ROM 14

Tulu hatu taga kwaheki na doridori i rabelamiu lui Kraes

1Tulu lai tabetabeki na tangaloi hinea maikamu rahe huira tea lo noga hauhuriana lui Kraes*. Vae he karea tea kwara tulu ne viroro maira huri na noga domidomi hinea rau dolua tina nomiu domidomi. #Rom 15.7 2A tangaloi ratuaki hinea rau hauhuri rau kani lai a kinau haro nga, vae a tangaloi tuaki hinea rahe huira tea lo noga hauhuriana rau kani a hinaka tina agoago* kehekeheki. #Jen 1.29; 9.3 3A tangaloi hinea rau kani kinau haro nga rana hatu tagataga veveki rera kina tangaloi hinea rahe vai te kwehi. Vae a tangaloi hinea rau kani a hinaka tina agoago kehekeheki, rana hatu domidomi hati huri na doridori na tangaloi hinea rau kani hinaka haro nga, huri i God u lai tabetabekinira ba. #Kol 2.16 4?I nigo ihe kwara kona taga kwaheki na doridori na tangaloi boloki nona tangaloi dolua? A nona masi sibona aia kehekeheki neri viti lakwae kwara u vai u karea, diko u vai u hati. Vae ne vai ne karea huri a Hugwe* aia u bete huirana lakwae kwara ne vai lai ne vai kwehi. #Mat 7.1; Sem 4.11-12

5A tangaloi ratuaki rau domi kwara a rani tuaki rau kokona rahe hoki na rani te ratuaki vake, vunu a tangaloi ratuaki rau domi kwara doluaki na rani rau taritarisa rahe dolua tea. Vae vatavataha na tangaloi rana domidomi ne karea, katukwale kehe nga lo kinau hika. #Gal 4.10 6Ihe te hinea u domi kwara a rani katukwale u kokona, u vai hokinia hi kwara ne domi mavaki na Hugwe. Ihe te hinea u kani hinaka haro nga u vai hokinia hi kwara ne domi mavaki na Hugwe, vae u lagwaki God huri na kana hinaka. Ihe te hinea u bena kani hinaka tuaki, u vai hokinia hi kwara ne domi mavaki na Hugwe, vae u bete a nona lagwaana lakwai God. 7A tangaloi tikei maikita kwara u hugwe koro na nona tokaana, diko a kana mateana sibona. 8Diko tau toka, tau toka kwara a tangaloi rana kaluhaki na Hugwe. Vake diko tau mate, tau mate kwara a tangaloi rana kaluhaki na Hugwe huri. Tau toka, diko tau mate, i kita a tangaloi nona Hugwe. #Luk 20.38; Gal 2.20; 1 Tes 5.10 9I Kraes mo mate, vunu mo ahi taliku kwara vae ne kwareki a Hugwe nona tangaloi hinea rau toka, maira hinea rau mate vake. 10Vae he taritarisa te kwara i kamu tulu ne domidomi hati huri na doridori i rabelamiu. Vake he taritarisa te kwara tulu ne toko tagataga hati ki rabelamiu. I kita doluaki, vae tana tu lo nako i God, aia neri taga kwaheki na doridorida, #Mat 25.31-32; Bol 17.31; 2 Kor 5.10 11huri a Uliuli* Kokona u viti na leo na Hugwe i God kwara,

“Kareaki hokinia i nau nu toka,

vunuvunuhi na tangaloi

rana sovi hivo koro na nakogu,

vake vunuvunuhi na tangaloi

rana matangwasaraki kwara i nau i God.” #a Aes 49.18; b Aes 45.23; Vil 2.10-11

12Hikani a domianaki kwara vatavatahakikita doluaki tanari matangwasaraki na doridorida siboda lakwai God. #Gal 6.5

Tulu hatu vai rabelamiu ramo sovi

13U karea kwara ta tiraki na doridori aia hika. Ta hatu arearekikita muleki. Vae a kinau kwara tulu ne domidomi luna aia hika. Tulu hatu vai kinau hinea kwara vae ne vai rabelamiu rana tatu luna rana sovi tilolo doridori hati. 14I nau nu hariki lui Jisas Kraes* a nogu Hugwe*, vae huri hi nu kikilai kareaki kwara savi na hinaka rau karea kwara tana kani. A hinaka nehe vaikita tea kwara tana hogora lo nako i God. Vae diko a tangaloi u domi kwara te hinaka ne vaia ne hogora lo nako i God, vae ne hogora kinia kareaki. #Bol 10.15; Taet 1.15 15Vae diko tulu vai belamiu u rongo hati kina hinaka hi tulu mo kani, tulu he bohibohi te lo lagwaana hokinia tuai. A hinaka hinea tulu mo toko kanira, he karea te kwara tulu ne vaira rana magaraki na tangaloi hinea i Kraes u mate huria ba. #1 Kor 8.11-13 16Tulu hatu tiraki na tangaloi ramo kwahakwaha hati vovohi na doridori hi tulu mo toko vaira hinea tulu domi kwara rau karea kehe nga, #Taet 2.5 17huri hete kina hinaka hinea a tangaloi ramo kani mana kinau ramo inu kwara i God ne kwareki a noga Hugwe Lakua. A tangaloi hinea i God aia a noga Hugwe Lakua, aira a tangaloi hinea a Tanungwe Kokona u vaira rau bakoto, rau toka lo magemuana, vake rau lagwalagwa u havutira. 18A tangaloi hinea u boloki lakwai Kraes lo halaki hokinia hi, vae i God u lagwa haburu maia. Vunu a tangaloi vake rana viti huria kwara a nona bolokiana u karea.

19Vae u karea. Tigwaravu ta boloki huri na magemuana, ta hagohago maikita, ta turaturaikita kwara tana huira vakevake. #a Rom 12.18; b Rom 15.2 20Tulu hatu vai kwara a hinaka ne magaraki na bolokiana noi God. Tulu ne kani lai savi na hinaka, vae he taritarisa tea kwara tulu ne kani na kinau hinea vae ne vai na tangaloi tea ne sovi tilo hatiki. 21A kinau u taritarisa lakwakamu kwara tulu ne vai aia hika, kwara tulu ne hatu kani biki, tulu ne hatu inu waen, diko tulu ne hatu vai na kinau te dolua vake hinea kwara ne vai rabelamiu rana sovi. #1 Kor 8.13 22A bohibohimiu lo kinau aira vano hi rau eno lumiu kehekeheki mai God. Vunu diko tulu tuku bohibohi hokinia tulu domi kwara u taritarisa kehe nga, vake tulu he domi te kwara tulu vai kinau rau hati, ne havutikamu. 23Vae diko tulu domi kairua lo kinau hi kwara tulu ne kani, vunu tulu mo kania, i God ne arekikamu luna, huri a doridorimiu he tu tea lo hauhuriana. Te hava doridori hinea tulu hauhuri kwara he taritarisa tea kwara tulu ne vai, vae tulu maraka tulu vai luna, aia hi tulu vai a vaivai hati vovohi God. #Taet 1.15

Currently Selected:

ROM 14: HWT

Highlight

Copy