ROM 3

I God, a doridorina u bakoto tigwaravu

1?Vae kworohokinia maikami a gwaloana noi Isrel*? ?I God he vaivai karea te maikami sileti na tangaloi tavalavarea? ?I God he hago te maikami luna hi kemo lai a kaimatai* lo siosio? 2Hetea. Tigwaravu u hago maikami haburu lo hala rusa. A kinau haburu mo vaia, aia hi mo tau na nona leo lakwakami. #Dut 4.7-8; Sam 103.7; 147.19-20; Rom 9.4 3?Vae diko ratuaki tikami rahe kwiribibi na leo hi tea, vae hi tulu domi kwara i God nehe kwiribibi na leona tea? #Rom 9.6; 11.29; 2 Tim 2.13 4Hetea. A leona u tu tigwaravu. Diko a tangaloi savira aira a tangaloi kurakura, vae i God aia a kareaki he kurakura tea. Hokinia a Uliuli* Kokona mo viti huri God kwara,

“Diko ku kwahakwaha,

ko vosangi kwara i nigo a tangaloi bakoto.

Diko rau tau na leo lumu

vae ko guira.” #a Sam 116.10-11; b Sam 51.4

5?Vae diko a doridorimai hini keu tuku vaira rahe taritarisa tea, u vosangi kwara a doridori i God rau taritarisa tigwaravu, vae kena viti kworoho? ?Kena viti kwara i God u vai vakasile hini mo vai kadikami? Hetea. A leo hika hoki na leo na tangaloi vohoki. 6He taritarisa tea kwara kena viti kwehi. ?Kwara vae diko i God he bakoto tea, ne areki kworohoki na tangaloi na varamana?

7?Vae diko nu kurakura vae a doridorigu hi u tuku tabe hakeki na hina i God huri u matangwasaraki kwara u viti na kinau rau kareaki tigwaravu, vae kworohokinia maiau? ?U taritarisa kwara i God ne arekiau huri, ne viti kwara na kwali na kakadiki huri, diko he taritarisa tea kwehi? U taritarisa kwara ne arekiau huri. 8Kwara vae diko i God he areki laviau te huri, vunu tana viti lai kwara, “Go. Ta vai na kinau lo hatiki, vae a kinau hinea u karea ne vanamai luna.” A tangaloi tuaki kareaki rau kwaha bulakikiau luna hi ramo toko uveau lo kinau aia hi vohoki. Vae i God ne arekinira kwara vae rana kwali na kakadiki huri, hokinia u taritarisa kwara ne vai. #Rom 6.1

A tangaloi tikei kwara u bakoto

9?Tulu domi kwara i kami a gwaloana noi Isrel keu karea sileti na tangaloi tavalavarea? Hete vohoki. Nu vosangi ba lakwakamu kwara a gwaloana noi Isrel* mana tangaloi tavalavarea raru taritarisa, aira vunu tavuti na huirana na vaivai hati. #Rom 1.18—2.24; 3.23 10Hokinia a Uliuli* Kokona mo viti kwara,

“A tangaloi tikei hinea kwara u bakoto,

a tangaloi tikei vohoki. #Sam 14.1-3; 53.1-3; Pri 7.20

11A tangaloi tikei hinea kwara u rongo kikilaki God,

a tangaloi tikei kwara u soro haroa.

12Doluaki na tangaloi rau bohi ti God,

rau vano saloi na hala.

A tangaloi tikei hinea kwara u vai na kinau u karea,

hete kwara te katukwale.

13A kwakwaga aira hoki na gwaru na tangaloi

hinea rahe tanomia tea,

vunu a kinau hati ramo toko vanamai tivarea tiua.

A meaga rau tuku viti na kurakura kehe nga.

A leo hinea ramo ngwalua tina kwakwaga,

aira hoki na kinau hi a mateana luna

hinea u ngwalua tina kwakwa na ngwata hati. #a Sam 5.9; b Sam 140.3

14A kwakwaga u kukwere kina leo rusa

hinea rau hati, rau kelikeli. #Sam 10.7

15Rau vaivai heheri

kwara rana kwohi na tangaloi

a daiga ne hale,

rana ua mateira. #a Aes 59.7-8; b Prov 1.16

16Takwanahavaki hinea ramo lakalakao

rau magaraki na vanua,

rau magaraki na domi na tangaloi vake.

