Ga̱la̱ti̱a̱ 4

Karagiz ma̱yu̱we̱ne̱t ci Ta̱mu̱ta̱dde̱no̱

1I̱yo̱ko̱ i̱no̱ni̱t zoz cu: Ming a̱da̱k be̱e̱ti̱ doolinnu kar kutungek kaal cik aragiz dooli ciginnek lo̱o̱c ming ngen idice, ogon zin nege ki du̱cca̱ha̱, ming nu̱nu̱n ovvo atin nege aragiz kaal cik be̱e̱ti̱nne̱ng. 2Iróng dooli wo̱ye̱ aragiz kaal cik be̱e̱ti̱nne̱ng, abak nege arrak a̱tte̱ ci e̱e̱t ci a̱gga̱m nogo kar kuzute kaal ne̱ke̱ zee ki̱ddi̱ki̱rre̱t nege, kar zin ki̱vi̱ta̱ karagizet kaal cik be̱e̱ti̱nne̱ng vu̱rrta̱. 3Kabak naga bu̱k go̱o̱le̱ neci baling ngen Ye̱su̱ ki̱ki̱ya̱. Kogonna ki dooli cikidik ke̱, ke̱e̱ggi̱n du̱cca̱k cik kanu kaal cik lo̱o̱tu̱.

4Baling utube i̱i̱te̱ni̱ ci odola Ta̱mu̱ta̱dde̱n, i̱tto̱na̱ zin Ngerinne, a̱rri̱ta̱i̱ ngati e̱e̱t ci diiri, kar enne bu̱k ko̱to̱ngo̱o̱le̱ lo̱ti̱nno̱k. 5I̱tto̱na̱ Ta̱mu̱ta̱dde̱n kar ki̱ki̱ya̱ karawet zo̱ze̱ wa lo̱ti̱nno̱u̱, kar kuburuwet kizet dooli ciginnek. 6I̱yo̱ko̱ zin, eci naga ke̱e̱ggi̱n dooli cik Ta̱mu̱ta̱dde̱no̱, i̱tto̱na̱ zin enne Vongiz wa Ngerinne ka̱vvu̱ zi̱nze̱tti̱nne̱ cigga̱c. Okko Vongizi neci aanyyet kutuwet Ta̱mu̱ta̱dde̱n kize, Be̱e̱ti̱nna̱. 7I̱yo̱ko̱ zin, iróng niga ngen e̱e̱ggi̱nnu̱ du̱cca̱k bo̱do̱k, abarik izetu dooli cik Ta̱mu̱ta̱dde̱no̱, eci niga e̱e̱ggi̱nnu̱ dooli ciginnek, a̱a̱nyu̱ng atin aragizet kaal ciginnek do̱o̱k.

Abile Pa̱u̱lo̱ zo̱ze̱ ci olli Ga̱la̱ti̱o̱ kokkom kak

8Olli Ga̱la̱ti̱o̱, baling ngen niga i̱do̱ngi̱ a̱gga̱c Ta̱mu̱ta̱dde̱n, e̱e̱ggi̱nnu̱ du̱cca̱k cik ta̱mu̱ta̱dde̱ne̱t cik lo̱o̱tu̱, cik iróng bu̱k i̱ye̱la̱i̱. 9I̱yo̱ko̱ zin, a̱gga̱yyu̱ niga Ta̱mu̱ta̱dde̱n, abarik Ta̱mu̱ta̱dde̱n a̱gga̱yyu̱ng oroot, ma ngen a̱mi̱re̱nnu̱ ki vu̱rru̱t, izet bo̱do̱k du̱cca̱k wak lo̱ti̱nno̱u̱, iróng atin a̱ti̱ri̱zu̱ng. 10Nya ming adakku kwo̱o̱r ci Ya̱u̱do̱ nyelowine, icima e̱rki̱nya̱i̱, icima lo̱lo̱yo̱we̱ ko̱? 11Ko̱to̱ngo̱o̱le̱u̱ng, kicina umurya li̱ngli̱ngo̱ni̱ cinanni ngatinno̱ng.

