me helâ möbun. Öbun e ca hia but okongu nya: 13ke e khanʼ öbun a oge bök ka khetâ evangelia köbun, kʼ ame sënyin unyik: 14ke haba ûcubic köbun waleji hnyi unyik, me öbun e ca hûkotiâ, me degec ut; ke öbun e kop nya helâke me angela anyin Khong, helâke me Keriso Iesu. 15Ke ewa hnobun hna haisoâ? anyin oge me ohnathu öbun, ka habe, a ne khanʼ öbun, me öbun e hia but ûâ je li emaköbun me ham bi könya. 16Hawa, iny iwahnaihmiony mʼ öbun, anyin oge me ha hnathu köbun? 17E hwege wedra öbun, ke ca so bi; eke, e wedra he ka ovesei öbun, mʼ öbun e he ka ti webun ödra. 18Ke so öbun e he bala ka weny hwegiâ so, ke ca helâe thibi hnyi ûen a tha inya möbun. 19Je lakuk lö, inya hmetu oge me vec hnyekon helâ me at erkini öbun, ke ne o but a e but Keriso eû hnyibun, 20eke, e wek he ka tha inya mʼ öbun walang ang, me okebongonâ ifucik; anyin oge me loloâ gabun.

21Ha thʼ öbun könya, öbun hnyat a webun he ka laba hmelen hnanyibu, hawa, öbun e ca long hnanyibu? 22Anyin adre sihnalimen, ka habe, lo li laku Aberahama, haba khaca me nokon momo adre ûco, ke nokon momo ame he baû khaca. 23Haba nokon momo adre ûco, me adre hnokoâ hoton unyin; ke haba nokon momo ame he baû, me adre me hnokoâ hoton hna ha bânâ. 24Haba ta je ûnyi e me hnân ûhoûcû: anyin a haba li momo e, me li ûhihinyköu; khaca ûnyi hnyi bucen Sinai, kʼ ame hnokoâ ka hnyi hwenbâ, waleji Hagara. 25Haba Hagara eling me wale bucen Sinai hnyi Arabia, e ûcû me Jerusalema walang ang: anyin a e ame tha hwenbâ me lakon. 26Ke haba Jerusalema ethö me ame he baû, wale hinyöta. 27Anyin adre sihnalimen, ka habe,

Senyin dö, u toûnyi ame ca hnokoâ;

Kuku thö me tenge, u at ame ca vec hnyâm:

Anyin ae se hia lakon momo ame laba baû hon at ae hu âiân.

28Hnyat me lakeiny lö, öta ang lakon hna ha bânâ, helâji me Isaaka. 29Ke haba ehac me ame okongoâ at adre me hnokoâ ûnyi hnyi Hanu hnen at adre me hnokoâ ûnyi hnyi unyin, ke helâe minya walang ang. 30Ke ieû hna ha hnyi hna sihnalimen? Tha obâ but momo a athnyaba me nokon da: anyin ame ca he da nokon momo a athnyaba ka tha hwajekhon me da nokon momo ame he baû. 31Anyin a wale, hnyat me lakeiny lö, ca lakon momo a athnyaba öta, ke lakon momo ame he baû bi öta.

Currently Selected:

Galatia 4: IAAI

Highlight

Copy