Kada Bulawan 16
16
1Ia to tolino wa'ding mangngatta llan penawanna,
apa Puang Allataala mpattantui jajiraka te'daraka.
2Ia to tau pada nasanga melo to napugauk,
apa Puang Allataala to nnissenni to llan penawanna tau.
3Rannuan lakoi Puang Allataala to sininna la mupugauk,
nakeassele' to muakkattai.
4Sininna to Napugauk Puang Allataala, pada den tujunna,
na ia to dipatujuan togaja', iamo to la dilanynya'i.
5Sininna to tomatampo Nakaba'ci Puang Allataala,
na nang te'da Naeloranni la'pah jio mai pangsessa.
6Ia to tomamase na dikatappa'i,
la diaddampangan.
Mpamambelai kalena jio mai panggaukan gaja',
nasaba' ngkalaja' ngkasiri'i Puang Allataala.
7Ia ke napumasannangngi penawan-Na Puang Allataala to panggaukanmu,
moi ewamu Napasisoba'moko.
8La'biranmo to ci'di'ra pallolongan,
apa diala maruruh,
na ia to buda pallolongan,
apa diala tangmaruruh.
9Wa'ding bang mangngatta to tolino la mangpugauk,
apa Puang Allataalara to mpattantui to lalan katuoanna.
10Pangra'tah jio mai Allataala to napau raja,
iamo nate'da nasala ke mangra'tahhi.
11Nakabudai Puang Allataala dikua namaruruh mangdangkang to tau,
moi ke mpakei litere' sola dacing te'da nadipakande.
12Nakaba'ci raja to sipa' gaja',
sanga kamakassingan napumawatang kaparentan.
13Napumasannang raja to kada tongan,
na nakamasei to tomaruruh mangkada.
14Ia ke magallii to raja, mbai naden tau la dipatei,
apa wa'ding napapaja tomacca to kamabirisanna raja.
15Ia ke mabarakka'i lindona raja, mpaden katuoan melo,
na kameloan penawanna butung saleu' mparatu uran ke pealloanni.
16La'bih melo to kamaccan, na ia to nnampa' bulawan,
nnampa' kamapahangan la'bih keangga', na ia to nnampa' pera'.
17Ia to tomaruruh penawanna te'da namadoang mangpanggaukan gaja',
ia to tau njagai kalena jio mai kagajatan mparakai sunga'na.
18Ia to tomatampo la nnampa' kamasolangan,
na to tomajao penawa la dilanynya'i.
19La'biranmo to mpamajiong penawa tasisoba' to te'da ewananna,
na ia to turu' ssitawa-tawai ewanan narampa tomatampo.
20Parinawai to kada diajaranko,
muampa' kameloan.
Matappa'ko lako Puang Allataala,
mumaupa'.
21Ia to tomacca disanga tomadoi' mapahang,
manyaman disa'ding ke mangkadai na dikatappa'i to kadanna.
22Ia to mandalan pangtangngaran iamo garonto' katuoanna to tonnampuii,
apa ia to tobango' nasessa ia kabangosanna.
23Pangpikkirisanna to tomacca mpamaccai mangkada-kada,
na dikatappa'i to napangngajaran.
24Ia to kada melo butung canik,
macanning na mepamaleke.
25 #
Bulawan 14:12
Den tau nasanga melo to apa napugauk,
apa cappa'na mebawa lako kamatean.
26La mengkaja to tau sanga tangbarahhi,
nasaba' kaparalluan ba'tang mparuku tau mangjama.
27Ia to tote'da bua'na mpangngattai bang ncilakai padanna rupa tau,
na ia to kadanna gaja gaja', butung api manglaka-laka ssolangan tau.
28Ia to tomajekkong mpaden kasisakkan,
ia to tompau sala bang tau, mpasisarak tosisoba'.
29Ia to tomasa'ga' mpamale sala padanna rupa tau,
nabawai lako ngenan abala'.
30Ia to tomangkidi' mata, mpangngattai kagajatan,
na inda tonnammang arena, mpugaukmo kagajatan.
31Ia to uban butung songko' maballo,
natarima tonturu' pakkaeloran-Na Puang Allataala.
32Laqbiranmo tosabbara' na ia tomakuasa,
na la'biranmo to ngkuasai kale na ia to ngkuasai kota.
33Ia to madoang nnissen assele'na nalotereii,
apa Puang Allataala mandara to mpattantui assele'na.
Currently Selected:
Kada Bulawan 16: mvpAD
Highlight
Share
Compare
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