12Kilalekkung, gotonogga ki ngonogga tu̱we̱nta̱, abait baiz ci aave do̱, iróng idongze ki kaal u̱gge̱, eci anna kabai baiz ki i̱yo̱ko̱ niga i̱do̱ngi̱ ko̱, kabai baiz ci abano ki lo̱ti̱nno̱k, iróng zin anna kadango ki i̱ge̱ta̱. 13A̱gga̱yyu̱ niga ba̱li̱ye̱ anyak ele cinanni ariz i̱i̱te̱ne̱ bali oowa kanyakku̱ng kaviyak cik abunna ke̱. 14Ma ba̱li̱ye̱ anyak ele ariz ke̱ nu̱nu̱n, anyahakku̱ng piryanzet oroot, iróng zin niga ibbezang icima ottokkang. Abarik adimannang arikkang ce̱e̱z to, eelannang ku̱tu̱gu̱ ki anjilo ci Ta̱mu̱ta̱dde̱no̱, icima Ye̱su̱ Ki̱ri̱sto̱ ele. 15Uk talninet cunno̱ng nga? Ka̱du̱wa̱ zin ming u̱tu̱gu̱zzu̱ niga niko, aarannu wo̱ye̱ niga ebere cuggo̱k kar aanycang annita. 16I̱yo̱ko̱ kiize mo̱dde̱ni̱t cunno̱ng ngati ka̱du̱wa̱kku̱ng zoz wa een de̱de̱?

17Imma de̱me̱zzo̱wa̱ wak a̱ti̱yye̱ ol tu̱, orong kar elemtta niga zoz cinne̱ng, ma̱i̱je̱ ngatu zoz ci anyak nege zi̱nze̱tti̱nne̱ iróng abunna. Orong nege kengerttaung ngatinanni kar u̱zu̱tte̱ zoz cinne̱ng do̱ niko. 18Ming orong e̱e̱ti̱ imma ku̱tu̱gu̱we̱u̱ng i̱ge̱t gi̱i̱ ci abunna, iróng gerza, abarik anyik ku̱tu̱gu̱ odohize, anyik ku̱tu̱gu̱ zinine ci voori ming iróng karume ki i̱ge̱ta̱. 19Eeh, dooli cigannik tu̱we̱nta̱, kapirna zo̱ze̱ cunno̱ng kiwagon ngaa ci anyakce a̱u̱ce̱ do̱le̱c ngati orong ukcane. Kapirna zo̱ze̱ necu zee kar zoz ci Ki̱ri̱sto̱ ka̱vvu̱ zi̱nze̱tti̱nne̱ cuggo̱k. 20Korongi wo̱ye̱ ka̱vvu̱ orgene cunno̱ng i̱yo̱ko̱ niko, kar kozoz ju̱rru̱m, eci reen looci, iróng anna ka̱gga̱ gool ci wo̱ye̱ keelannung.

Zoz ci i̱ya̱bzo̱ni̱k ngaa ci een Hagar ki Sarah

21I̱yo̱ko̱ zin, anyak ol u̱gge̱ ngatinno̱ng orong ku̱zu̱tte̱ lo̱ti̱nno̱k wak Musesi. A̱gga̱yyu̱ keng ci lo̱ti̱nno̱k ne̱ke̱? 22E̱he̱rye̱ bo̱do̱k zoz cu Warage ci Ta̱mu̱ta̱dde̱no̱, azi ne, anyak Aburahami logoz rama, a̱rri̱ta̱ do̱le̱c co̱de̱ buuwecci ci een du̱ca̱i̱t, een zara Hagar,#4:22 Hagar: Ikeb zoz ci obod ki Hagar buwe ciKananet 16:1-16; 21:7-17. okko co̱de̱ a̱rri̱ta̱ ngaawe cinne Sarah#4:22 Sarah: Een Sarah ngaa ci Aburahami kar bo̱do̱k kize e̱e̱ti̱ I̱sa̱ko̱. Ikeb zoz cu buwe ciKananet 12-25.. 23A̱rri̱ta̱i̱ ngerrti du̱ca̱kto̱ ko̱ go̱o̱le̱ ci orong e̱e̱ti̱ ci diiri, okko ngerrti ngaa ci ce̱e̱zu̱ ko̱, a̱rri̱ta̱i̱ go̱o̱le̱ ci u̱du̱wa̱ Ta̱mu̱ta̱dde̱n.

