Ga̱la̱ti̱a̱ 5

A̱vvu̱ze̱t yahe ngati Ye̱su̱ Ki̱ri̱sto̱

1I̱yo̱ko̱ zin iróng naga ngen kecebje, eci oogawet Ki̱ri̱sto̱ kotozzo labak. Ibilet okkomit kak baize ci a̱tu̱yyu̱ Ye̱su̱, ma ngen a̱mi̱ro̱ni̱kku̱ lo̱ti̱nno̱k wak Musesi, kar izet du̱cca̱k bo̱do̱k ki ba̱li̱ye̱.

2Izikto da̱, annita Pa̱u̱lo̱ ci ka̱du̱wa̱kku̱ng zoz cu: Ming etteddu vi̱ca̱vi̱cce̱t abunna Ta̱mu̱ta̱dde̱n a̱gga̱mnyu̱ng, iróng zin amudannu gi̱i̱ imma ngati Ki̱ri̱sto̱. 3Ja ku̱du̱wa̱ bo̱do̱k, ming anyak e̱e̱t imma ci elemi zoz ci ettede ol vi̱ca̱vi̱cce̱t, anyik zin kuzute lo̱ti̱nno̱k ne̱k Musesi ko̱ do̱o̱k. 4Imma niga ol cik orongnyu ubunntta ngu̱me̱ ci Ta̱mu̱ta̱dde̱no̱ ngati azunnu lo̱ti̱nno̱k wak Musesi, engerttau e̱le̱tti̱ ciggo̱k ngati Ki̱ri̱sto̱, de̱de̱, u̱yu̱ktte̱u̱ utungtteu deten ci Ta̱mu̱ta̱dde̱no̱ lo̱o̱c.

5Imma tu̱we̱nta̱, kerewina naga talninta go̱o̱le̱ ci Vongiz ci A̱li̱le̱, bunnate ci karike naga zi̱nze̱tti̱ ko̱. 6Ming ke̱e̱ggi̱n ol wak ka̱tu̱ Ye̱su̱ Ki̱ri̱sto̱, i̱llo̱i̱ gi̱i̱ ci kamuda ming ketted wucic vi̱ca̱vi̱ca̱, icima iróng kettedi. Tu̱we̱ne̱t zin ci aanyyet kirezit ol.

7Azunnu ba̱li̱ye̱ niga zoz ci Ye̱su̱ ju̱rru̱m, nya ci uhu o̱o̱tti̱ cuggo̱k bak odotekku zoz ci een de̱de̱ lo̱o̱c? 8Iróng gi̱i̱ ci ecebannung o̱o̱tti̱ ko̱ a̱kku̱ ngati Ta̱mu̱ta̱dde̱no̱, nonno ele ci awuyyung kar abait labak. 9Izikto ju̱rru̱m, ogon ki i̱yo̱ko̱ nyigita cik meertak ming idice nu̱nu̱n, abarik zin edeca ele do̱o̱k. 10Ka̱gga̱ iróng atin niga elemnyyu zoz ci de̱me̱zzo̱k wak volongak, eci naga ka̱tu̱ Ta̱mu̱ta̱dde̱n. Okko atin Manyi etted lo̱ki̱ko̱ ci ol wak a̱ti̱kku̱ng tu̱.

11Gotonogga ki ngonogga tu̱we̱nta̱, ming ngen anna ke̱de̱me̱zi̱ ol zoz ci ettede ol vi̱ca̱vi̱cce̱t kize gool ci amudanne ol baiz ci abunna Ta̱mu̱ta̱dde̱no̱, inya bo̱do̱k ming a̱gi̱dda̱ ol ko̱? Ka̱gga̱ ngen ol a̱gi̱dda̱ annit eci kuwahek ol zoz ci a̱ti̱ri̱ze̱ Ta̱mu̱ta̱dde̱n nogo go̱o̱le̱ ci a̱da̱kne̱ Ye̱su̱ ta̱la̱ke̱ca̱ do̱ niko kar kaara ol mu̱nye̱n. 12Korongi wo̱ye̱ anna ol wak a̱a̱nyu̱ng utuburet nong zo̱ze̱ ci ettede ol vi̱ca̱vi̱cce̱t ko̱, abunna ming egerzan e̱le̱tti̱ cigge̱k.

