A Bolokiana 28

I Pol u hugu lo vanua Molta

1Keu galo hake keu ahi, kemo rongo kwara a vanua hi u kwareki Molta. 2Hikani a ngwera eia rau vai tabetabekikami haburu. Mo tinakaki mo uha lakua, u kangwkangwa. Hokinia ramo huruki na kabu lakua ramo lai tabetabekikami kemo manihu. #2 Kor 11.27 3I Pol u vile a kahoa mo rako vae mo rasu tilolo kabu hi mo toko kao, a ngwata mo ngwalua tivarea kina ngwangwavia na kabu hi, mo katibibi na kabana. 4A tangaloi na vanua hi ramo tagai na ngwata hi mo katibibi na kaba i Pol, ramo kwahakwaha kinira ramo viti “A tangaloi hi kwara u uaua tangaloi. Vae venahani u kwalao tina navo lalakua, aia vae a takaro ranahe tirakinia tea kwara ne toka.” Rau viti kwehini huri a ngwata hi u kati a tangaloi rau mate kehe nga. 5Vae i Pol mo teraki na ngwata hi tilolo kabu vae he rongo hati te kinia. #Mak 16.18 6Ramo domi kwara vae ne uviki te kinia diko ne sovi ne mate. Ramo toko domidomi hokinia hi, rahe tagai na kinau te vohoki kwara ne vaia, vunu ramo bohi na domiga ramo viti “!Aia hika a takaro!”

7A vanua hika he vakahao te tina tokaki-vanua noi Publias, a hugwe na vanua hi. Aia mo lai tabetabekikami vaki tatana. Vae keu hugu maia a rani kaitolu. 8I tama i Publias aia lo here u lenga u mahaki, vake u vanovanoki dai. I Pol mo soro vaki mana herena mo tiutangaroa maia, mo tau kabana luna, vae mo rongo karea. 9Lolona mo vai kwehi a tangaloi savira hi rau lenga lo vanua hi ramo vanamai, i Pol mo tiutangaroa maira vae ramo ahi. 10Rau bete kareaki na vivilagoki lakwakami. Keu hugu takwa-hi a vula kaitolu. Vunu tiluna kwara kena tiraki na vanua hi, rau bete lakwakami a rengamai kemo lengaia huri na halamai.

I Pol u tiraki na vanua Molta mo vano vaki Rom

11A aga katukwale eia tina gwatuivanua lakua Aleksadria. U hili lo vanua hi Molta lo taro na kangwkangwa. A aga hi rau kwarekinia kina hina na takaro vuroki kairua hi, a malava, i Kasto mai Polakis. A vula kaitolu hi mo rovo kemo galo lo aga hi kemo tiraki. 12Kemo maravuti lo gwatuivanua lakua Saerakus, keu hugu takwa-hi a rani kaitolu. 13Vunu kemo tiraki tina gwatuivanua hi, kemo kwalao kemo maravuti lo gwatuivanua lakua Resiam. Mavukona a malakadua mo here, a rani kairua kemo maravuti lo gwatuivanua lakua hi Puteoli, kemo galo hake. 14Kemo hagwe na tangaloi hauhuri takwa-hi ramo viti lakwakami kwara kena hugu maira a kwiki katukwale. Vae takuni tiua kemo vano vaki lo gwatuivanua lakua Rom. 15A rabela takwa-hi lo gwatuivanua lakua Rom rau rongokami, ramo vanamai u vakahao kwara rana tagaikami lo hala. Tuaki ramo maravuti lo gwatuivanua hi A Tanotano na Hokahokaki Hinaka noi Avias, ratuaki rau maravuti lo gwatuivanua hi A Ingwa na Kanikani Kaitolu. Lolona i Pol mo tagaira, a domina mo huira mo lagwaki God hurira.

I Pol aia lo gwatuivanua lakua Rom

16Kemo maravuti lo gwatuivanua lakua Rom, ramo tiraki Pol kwara ne toka lolo ingwa katukwale kahea mana tangaloi na vuro ne tagataga maia kwara vae ne hatu kwalao. #Bol 24.23; 28.30

