Kada Bulawan 17
17
1La'biranmo to sangtimbu'ra nande makase,
apa manyaman to penawa,
na ia to kande simalunda' buda llan bola,
apa sipura bangki'.
2Ia to kaunan mandalan pangtangngaranna wa'ding ngkuasai anakkana puangna to mangpakasiri',
na nnampa' toda manah joo kaunan sola sile'tona joo pea.
3Ia to bulawan sola pera' disa'po dinii nnissenni kumua massangraka,
apa ia to penawanta' Puang Allataala nnujii.
4Ia to togaja' ngkabudai pangpatuju sala,
na ia topangnguraga nakabudai mpesa'dingngi kada mesolangan.
5Inda to mpetawa-tawai tokaasi-asi,
te'da naangga' Puang Allataala to mpadenni.
Inda to mpumario kamasussanna tau laen,
nang la nnampa' pangsessa.
6Ia to napumarannu tomatua iamo to anak ampona,
na ia to napumarannu anak iamo to tomatuanna.
7Te'da nasipato' to todiangga' mpau kada pangnguraga,
ia pissenraka na la sipato' to tobango' mpau kada keangga'.
8Den tau ssangai kumua ia to doi' sogo' wa'ding mpaden apa mejangngaran,
na ia joo doi' sogo' wa'ding mpajaji sininna apa.
9Ia ke taaddampanganni to tau,
battuananna tapakamoja'i,
apa ia ke tuli mpauki' salana tau,
mpasisarakki' kasisobaran.
10La'bih keangga' to mesa' pangpakainga' lako tomapahang,
na ia to pessaratuh perambi lako tobattuk.
11Ia to togaja' panggaukan ia manda napugauk to mpaden kamarongkan,
apa la naratui kamatean butung tomaparrang ssessai.
12La'biranmo to sitammu asu lampung ta'de anakkana,
na ia to sitammu tobattuk mangpanggaukan bango'.
13Inda-inda mpabalahhi kagajatan to kameloan,
tatta'i sibola kagajatan.
14Ia to tompamulai massite'geh,
pada to llo'po' lalan wai,
iamo joo la'biran salai bangmi,
danggi' naden kasiboboran.
15Nakaba'ci Puang Allataala to tontonganan tomangpanggaukan sala
na mpasala totangsala.
16Te'da bua'na to tobattuk mpura-pura doi'na nnangah kamaccan,
nasaba' tangmelo pangpikkirisanna.
17Ia to soba' da'tan mpakamoja' soba'na,
na ia to sile'tota' turu' masussa ke masussaki'. #17:17 Wa'ding too dipahang kumua: na butung sile'tota' ke naratuiki' kamasussan.
18Ia to tomangjanji mpangngakui mbajaran indanna padanna rupa tau,
iamo tote'da akkalanna.
19Ia to tongkabudai massite'geh,
pada to ngkabudai mpugauk dosa,
na ia to tomatampo bang mangkada,
nang la macilaka.
20Ia to tomajekkong te'da nalamanyaman katuoanna,
na ia to pangnguraga la nnampa' cilaka.
21Ia to pea battuk mpamasse penawanna ambe'na,
na pea matojo ssussai tomatuanna.
22Ia to penawa masannang mpamauku kale,
apa ia to penawa masussa, mpamakojo' kale.
23Ia to tomangra'tah majekkong, ntarima buni doi' sogo'
na te'da namaruruh mangra'tah.
24Ia to tujunna to tomatarruh pangpikkirisanna iamo to la nnampa' kamaccan,
apa ia to tobattuk te'da mattantu tujunna.
25Ia to pea battuk ssussai ambe'na,
na mpamasse penawanna indona.
26Te'da nasipato' didosa to totangsala,
te'da too nasipato' ke ditundunni to tomala'bih.
27Te'da nabuda kada to toden kapaissenanna
na matana bang penawanna to tomapahang.
28Moi namesa'i tobango', la disanga too macca, ke te'dai nabuda kada,
na disanga tomapahang ke kamma' bangngi.
Currently Selected:
Kada Bulawan 17: mvpAD
Highlight
Share
Compare
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