13Gotonogga ki ngonogga tu̱we̱nta̱, atahalaung Ta̱mu̱ta̱dde̱n abunna ming abakku baiz ci abunna, kar aanyyait kaal. Ma zin anyikku kaal ne̱ko̱ kize ci ogonnu mu̱nye̱n. Abarik aanyyait kaal ne̱ko̱ kize ci irezzu ol. 14Ming karum lo̱ti̱nno̱k do̱o̱k nga̱to̱de̱, azi ne, “Irez e̱e̱t ci locariyo#5:14 E̱e̱t ci locariyo: Oob Ye̱su̱ keng ci ireze i̱nna̱ locari cunne. IkebLu̱ka̱ 10:27-37. ki i̱yo̱ko̱ ming irezi i̱nna̱ ele cunne ko̱.”#Leviticus 19:18 15Ma̱i̱je̱ ming oronnu niga e̱le̱tti̱ne̱ adawanu gonoggu, u̱zu̱tte̱ e̱le̱tti̱, ma egerzannu gonoggu.

Bak baiz Vongize ci A̱li̱le̱

16Ka̱du̱wa̱kku̱ng abunna ming azunnu Vongiz ci A̱li̱le̱ baize cunno̱ng, kar zin iróng ngen abakku mu̱nye̱ne̱ cik amin zi̱nze̱tti̱ cuggo̱k. 17Ka̱du̱wa̱ zoz necu niko eci baizi ci kabahe Vongize ci Ta̱mu̱ta̱dde̱no̱ ongorko ki baiz ci gerze amin zi̱nze̱tti̱ cigga̱c. Iróng zin niga amudannu gool ci ogonnu kaal cik abunna orongnyu u̱tu̱gu̱zzo̱. 18Ma̱i̱je̱ i̱yo̱ko̱, ming een Vongiz ci A̱li̱le̱ ci abahe i̱nna̱, iróng i̱nna̱ e̱e̱ni̱ du̱ca̱i̱t ci lo̱ti̱nno̱k cik Musesi.

19A̱gga̱ ol do̱o̱k baiz ci mu̱nye̱nu̱, i̱ye̱la̱i̱, nogo ciko: A̱li̱ya̱kze̱t (wangi), rotinet ki ngaai, amanik e̱e̱ti̱ ngaa icima ngaa amanik e̱e̱t ci maci, 20ala e̱e̱ti̱ to̱do̱yyo̱k, owo e̱e̱ti̱ ngarrete, anyak e̱e̱ti̱ mootiz, amarine e̱e̱ti̱ dango, a̱ppwa̱ e̱e̱t zinin kaale cik ollu, adunye zinin ci e̱e̱to̱ ataman, anyak e̱e̱ti̱ meder, irez e̱e̱ti̱ ele cinne do̱, enger e̱e̱ti̱ lo̱o̱c, abak ki ol wak elemi zoz cinne, 21e̱e̱t ci aarik zinin kaal cik ollu, e̱e̱t ci ibbakce, e̱e̱t ci i̱i̱zo̱ rugumon ci anyak a̱li̱ya̱kze̱t kar ku̱tu̱gu̱zzo̱ kaal cik gerzek. Kobodekku̱ng ki ba̱li̱ye̱ ming ka̱du̱wa̱kku̱ng oowa ke̱, imma ol wak ogon kaal ne̱ko̱ ko̱, iróng atin i̱i̱zo̱ ba̱a̱li̱ne̱t ci Ta̱mu̱ta̱dde̱no̱.

22Ma̱i̱je̱ baizi Vongiza, een rezinet, ki talninet, ki baiz yahe, ki niimenet no̱ngi̱tto̱n, ki i̱rrke̱ne̱t, ki bunnat, ki tu̱we̱ne̱t Ta̱mu̱ta̱dde̱n, 23ki gool ci kozozik ol muluwe ci alali, aanyyet kanyait urutoit zoza. I̱llo̱i̱ lo̱ti̱nno̱k cik ongorko ki kaal ne̱ko̱.

24Imma ol cik elemtta Ye̱su̱ Ki̱ri̱sto̱, utungtek kaal balik gerzek irez nege ke̱ do̱o̱k korkorrit ki daiz ci Ye̱su̱ keete ci een ta̱la̱ke̱c bali ododine enne ke̱. 25Ming kabak naga Vongize ci A̱li̱le̱ ko̱, abunna zin ming kanu Vongiz ci A̱li̱le̱ baize cinna do̱o̱k. 26Gerza ming kodong e̱le̱tti̱, icima kanyike e̱e̱t imma kutubur nong. Gerza ming kanyak meder kaale cik ollu.

Currently Selected:

Ga̱la̱ti̱a̱ 5: tex

Highlight

Copy

Compare