17Rahe kikilai na magemuana te vohoki,

18vake rahe huhui tea

kwara rana vai mavaki God.” #Sam 36.1

19Hika tau kikilai kwara vatavataha na kinau lo Tangwata* u tauana lakwara hi rau hugu tavuti na Tangwata. A Tangwata hi u tu kwara ne tu koro na leo nona tangaloi savira, vake kwara ne vai na hala kwara i God ne areki na tangaloi na varamana doluaki. 20Hete tangaloi kwara u bakoto lo nako i God lo hala hinea u vai na kinau a Tangwata mo viti. A bolokiana nona Tangwata aia hika, u vai na tangaloi mo kikilai kwara a nona hatiana eia. #a Sam 143.2; Gal 2.16; b Rom 7.7

A hala kwara i God ne vai na tangaloi rana bakoto lo nakona

21Vae hika i God u matangwasaraki na nona hala ba kwara ne vai na tangaloi rana bakoto lo nakona. Venaha a leo na Tangwata* mana leo na tangaloi* duruduruki rau hago leo luna, aia he vaia te vohoki kwara te lo hala na Tangwata. #Bol 10.43 22I God u vai na tangaloi rau bakoto lo nakona huri rau hauhuri lui Jisas Kraes*. I God u vai na kinau hi lakwara aira vunu hinea rau hauhuri lui Kraes, huri a tangaloi doluaki rau taritarisa. #Rom 1.17; Gal 2.16 23A tangaloi vunuhia a noga vaivai hati eia, rau vakahao tina karekarea noi God. #Rom 3.9 24Vae lo domi tabetabe lakua noi God, i God u bete na nona hilehile lakwara, u vaira rau bakoto lo nakona, huri rau bulu mai Jisas Kraes hinea mo kasatukuhira tina noga vaivai hati. #a Eves 2.8; b Rom 5.1 25I God u tirakinia kwara ne mate, vae kina daina u vai na hala lakwa na tangaloi kwara vae i God ne domidomi koro na noga hatiana, huri rau hauhuri lui Kraes. I God u vai kwehi kwara ne vosangi kwara aia u bakoto, huri tuai, a domina u bua, vake u taga lakaura mana noga hatiana. #Eves 1.7 26Vae lo taro hikani i God u lai leletiuki na hatiana rusa nona tangaloi savia kwara ne vosangi lakwara kwara aia u bakoto. Lo halaki aia hi i God mo vosangi kwara aia u vai na kinau rau bakoto, vunu u vai na tangaloi savia hinea rau hauhuri lui Jisas rau bakoto lo nakona.

27?Karea, tana domidomikita mana havakinau? A kinau tikei vohoki kwara tana domidomikita luna. ?Vae a havakinau kwara ne tu korokita tana hatu domidomikita? Diko tau vai kwara tana kwiribibi savi na Tangwata, vae a doridori hi he tu koro lavikita tea kwara tana hatu domidomikita. Aia a noda hauhuriana kehekeheki ne tu koro lavi na domidomi hi. #1 Kor 1.31 28Tau kikilai ba kwara i God u vai na tangaloi rau bakoto lo nakona huri rau hauhuri kehekeheki, nehe vaira tea kwara rana bakoto kina Tangwata. #Gal 2.16 29Kwara vae diko hete kwehi, a domianaki kwara i God a God nona gwaloana noi Isrel* kehekeheki. Vae hete kwehi. I God aia a God nona tangaloi tavalavarea vake. #Rom 10.12 30I God aia a God katukwale vohoki. Mo toko vai na gwaloana noi Isrel ramo bakoto lo nakona huri rau hauhuri lui Jisas Kraes. Vake mo vai na tangaloi tavalavarea hokinia nga. #a Dut 6.4; Gal 3.20; b Rom 4.11-12 31?Vae kworohokinia mana Tangwata hika? ?A noda hauhuriana ne vaikita tana tau na Tangwata letiu? Eheo, hete kwehi. Tau vai na Tangwata kwara ne tu ne madi lo tanotanoki. #Mat 5.17; Rom 4.3; 8.4

Currently Selected:

ROM 3: HWT

Highlight

Copy