ROM 15

Hatu domi huriko sibomu, ko domi huri na tangaloi dolua vake

1I kita tau hauhuri u madi u taritarisa kwara tana hago maira hinea rahe huira tea lo noga hauhuriana, ta kwali na noga hagohago mava. Ta hatu domi hurikita siboda. 2Vae vatavatahakikita tana domi huri rabelada, tana vai kinau hinea rau lagwa luna, ne hago maira, kwara rana huira vakevake lo noga hauhuriana, #Rom 14.19; 1 Kor 9.19; 10.24,33 3huri i Kraes* he domi huria tea sibona. A leo hika lo Uliuli* Kokona mo kworo luna, hi mo viti

“A noga leo hati ramo toko vitira vovohiko,

rau vitira vovohiau.” #Sam 69.9

4Savi na leo hinea rau ulira lo Uliuli Kokona tuai, u uliana kwara rana huhuikita, kwara vae a domida ne tu luga, huri a leo hi lo Uliuli Kokona u rakati na domida u vai na domida mo bua. #Rom 4.23-24; 1 Kor 10.11 5A tangaroa karea hika lakwakamu. I God hinea u vai na domimiu mo bua, u rakati na domimiu, vae ne hago maikamu kwara tulu ne domidomi katukwale, huri hi tulu huri na tanoigaru i Jisas Kraes. 6Vunu doluakikamu tabulutaki tulu ne kwahakwaha katukwale tulu ne kaluhaki God hinea a God a Tama na noda Hugwe i Jisas Kraes.

A Roro Karea lakwa na tangaloi tavalavarea

7Tulu lailai tabetabekikamu, hokinia i Kraes* u lai tabetabekikamu ba. A doridori aia hi ne tabe hakeki na hina i God. #Rom 14.1 8Na viti lakwakamu kwara i Kraes u mulemai kina tangaloi boloki mo hago mana gwaloana noi Isrel*. U vai kwehi kwara ne hago mana gwaloana noi Isrel, ne vosangira kwara i God aia u kwiribibi na leona tigwaravu, luna hi mo vai na nona tulikileo mo kworo hinea mo vitira tuai lakwai ratubumai. #a Mat 15.24; b Maeka 7.20; Bol 3.25 9Vunu vake mo vai kwehi kwara vae ne vai na hala huri na tangaloi tavalavarea tina gwaloana noi Isrel rana vai lai rana kaluhaki God huri na nona domi hahakavi. Hokinia a Uliuli Kokona mo viti kwara,

“Vae nari lagwakinigo

lo nako na tangaloi tavalavarea tina gwaloana noi Isrel.

Nari kaho kaluhaki na hinamu.” #a Rom 11.30; b Sam 18.49; d 2 Saml 22.50

10Vunu a Uliuli Kokona mo viti taliku kwara,

“I kamu a tangaloi tavalavarea tina gwaloana noi Isrel,

ne havutikamu mana tangaloi noi God

hinea u mataira ba.” #Dut 32.43

11Vunu taliku mo viti kwara,

“Vunuvunuhikamu hi

a tangaloi tavalavarea

tina gwaloana noi Isrel,

tulu kaluhaki na Hugwe i God.

Vunuvunuhi na tangaloi

tulu kaluhakinia.” #Sam 117.1

12Vunu a tangaloi* duruduruki i Aesaea u viti vake kwara,

“A gwaloana noi Sese

vae ne vanamai.

I God ne tabea

huri kwara ne hugwe koro

na tangaloi tavalavarea

tina gwaloana noi Isrel,

vae aira ranari tau na noga domidomi ne madi luna.” #Aes 11.10; Rev 5.5

13A tangaroa karea hika lakwakamu. I God hinea u vaikamu tulu mo tau na nomiu domidomi mo madi luna ne vaikamu, ne havutikamu haburu, vake ne bete na magemuana lakwakamu, huri tulu hauhuri luna. Vunu a nomiu domidomi ne tu ne madi luna, vae ne huira vakevake lalahi na huirana na Tanungwe Kokona.

