ROM 10
10
1Rabela. Lolo domigu nu lengaia haburu kwara vae i God ne vakahiki na gwaloana noi Isrel doluaki. Tigwaravu nu tiutangaroa hurira. 2Vake na vai lai na hago leo hurira, na viti lai kwara rau lengai God haburu. Rau lengaia haburu, vae rahe kikilai bakotoki na hala te kwara rana hagwea. #Bol 22.3 3Rahe taga kikilaki na hala tea hinea i God u taua kwara a tangaloi rana bakoto lo nakona, vae ramo toko vai kwara rana vaira siboga rana bakoto. Huri hi rahe hivokinira te kwara rana huri na hala hi i God mo taua kwara rana bakoto lo nakona. #Rom 9.31-32 4Vae i Kraes u vakakukwere na boloki na Tangwata, kwara vae a tangaloi hinea rana hauhuri lui Kraes, rana kwareki a tangaloi bakoto lo nako i God. #Mat 5.17; Sione 3.18; Hib 8.13
I God u vakahiki na gwaloana noi Isrel mana tangaloi tavalavarea vake
5Lolona i Mosis mo viti huri kwara a Tangwata* ne vai lai a tangaloi rana kwareki a tangaloi bakoto lo nako i God, u viti “A tangaloi hinea rau tuku vai vunuhi na kinau lo leo na Tangwata mo viti, vae rana ahi luna.” #Lev 18.5; Gal 3.12 6Vae a leo huri na hala hinea a tangaloi ramo bakoto lo nako i God huri ramo hauhuri, u dolua. U viti kwara, “Ko hatu domi kwara, ‘?“Ihe vae ne vano tagaulu vaki lolo taetae,” kwara ne lavi Kraes* tegetano?’ #Dut 9.4; 30.12-14 7Ko hatu domi kwara, ‘?“Ihe vae ne vano vaki lo tanotano na tangaloi hinea rau mate ba,” kwara ne lavi Kraes mulemai taliku ne ahi?’ ” 8A leona bakotoki u viti “A leo i God u eno maiko ba. Aia lo ringomu, aia lolo domimu.” A leo hika a leo na hauhuriana, hinea kemo toko heretuvakinia. 9Diko ku matangwasaraki Jisas kina ringomu kwara aia a nomu Hugwe*, vake diko ku hauhuri lolo domimu kwara i God u rakatia tina mateana, vae i God ne vakahikinigo kona ahi. 10Lolona hinea tau hauhuri luna lolo domida, i God u vaikita tau kwareki a tangaloi bakoto lo nakona. Vake lolona tau matangwasarakinia kina ringoda, i God u vakahikikita. 11A Uliuli* Kokona u viti kwara, “Aira vunu hinea rau hauhuri luna, vae ranahe maemae tea.” #Aes 28.16; Rom 9.33 12A leoki hika u kwali gogoloki na tangaloi savia, venaha diko ratuaki a gwaloana noi Isrel*, ratuaki a tangaloi tavalavarea, vae i God aia a noga Hugwe doluakinira, u vaivai karea haburu maira doluakinira hinea ramo toko kware doroa. #Bol 10.34; 15.9 13Hoki na Uliuli Kokona mo viti kwara, “Aira hinea rau kware doro na Hugwe i God, ramo viti na hinana, vae ne vakahikinira.” #Joel 2.32
14-15?Vae diko i God he hora na tangaloi tea, vae a tangaloi vano hi rana heretuvaki na Roro Karea kworohokinia lakwa na tangaloi? ?Vunu diko a tangaloi he heretuvaki na Roro Karea tea hi, vae a tangaloi vano hi rana rongo kworohoki na Roro Karea hi? ?Vunu diko a tangaloi rahe rongo na Roro Karea tea hi, vae rana hauhuri kworohokinia luna? ?Vunu diko rahe hauhuri tea luna, vae rana kware doro i God kworohokinia kwara ne hago maira? Huri hi a Uliuli Kokona mo viti kwara, “A kinau hika u karea haburu, hinea a tangaloi ramo vanamai kwara rana heretuvaki na Roro Karea lakwakita.” #Aes 52.7; Neham 1.15; Eves 6.15 16Vae hete tangaloi savia kwara rau hauhuri lo Roro Karea hi. Hoki na leo nona tangaloi* duruduruki i Aesaea hinea mo vitia tuai kwara, “Hugwe i God. A tangaloi he rusa tea kwara rau hauhuri lo kinau hi kemo viti.” #Aes 53.1; Sione 12.38 17A tangaloi rau rongo na Roro Karea hi, rau tuku hauhuri lui God. Vake rau rongo na Roro Karea hi lo leo noi Kraes. #Sione 17.20
18Vae a nogu leo uhiuhi katukwale hika u eno radu nga. ?Kareaki a gwaloana noi Isrel rahe rongo na Roro Karea te hika, diko rau rongoa? Hetea rau rongoa. Hoki na Uliuli Kokona mo viti kwara,
“A leoga u vano tivarea ba,
u vano vataha na mahagweki lo varamana.
A leo hika ramo viti huria,
u maravuti lo gweregwere na varamana.” #Sam 19.4
19Hikani a nogu leo uhiuhi katukwale taliku. ?Kareaki a gwaloana noi Isrel rahe rongo kikilaki tea, diko rau rongo kikilaki? Hetea rau rongo kikilaki. I Mosis aia tomuaki vohoki mo daraki na nogu leo uhiuhi. Mo viti kwara i God aia u viti kwara,
“Na vai na tangaloi
aira hi hete tangaloi vitiviti huri
rana hokikamu,
vae ne kadikamu huri.
Na vai na tangaloi aira hi rau reraka
rana hokikamu
vae tulu ne lologutekinira huri.” #Dut 32.21
20Hikani i Aesaea mo vanovano vake lo leoki, mo viti kwara i God aia u viti kwara,
“Aira hinea rahe soro haroau tea,
vae rau hagweau ba.
Aira hinea rahe uduhuri te kwara,
‘?I God aia ave?’,
i nau nu maravuti maira ba.” #Aes 65.1
21Vae i God u viti lakwa na gwaloana noi Isrel kwara,
“Lolo rani doluaki,
u tinakaki sirovobongi
tarisaki a mataniaho mo soro,
i nau nu hokaki na kabagu
vaki mana tangaloi
hinea rahe rongohuriau tea,
vae rau vanovano
lo hala na domiga siboga
vataha na taroki.” #Aes 65.2
Currently Selected:
ROM 10: HWT
Highlight
Share
Copy
Want to have your highlights saved across all your devices? Sign up or sign in
Havakinau New Testament © Bible Society of the South Pacific, 2016.
