ROM 1

I Pol u kwaha tabetabe mana ngwera Rom

1I nau i Pol, a tangaloi boloki noi Jisas Kraes*. I nau a kaihora* kokona katukwale, hinea i God u kwareau mo mataiau kwara na heretuvaki na nona Roro Karea. #Bol 9.15; 13.2; Gal 1.15

2Tuai sea, i God u tuliki na Roro Karea hika lalahi na tangaloi* duruduruki rusa ramo ulibibia lo Uliuli* Kokona. #Rom 16.25-26; Taet 1.2 3A Roro Karea hi aia hinea mo toko viti huri i Natu i God, i Jisas Kraes a noda Hugwe*. Lolona mo mulemai kina tangaloi mo vora vanamai lo gwaloana noi Devit. #a Mat 22.42; 2 Tim 2.8; b Rom 9.5 4Vunu vake luna hi mo kwareki a tangaloi kokona noi God, i God u vosangia kina nona huirana lakua kwara i Jisas aia i Natuna, luna hi mo rakatia taliku tina mateana. #Bol 13.33 5Lo domi tabetabe lakua noi God, i God aia u lalahi Kraes huri kwara ne vaikami kena kwareki a kaihora kokona kwara kena tabe hakeki na hina i Kraes. U vai kwehi kwara kena boloki nona, vae kena tomuaki na tangaloi savia vataha na vanua rana hauhuri luna vake rana rongohuria. #Bol 26.16-18; Rom 15.18; Gal 2.7,9 6A bolokiana hi u hagwekamu vake lo gwatuivanua lakua Rom hinea i God u kwarekamu ba kwara tulu ne kwareki a tangaloi noi Jisas Kraes.

7Vae hokinia hi ramo uli na leo hika lakwakamu doluaki takwa-hi Rom hinea i God u lagwa haburu maikamu, mo kwarekamu kwara tulu ne kwareki bulana tangaloi kokona.

A tangaroa karea hika lakwakamu. I God i Tamada mai Jisas Kraes a noda Hugwe, raru ne hago maikamu kina nogaru domi tabetabe lakua, vake raru ne bete na magemuana ne eno maikamu. #a 1 Kor 1.2; 2 Kor 1.1; b Nam 6.25-26; 1 Kor 1.3; 2 Kor 1.2

I Pol u lengaia kwara ne tagai na ngwera Rom

8Tomuaki nu lengaia kwara na viti, nu lagwaki na nogu God lo hina i Jisas Kraes hurikamu doluaki, huri a tangaloi savia lo varamana rau rongo kwara tulu hauhuri lui Jisas Kraes*. #1 Tes 1.8 9I God aia hi nomo boloki nona kina domigu doluaki, nomo heretuvaki na Roro Karea huri Natuna, aia neri matangwasaraki lakwakamu kwara a havakinau hi nu viti rau kareaki. U kikilai kwara tigwaravu nu tuku domihagwekamu lo nogu tiutangaroa. #a Vil 1.8; 1 Tes 2.5,10; b Eves 1.16 10Tigwaravu nu tuku uduhuri ki God kwara diko u masinge, aia neri vai na halagu tea nari vanamai nomo tirokikamu te hika lai nga. #Bol 19.21; Rom 15.23,32 11Nu lengaia haburu kwara na tirokikamu kwara tulu ne lavi na hilehile hinea a Tanungwe Kokona ne bete lalahiau, vae ne vaikamu tulu ne huira. 12Vunu vake nu lengaia kwara na bulu maikamu kwara i kamu tulu ne rakati na domigu kina nomiu hauhuriana, hokinia i nau vake nana rakati na domimiu kina nogu hauhuriana.

13Rabela. Nu lengaia kwara tulu ne kikilai kwara tigwaravu nu tuku domidomi kwara na vanamai na tirokikamu, vae a kinau ra va vaivai koroau, vae nahe vai lai tea. Nu lengaia kwara a nogu boloki vae a kwaiki ne eia lo gwatui-vanuamiu hokinia hinea a kwai na nogu boloki mo eia mana tangaloi tavalavarea tina gwaloana noi Isrel* ratuaki. #Sione 15.16 14Nu rongo u mavatiau hoki na buku tea nga, kwara na vai bukua, na hago mana tangaloi savia, aira hinea a tangaloi na gwatuivanua lalakua, mana tangaloi hinea lo utaki, a tangaloi kikikila, vake mana tangaloi hinea rahe kikikila tea. 15Vae huri hi nomo lengaia haburu kwara na heretuvaki na Roro Karea lakwakamu vake takwa-hi Rom.