A bolokiana noi Pol

14Rabelagu. I nau nu kikilai kwara i kamu a tangaloi karea, tulu kikikila haburu, vae tulu vai lai kwara tulu ne huhuhuikamu muleki. 15Vae lo leta hika nu kwaha u madi huri nu lengaia kwara tulu ne domidomi lo leo aira vano hi taliku. Nu taritarisa kwara nana kwaha maikamu hokinia hi, huri lo domi tabetabe lakua noi God 16mo rivukiau kwara na vai na bolokiana noi Jisas Kraes* maikamu a tangaloi tavalavarea tina gwaloana noi Isrel*. Nu vai boloki hoki na tangaloi* lingilingi, nomo heretuvaki na Roro Karea hi u vanamai ti God, kwara vae i kamu a tangaloi tavalavarea tulu ne hoki na hilehile lakwai God. A Tanungwe Kokona u vaikamu tulu mo kokona, vae i God ne lai tabetabekikamu. #a Rom 11.13; b Vil 2.17 17U taritarisa kwara na domidomiau lo nogu bolokiana lakwai God, huri nu hariki lui Jisas Kraes. 18Na kwaha ne madi maikamu, vae na kwaha kehekeheki lo kinau hinea i Kraes mo vaira lalahiau huri kwara na turukikamu a tangaloi tavalavarea kwara tulu ne rongohuri God. I Kraes u boloki lalahi na nogu leo mana nogu bolokiana. #2 Kor 3.5 19U boloki lalahi na huirana na kaivosangi mana vaisea mana huirana na Tanungwe Kokona. Vae hokinia nomo tinakaki lo gwatuivanua lakua Serusalem nomo vano vaki Ilirikam, vae tigwaravu lo halagu nomo toko heretuvaki na Roro Karea huri Kraes u taritarisa lo vitivitiki. 20A domigu u huira tigwaravu kwara na toko heretuvaki na Roro Karea hi lolo vanua aira hinea rahe rongo i Kraes te radu nga, huri kwara vae na hatu tabe ingwa lo tanotano hi a tangaloi dolua aia u vai raraia ba. #2 Kor 10.15-16 21Hokinia a Uliuli* Kokona mo viti kwara,

“A tangaloi aira hinea a tangaloi tikei

kwara ne viti huria lakwara,

vae rana tagaia.

Aira hinea rahe rongo na rorona te radu nga,

vae rana rongoa rana kikilai.” #Aes 52.15

I Pol u viti terekaki na halana

22Vakarusa a bolokiana vano hi ramo vai koroau, vae nohe venatu lai te vaki maikamu. #Rom 1.10-13 23Vae hika nu vai vunuhi na nogu bolokiana lo vanua laliki hike. Vunu vake nu lengaia haburu kwara na venatu na tagaikamu a hukao rusa rau vano ba. 24Vae huri hi, nu domi kwara nehe tuai tea na venatu na tagaikamu lo halagu vaki Sven. Nu lagwa kwara na hugu maikamu a vula te kairua. Vunu diko nomo ngwalua tikamu, tulu neri hago maiau lo halagu vaki takwa-hi. #1 Kor 16.6 25Vae hika lai nga na va vaki Serusalem na vai boloki lakwa na tangaloi noi God takwa-hi. #Bol 19.21; 20.22 26Na vai kwehi huri savi na kwarelua* lo vanua Masetonia maia Gris rau domi utu ba kwara rana bete a hilehile kwara ne hago mana tangaloi noi God lo gwatuivanua lakua Serusalem hinea rau kakaravika. #1 Kor 16.1; 2 Kor 8.1; 9.2,12 27Aira kehekeheki rau domidomi luna ba kwara rana vai kwehi. Vae kareaki aia hokinia kwara a bukuga eia maira, huri a tangaloi tavalavarea tina gwaloana noi Isrel rau hagwe na tokaana karea lui God lo gwaloana noi Isrel. Vae hikani u taritarisa kwara aira rana hago mana gwaloana noi Isrel lo kinau karekarea hinea ramo hagwe lo noga tokaana lo varamana hika. Vae hokinia hi rana vai utuhi na bukuga hi. #a Rom 9.4; b 1 Kor 9.11 28I nau nari bete vunuhi na mane* hi lakwara hinea a tangaloi tavalavarea ramo vohokinia. Vae na vai na bolokiana hi ne rovo, vunu nari vano vaki Sven. Lo halagu vaki takwa-hi nari tagaikamu. 29Nana maravuti maikamu, vae nu kikilai kwara na lavi na karekarea noi Kraes* hinea rau lalakua karakara, na betera lakwakamu.

30Rabela. Nu seseaka hurikamu lo hina na noda Hugwe* i Jisas Kraes, vake kina lagwaana hinea a Tanungwe Kokona u bete. Na viti lakwakamu kwara tulu ne hariki maiau lo tiutangaroa. Tulu tiutangaroa ne huira lakwai God huriau. #2 Kor 1.11; Vil 1.27; Kol 4.3; 2 Tes 3.1 31Tulu tiutangaroa kwara ne tu koro na ngwera Sutia hinea rahe hauhuri te lui Kraes kwara rana hatu kwohi mateiau. Vake tulu tiutangaroa kwara a nogu bolokiana lo gwatuivanua lakua Serusalem ne taritarisa lo nako na tangaloi noi God takwa-hi, vae rana lagwa luna. 32Lo hala hokinia hi, diko lo domikiana noi God, na maravuti maikamu ne havutiau haburu, vae na lagwalagwa, na mabu maikamu kwara na huira taliku. 33A tangaroa karea hika lakwakamu. I God a gwataki na noda magemuana ne hago maikamu doluaki. Amen*.

Currently Selected:

ROM 15: HWT

Highlight

Copy