1 CORINTHIANS 12

Mo ab t‑mahkch g gewkdag g Hekia S‑apꞌekam Gewkdag

1Ab am wa ep ni‑kakke ab amjed hegai gewkdag mo g Hekia S‑apꞌekam Gewkdag ab t‑mahkch matt ab aꞌai wo i t‑wehmajk. Tatchua ani mamt wo s‑mahchk g wohokam ab amjed ihda. 2Idani am hahawa s‑mahch mam wa haꞌichukaj am i e wanimed mam eda ab has ha elid mam haschu i chum jijoshchud. 3K wabshaba pi d Hekia S‑apꞌekam Gewkdag ch am i em‑wanimed namt wa ge e nako mams wo wohokamch mo g Jesus d Jiosh. Hegam mo pi edgid g Hekia S‑apꞌekam Gewkdag o hab elid mo g Jesus am gawulkdas ab Jiosh t amjed. Kuch wabshaba ahchim mach edgid s‑mahch mo g Jesus d Jiosh.

4Ab o t‑mahkch g Hekia S‑apꞌekam Gewkdag g gewkdag matt hab wo junihid g nahnko mahs haꞌichu am wehhejed g Jiosh. 5K g t‑kownalig Jesus am apꞌechudch matt has masma am hab wo junihid. 6K d nahnko mahs chikpan mach am hab junihim ch wabshaba wehs ab d amjedkamaj g Jiosh.

7Heg o ab t‑mahkch g Hekia S‑apꞌekam Gewkdag. K id am t‑gewpkadch ch ab heheꞌejel t‑mahkch matt has wo t‑junihid ch am aꞌai wo i t‑wehmajk. Kuch s‑mahch mo am t‑eꞌeda g Hekia S‑apꞌekam Gewkdag no pi ab t‑mahkch g gewkdag. 8Ab o haꞌijj t‑mahkch matt wo s‑chu aꞌamichud k am wo tashogi g s‑hasig haꞌichu ch ab haꞌijj t‑mahkch matt wo si s‑mahchk ch ahgachugad g Jiosh haꞌichu ahga. 9Ab o haꞌijj t‑mahkch g geꞌe wohochudadag ch ab haꞌijj t‑mahkch matt wo ha doaj 10o g s‑hasig haꞌichu hab ep wo junihid. Ab o haꞌijj heheꞌejel t‑mahkch g haꞌichu e‑ahga matt wo ahgad ch ab haꞌijj t‑mahkch matt wo neneokad g pi t‑machiga neꞌokikaj ch ab haꞌijj t‑mahkch matt wabsh wo s‑amich hegam neꞌoki k am wo i tashogi k ch ab haꞌijj t‑mahkch matt wo s‑mahchk mo haschu ahga ab amjed g Hekia S‑apꞌekam Gewkdag ch haschu pi ab hu amjed. 11Neh, wehs ihda o ab d amjedkamaj g Hekia S‑apꞌekam Gewkdag. K heg ab heheꞌejel t‑mahkch mo has i mahs chikpan am hab s‑junimk ab gai t‑wuhshanim.

Mach d hemako am i t‑wehnadk g t‑doꞌibiakam

12S‑mahch ach mo g t‑honshpadag muꞌi nahnko chuhchuꞌidag ch wabshaba d waꞌi hemako. Kuch hab wa masma wehsijj d hemako ahchim matt ab i t‑wehnad g Christ. 13Muꞌijj am hi wa pi d Tutuligo. Tt wabshaba pi wo t‑nako machs hab wo chei mam pi d t‑wehm wohochuddam. Haꞌijj am hi wa d nenehol. K wabshaba pi has d ahga mam has i mahs ch ab i s‑wohoch g Jiosh. Heg at wehsijj ab i t‑hemakoch. K hahawa heg wa wepo mach d Jesus honshpadag. K g Hekia S‑apꞌekam Gewkdag wehsijj an t‑uꞌukch.