24Anyak zoz necu ungec ci aave do̱. Een olomi ci ngaai ne̱k e̱e̱ggi̱n rama ko̱ yabzinet. Een Hagari wa een du̱ca̱i̱t i̱ya̱bzo̱ni̱k olomnya balik o̱o̱wu̱ u̱tu̱gu̱we̱k Ta̱mu̱ta̱dde̱n Muses biye ci een Sinai. Ovvo dooli cik a̱rri̱ta̱ enne ko̱ e̱e̱ggi̱n du̱cca̱k. 25Ogon buuwecci ci een Hagar ki bee ci een Sinai bali aanyik Ta̱mu̱ta̱dde̱n ol lo̱ti̱nno̱k ke̱, lo̱o̱ce̱ ci een zara Arabiya, i̱ya̱bzo̱ni̱k orog ci Jerusalemi, eci ol ne̱ke̱ do̱o̱k e̱e̱ggi̱n du̱cca̱k. 26Ma̱i̱je̱ ngaa ci een zara Sarah ko̱, i̱ya̱bzo̱ni̱k nonno orogi ci een Jerusalem tu̱we̱nta̱ ci aave ta̱mu̱-kenga, ci i̱llo̱i̱ e̱e̱t imma ci een du̱ca̱i̱t. Een enne e̱e̱ti̱nna̱, ol wak a̱tu̱ Ye̱su̱ do̱o̱k, 27eci eher a̱ri̱to̱i̱ti̱ wa een zara Isaya zoz ci azi ne,

“Talo, i̱nna̱ ngaa ci abili ba̱li̱ye̱ ko̱, a̱li̱lo̱,

i̱nna̱ ngaa ci ngen i̱i̱te̱n imma nyak do̱le̱c, i̱yo̱ko̱,

okko atin i̱nna̱ anyai dooli cik meelek

ommogi atin ngaa wa a̱rri̱t bali reena.”#Isaya 54:1

28Imma niga gotonogget ki ngonogget tu̱we̱nta̱, kogon naga ki dooli cik Sarah, ki i̱yo̱ko̱ I̱sa̱ko̱,#4:28 I̱sa̱ko̱: Een enne do̱le̱c ci bali u̱du̱wa̱ Ta̱mu̱ta̱dde̱n azi ne, kanyik Aburaham. IkebKananet 17-35. eci a̱rri̱ta̱i̱ go̱o̱le̱ ci u̱du̱wa̱k Ta̱mu̱ta̱dde̱n Aburaham. 29Imma i̱yo̱ko̱, okko do̱le̱c ci a̱rri̱ta̱i̱ go̱o̱le̱ ci orong e̱e̱ti̱ ci diiri, a̱gi̱d atin do̱le̱c ci a̱rri̱ta̱i̱ Vongize ci A̱li̱le̱. Ogon ol kaal ne̱ko̱ rok i̱yo̱ko̱.

30E̱he̱rye̱ zoz necu Warage ci Ta̱mu̱ta̱dde̱no̱ azi ne, “Ottok la̱ngi̱ze̱ni̱t cu ki ngerinne koot, eci ngerrti ngaa ci een du̱ca̱i̱t ko̱ iróng atin okko ozol kaal cik okko ngerrti ngaa wa een manyi ce̱e̱z ko̱ aragizi.”#Kananet 21:10 31Izikto zin ju̱rru̱m, gotonogga ki ngonogga tu̱we̱nta̱, ke̱e̱ggi̱n naga dooli cik ngaa ci een manyi ce̱e̱z, Sarah, iróng ke̱e̱ggi̱n dooli cik ngaa bali een du̱ca̱i̱t ke̱.

Currently Selected:

Ga̱la̱ti̱a̱ 4: tex

Highlight

Copy

Compare