A huirana na Roro Karea noi Kraes

16I nau nohe maemae tea vohoki kina Roro Karea hika, huri aia a huirana noi God, vae ne vakahiki na tangaloi savia hinea rau hauhuri luna, a gwaloana noi Isrel tomuaki, vunu vake a tangaloi tavalavarea. 17A Roro Karea u matangwasaraki kwara i God mo vai kworohoki na tangaloi ramo bakoto lo nakona. U vai kwehi huri na noga hauhuriana kehekeheki, u tinakaki lo tinatinakakiki vaki lo gwereki. Hokinia a Uliuli* Kokona mo viti kwara, “A tangaloi hinea u bakoto lo nako i God huri u hauhuri, vae aia ne ahi.” #a Rom 3.21-22; b Hab 2.4; Gal 3.11; Hib 10.38

A tangaloi savia rau vakahao ti God

18I God u matangwasaraki kwara u lologuteki na tangaloi huri na doridoriga hinea rahe domi mavakinia tea, vake rau vai a kinau rau hati haburu, vae ne vai kadira huri. A noga hatiana hi u tu koro na vitikareaki. #a Eves 5.6; Kol 3.6; b 2 Tes 2.12 19I God ne vai kadira, huri a kinau aira hinea a tangaloi kwara rana kikilai God luna, rau matangwasara ba, huri i God kehekeheki u matangwasarakinira ba lakwara. #Bol 14.15-17; 17.24-28 20Tahe taga lavi na kinau tea aira hika kina matada. I God aia i God Tatoka, a nona huirana nehe rovo tea, u eno vaki na tuai. Vae mo tinakaki lolona i God mo tau na varamana vaki na hika, i God mo matangwasarakinia sibona lakwakita kwara tana taga kikilakinia lo kinau mo taura lo varamana hika. Huri hi, ranahe viti lavi na kinau te vohoki. #Job 12.7-9; Sam 19.1 21Aira rau kikilai God, vae rahe domi mavakinia tea hokinia u taritarisa lakwara kwara rana vai huri aia i God, vake rahe bete te noga lagwaana lakwae. Vae a domidomiga u reraka, a kinau tikei lolo gwatuga, a domidomiga u kukwere kina dodoki. #Eves 4.17-18 22Rau viti kwara rau kikikila, vae hetea rau reraka haburu. #Jer 10.14; 1 Kor 1.20 23U taritarisa kwara rana domi mavaki i God Tatoka, vae rau maraka rau domi mavaki na takaro vuroki hinea a tangaloi vohoki rau tai dedeki. A kihidede vano hi ratuaki aira hoki na tangaloi hinea vae rana mate lai. Ratuaki aira hoki na manu, ratuaki aira hoki na boboroa, ratuaki aira hoki na ngwata. #Dut 4.15-19; Sam 106.20

24Vae huri a tangaloi rau reraka kwehi, i God u tirakinira kwara rana toko vai na kinau hinea rau hati lo hala na domiga hi rahe karea tea, rana toko vai na maemaeana rusa lakwara muleki. #Bol 14.16 25Ramo tau na vitikareaki huri God letiu, ramo hauhuri lo leo kurakura. Ramo domi mavaki na kinau aira hinea i God mo taura, ramo toko boloki lakwara. Vae rahe domi mavaki God tea hinea mo tau na kinau vano hi, vake rahe boloki tea lakwae. Vae aia kehekeheki u bakoto kwara tana tabe hakeki na hinana tigwaravu. Amen. #a Jer 13.25; 16.19; b Rom 9.5

26Vae huri na kinau vano hi, i God u tirakinira ramo huri lo domiga hinea a maemaeana luna. A ravavine rau bohiki na doridori karea na vavine mana ngwera, ramo toko vai na doridori hi rahe karea tea. 27Vake lo doridoriki hokinia nga, a ngwera vake rau tiraki na doridori karea nona ngwera mana vavine, ramo lengai na ngwera dolua vake. A ngwera rau tuku vai na doridori hi mana ngwera dolua, a maemaeana vohoki. Vae huri na doridori aia hi, rau hagwe a rongoana hati luga, hinea u taritarisa mana doridori vano hi rau hati, ramo toko vaira. #Lev 18.22; 20.13; 1 Kor 6.9

28I God mo tiraki na tangaloi kwara rana vano lo domiga hi rau hati, rana vai kinau rahe taritarisa tea, huri rau bega kwiribibi lolo domiga a havakinau rau kikilai kwara u kareaki huri God. 29Hikani rau kukwere kina doridori hati vatahae, rau vai kinau rau hati, rau lengai na kinau vatahae, rau vai bulabula vovohi na tangaloi. Tigwaravu a kinau u kadikadira, rau uaua mate tangaloi, rau vai vuro mana tangaloi. Rau kurakura, vake rau domi bulakiki na tangaloi, rau kurakuraki leo. 30Rau kwahakwaha hati mulekinira, rau bega ki God, rau barabarahi, rau domidomira, vake tigwaravu rau kwaha kwetukwetutu. Tigwaravu rau domi haro na hala na hatiki dolua vake kwara rana toko vai. Rahe rongohuri tamaga mai retahiga tea. 31Rau galo lo tangwata vae rahe domi huri tea, vake rahe kwiribibi na noga tulikileo tea. Rahe vai tabetabe tea mana tangaloi dolua, vake a hahakaviga tikei. 32Rau kikilai ba kwara a tangwata noi God u viti kwara a tangaloi hinea u tuku vai na doridori hokinia hi, vae ne mate kinia. Vae ra va madimadi lo doridori vano hi ratoko va vaira. Vunu siletia hi, ramo lagwa lo doridori na tangaloi dolua vake hinea rau tuku vai kinau hokinira.

Currently Selected:

ROM 1: HWT

Highlight

Copy