ROM 5

I God u vaikita tamo bakoto lo nakona

1Karea, huri na noda hauhuriana i God mo vaikita tamo bakoto lo nakona. Vae huri hi mo tangwatahakikita mai God lalahi na noda Hugwe* i Jisas Kraes*. #Rom 3.24,28 2Vake kina noda hauhuriana mo lavikita vaki lo tokaana aia hika tamo toka luna, hinea i God mo hago maikita kina nona domi tabetabe lakua. Hika u havutikita huri a domida mo tu lo domidomi hika kwara vae tana hagwe na karekarea noi God lo noda tokaana. #Eves 2.18; 3.12 3Vae ne havutikita vake lo noda rongoana hati huri tau kikilai kwara a rongoana hati u vaikita tamo huira, a domida mo bua. #Sem 1.2-3; 1 Pita 1.5-7 4Vake a domi bua i God u lagwa luna. Vunu lolona i God mo lagwa maikita mo vai na domida mo tu mo madi luna. 5Vake a domida mo tu mo madi lui God, vae tahe maemae tea, huri tigwaravu i God u vosangikita kwara u lagwa haburu maikita. A Tanungwe Kokona hinea i God mo betea lakwakita, aia u tuku vaikita tamo kikilai na nona lagwaana lolo domida. #Sam 22.5; 25.20; Hib 6.18-19

6Lolona hi a noda kaihago tikei kwara ne vaikita tana bakoto lo nako i God, i Kraes mo mate kwara ne hago maikita a tangaloi vaivai hati. Mo mate lo taroki bakotoki vohoki hinea i God mo mataia. 7Diko a tangaloi u mate kwara ne vakahiki na tangaloi hinea u huri na hala na Tangwata* u bakoto, hi a kinau madi haburu. Vae te tangaloiki eia kwara ne mate huri na tangaloi karea. 8Vae i God u vosangi kwara u lagwa maikita haburu huri lolona hi i kita lo hatiki radu nga, i Kraes mo mate hurikita. #Sione 3.16; 1 Sione 4.10 9Vae huri a dai i Kraes mo huki, i God mo vaikita tamo bakoto lo nakona. Mo matangwasara vakevake kwara huri mo mate, mo vakahikikita, vae i God nehe arekikita tea. #Rom 1.18; 2.5,8 10Tomua i kita tau kwareki a tavaluivuro noi God, vae huri i Natuna mo mate, i God mo vaikita tamo kwareki a nona buluana. Vae hikani i kita tamo kwareki a buluana noi God, u matangwasara vakevake kwara huri i Kraes u ahi, vake u toka luda, vae ne vakahikikita. #Rom 8.7-8 11Vae hete aia hi kehekeheki. U havutikita huri na kinau hinea i God mo vai lalahi na noda Hugwe i Jisas Kraes, hinea mo vaikita hika tamo kwareki a buluana noi God.

I Atam mai Jisas Kraes

12Tomua halaradu, a hatiana u vanamai tilo varamana lo tangaloi katukwale vohoki. Vae huri mo vai na vaivai hati mo mate. A duvi na hatiana hi, a mateana mo kwalao vunuhi na tangaloi lo varamana, huri a tangaloi doluaki rau vai na vaivai hati. #a Jen 2.17; 3.6,19; b Rom 6.23 13Tarisaki lo taro i God mo tau na Tangwata*, vunuhi na tangaloi lo varamana rau tuku vai na vaivai hati. Vae lolona hi a tangwata tikei radu nga, i God he ulibibi na noga vaivai hati tea. #Rom 4.15 14Vae u tinakaki lo taro hi lui Atam vaki lo taro i Mosis, doluaki na tangaloi ramo toko mate. Venaha diko a tangaloi te ratuaki rahe vaivai hati te lo halaki hokinia hi i Atam mo vai luna hi mo galo lo leo noi God, vae rau mate.

I Atam aia a nunu na tangaloi kwara vae ne vanamai takuni tiua, aia hi i Jisas. #1 Kor 15.21-22,45 15Vae i rarua raru he taritarisa tea, huri a hilehile noi God aia he hoki na vai vakasileana tea noi Atam. Kareaki a tangaloi u rusa ramo mate huri na vakasileana nona tangaloi katukwale hi. Vae a domi tabetabe lakua noi God u lakua siletia, vake a nona hilehile u lakua haburu. A hilehile hi u hile vuroki lakwa na tangaloi rusa lo domi tabetabe lakua nona tangaloi katukwale vohoki, i Jisas Kraes*. 16Vake a hilehile noi God mana vakasileana nona tangaloi katukwale hinea tuai mo vaia, raru he taritarisa tea. Takuni tina vakasileana nona tangaloi katukwale hi, i God mo areki na tangaloi mo viti “Tulu he bakoto te lo nakogu, vae tulu ne kwali na kakadiki huri.” Vae takuni tina vakasiliana rusa nona tangaloi, lo domi tabetabe lakua noi God, mo hile na nona hilehile lakwara mo viti “Tulu bakoto lo nakogu, nanahe arekikamu tea.” 17Kareaki, huri a tangaloi katukwale mo galo lo korokoro, vunu a mateana mo luluvi na vanua vunuhia. Vae a havakinau a tangaloi kairuaki aia hi i Jisas Kraes mo vai, u lakua haburu siletia hi. Lalahia i God u hago mana tangaloi rusa kina nona domi tabetabe lakua. Mo hile na nona hilehile lakwara hinea mo viti kwara rana bakoto lo nakona, vae rana gui na hatiki rana ahi vaki tuai.

18Vae huri a tangaloi katukwale mo galo lo korokoro, i God mo areki na tangaloi doluaki, mo viti kwara rahe bakoto te lo nakona, vae rana kwali na kakadiki huri. Vae lo hala hokinia hi a doridori bakoto nona tangaloi kairuaki mo vai na tangaloi doluaki ramo bakoto lo nako i God, vae he arekinira tea, mo hile na ahiana lakwara. #1 Kor 15.22 19Kina rongo bulabula nona tangaloi katukwale vohoki, u rusa ramo mulemai kina tangaloi vaivai hati. Vae lo halaki hokinia hi, kina rongorongohuri nona tangaloi katukwale vohoki, u rusa ranari mulemai kina tangaloi bakoto lo nako i God. #Aes 53.11

20Lolona i God mo tau na Tangwata, vunu a Tangwata hi mori vosangi na tangaloi kina hala rusa huri na hatiki, ramo vaia mo toko lakua. Vae lolona a vaivai hati mo haburu, a domi tabetabe lakua noi God mo lakua vakevake, mo hago mana tangaloi. Vae a nona domi tabetabe lakua u gui na hatiki. #Rom 4.15; 7.8; Gal 3.19 21Tuai a vaivai hati u hugwe koro na tangaloi vae ramo mate kinia. Vae hika a domi tabetabe lakua noi God u hugwe korokita mo vaikita tamo bakoto lo nako i God, mo lavikita vaki lo ahiana vaki tuai lalahi na noda Hugwe* i Jisas Kraes. #Rom 6.23

Currently Selected:

ROM 5: HWT

Highlight

Copy