17I Pol mo hugu a rani kaitolu mo rovo, mo kware na kaitomuaki nona gwaloana noi Isrel* takwa-hi kwara rana vilevileki tabulutaki rana kwahakwaha. Vunu ramo vileki tabulutaki mo kwaha maira mo viti “Ratua. I nau nahe vai na kinau te vohoki bulakiki vovohi na ngwera tatada, diko bulakiki vovohi na doridori rusa vanamai evina tamo kwiribibira ti ratubuda. Nahe vai na kinau te kwara u hati, vae aira ramo kwiribibiau lo gwatuivanua Serusalem ramo tauau tilo huirana nona ngwera Rom. #Bol 24.12-13; 25.8 18A ngwera Rom ramo uduhuri galilikiau kwara rana hagwe bakotokinia kwara nu vai na havakinau. Rau lengaia kwara rana tirakiau, huri rahe hagwe bakotoki na hatigu tea kwara nana mate luna. #Bol 23.29; 25.25; 26.31-32 19Vae a gwaloana noi Isrel rahe lengaia tea kwara a ngwera Rom rana tirakiau. Hi hokinia u rakati na domigu nu huira vae nomo viti kwara i Sisa* ne tagaiau huri na leo vano hi kwara rau kareaki diko hetea. Vae i nau a kinau tikei kwara na viti lakwae vovohi na ngwera tatagu. #Bol 25.11 20Vae huri hi nomo viti kwara na tagaikamu na kwaha maikamu. Ramo gwaruau kina seni huri i Vurae*, i kita a gwaloana noi Isrel tau tau na noda domidomi luna kwara vae ne vanamai.” #a Luk 2.34; b Bol 24.15; 26.6-7

21Hikani ramo viti lakwae kwara, “I kami kehe rongo te leo huriko tina tangaloi lalakua lo vanua Sutia. Vake i rabelada rahe vanamai te mana roro huriko kwara rana viti te kinau hati huriko, hetea. 22Vae i kami keu lagwa kwara kena rongo na domimu, huri keu kikilai kwara vataha na mahagweki a tangaloi rusa rau kwahakwaha hati vovohi na bulubulu hika i nigo komo bulu luna.” #Bol 24.14

23Hokinia i Pol, aira, ramo matai na rani kwara rana vileki tabulutaki luna. A tangaloi u rusa ramo vanamai lo rani hi vaki lolo ingwa hinea i Pol mo hugu eia. I Pol mo tinakaki sirovobongi vaki na bongi mo viti huri kwara i God aia a Hugwe Lakua vae rana domi mavakinia, mo haharaki tabetabekinia lakwara. Mo viti huri na leo na Tangwata* noi Mosis mana uliuli nona tangaloi* duruduruki lakwara. U vai kwara ne vaira rana kikilai bakotoki kwara a havakinau hi mo viti lakwara huri i Jisas u kareaki. 24Aira tuaki rau kikilai bakotoki na nona leo, vae tuaki rahe hauhuri tea. 25-29Vunu i Pol mo viti na kinau hika katukwale lakwara kwara, “!Ngwera! A Tanungwe Kokona u viti kareaki lakwai ratubuda lalahi na tangaloi duruduruki i Aesaea lolona hi mo viti kwara,

‘Ko vano

ko viti lakwa na tangaloi vano hi

kwara i nau i God nu viti

“I kamu tulu ne rongo,

a rongorongo,

vae tulu nehe rongo kikilakinia tea.

I kamu tulu ne taga,

a tagataga,

vae tulu nehe taga kikilakinia tea.” ’

Vunu i God mo vano nga mo viti lakwa na tangaloi duruduruki hi kwara,

‘A tangaloi aira vano hikani

rau vai a domiga u madi haburu.

Rau soso koro gweroga,

rau gwelibibi.

Kwara vae rahe vai te kwehi

rana taga lai kina mataga,

rana rongo lai kina gweroga,

rana kikilai lolo domiga,

vunu rana bohi vaki maiau

vae nana vakahikinira.’ ” [NOTE TO TYPESETTER: Please put thin space only between single and double quotes.]

Vunu i Pol mo kwaha rovonaki mo viti “I kamu kwara tulu ne kikilai kwara i God u hokaki na nona leo na ahiana lakwa na tangaloi tavalavarea tina gwaloana noi Isrel. !Aira, vae rana rongohuria!”

I Pol mo viti hokinia hi, vunu a gwaloana noi Isrel ramo tirakinia, ramo viroro mulekinira siboga. #a Aes 6.9-10; b Sam 67.2; 98.3; Aes 40.5; Luk 3.6; Bol 13.46; 18.6

30I Pol u toka takwa-hi a hukao kairua lolo ingwa hinea u tuku tavakia huria sibona. U lai tabetabeki a tangaloi hinea ramo vanamai vaki maia kwara rana tagaia. #Bol 28.16 31Mo matangwasaraki kwara i God aia a Hugwe Lakua vae u taritarisa kwara a tangaloi savia rana domi mavakinia, vake u huhui na tangaloi huri na Hugwe* i Jisas Kraes*. U kwaha he mataku tea a tangaloi rahe tu koroa tea.

Currently Selected:

A Bolokiana 28: HWT

Highlight

Copy