14Kuch eda nahnko mahs haꞌichu chikpan hab masma mo g nahnko chuhchuꞌidaj g t‑honshpadag. 15T‑tahtad o pi wepo haꞌichu hab wua mo g t‑nohnhoi. Kuch wabshaba wehs ha tatchua. 16K g t‑nahnk gawul haꞌichu hab wua mo g t‑wuhpui. 17Kuch wabshaba wehs ha tatchua natt ge has masma haꞌichu wo kah mattp pi wo sha ha nahnkk ch pi has masma wo hewagi mattp pi wo sha ha dahkk. 18Jiosh at am nahto g oꞌodham k hab masma hab juh g nahnko chuhchuꞌidag ab t‑honshpadag ab. 19-20K wehs ab i e wehnadch g hab t‑chuhchuꞌidag no pi d hemako g t‑honshpadag.

21Pi ach hegam waꞌi tatchua t‑wuhpui ch wabshaba g t‑nohnhoi ehp k ch pi heg waꞌi tatchua t‑moꞌo ch wabshaba g t‑tahtad ehp. 22Haꞌi o pi gewpkdag g hab t‑chuhchuꞌidag ch wabshaba hab wa masma d si t‑tatchui. 23Kuch s‑ap ha nuhkud ch ha maꞌishch mat pi wo mahsk hegam hab chuhchuꞌidag mo pi ta neidagma. 24Pi ach hab masma s‑ha nenꞌoid hegam hab chuhchuꞌidag mo pi has d ahga mat wo e neidad. 25Wehs ach ha tatchua g hab t‑chuhchuꞌidag mat wehs e wehm s‑ap wo chikpanad. 26Pegih, bach wa masma chum t‑wehm s‑ap chikpan ch wehs t‑wehm wo t‑shoꞌigch mattp hema haꞌichukaj wo t‑shoꞌigch. Kutt wehs t‑wehm wo s‑hehgigk mamtp hema ab wo si s‑ap has t‑ah.

27Pegih, wehsijj ach d hemako g Jesus Christ wehm ch heg wa wepo mach d honshpadaj ch heheꞌejel d nahnko chuhchuꞌidaj. 28Jiosh at wehs ab i t‑mahkhi matt haschu hab wo junidahid. K id d si wehs ha dahm t‑chikpan mach haꞌi d Jesus Christ chuhchai ch am ahgachugch g haꞌichu ahga ab amjed. K id ab oidch d t‑chikpan mach haꞌi d Jiosh haꞌichu ahga i tashogiddam. K id ab oidch d ep t‑chikpan mach haꞌi d Jiosh haꞌichu ahga ha mashchamdam. Haꞌijj ach s‑hasig haꞌichu hab wua ch haꞌijj uꞌukch g gewkdag matt wo ha doaj ch haꞌijj am i ha wehmaj haꞌi ehp ch haꞌijj am haꞌichu aꞌapꞌechud ha shahgid g t‑wehm wohochuddam ch haꞌijj g pi t‑machiga neꞌokikaj neneok.

29Pi att wehsijj gam hu mehk wo ahgachugad g Jiosh haꞌichu ahga ch pi wehsijj d Jiosh haꞌichu ahga i tashogiddam ch pi wehsijj d Jiosh haꞌichu ahga ha mashchamdam ch pi wehsijj uꞌukch g gewkdag matt hab wo junihid g s‑hasig haꞌichu 30o wo ha doaj ch pi wehsijj neneok g pi t‑machiga neꞌokikaj ch pi wehsijj ab mahks g amichudadag matt wo tashogi idam neꞌoki. 31K wabshaba haꞌi idam mahkigdag baꞌich d i ha wehmtadag g t‑wehm wohochuddam. Kutt heg hekaj baꞌich wo i tatchua matt wo hekaj hegam. K eda g pihk elidadag wehs baꞌich d i si haꞌichu.

Currently Selected:

1 CORINTHIANS 12: ood

Highlight

Copy

Compare