SEMIS 2
2
I Semis u kwaha suri na tangaloi hinea rau taga bulakiki na tangaloi tuaki
1Rabela. Tulu hauhuri ba lui Jisas Kraes* a noda Hugwe* hinea a Hugwe na taetae. U karea, vae tulu hatu huri na doridori hika hinea tulu mo domi mavaki na tangaloi hugwe, vae tulu domi bulakiki na tangaloi kakaravi. A doridori hi he taritarisa tea mana nomiu hauhuriana. #Job 34.19; Bol 10.34; Sem 2.9 2Diko a tangaloi kairua raru soro vaki maikamu lo nomiu vileki-tabulutakiana, kairuaki a lugwana u karea haburu, u tavuki na ringi hinea rau kihiana kina kol, kairuaki u kakaravika, a lugwana u magaegae, vae tulu ne vai tabetabekirarua lo hala katukwale. 3Diko tulu domi mavaki na tangaloi hinea a lugwana u karea, vae tulu domi bulakiki na tangaloi kakaravi, hi he karea tea. He taritarisa tea kwara tulu ne viti lakwa na tangaloi tomua hi kwara, “Tua. Ko vanamai ko hugu lo tanotano karea hika,” vunu tulu ne viti lakwae kairuaki kwara, “Ko tu takwa-hi, diko hetea, ko hugu evina hike mana garugu.” 4Tulu vai hokinia hi tulu vai he karea tea huri tulu huri na hala kairua, tulu mo taga kwaheki na tangaloi kina domi hati.
5Rabelagu. Tulu gwerongo ne karea. I God u matai na tangaloi hinea rau kakaravika lo nako na tangaloi, kwara ne vaira rana mulemai ki tangaloi hugwe lo noga hauhuriana. Vake u mataira kwara rana soro vaki lo Vanua Karagwa hinea aia u hugwe koroa, hokinia u tuliki terekaki lakwara hinea rau lagwa maia. #1 Kor 1.26-28 6!Vae i kamu tulu domi bulakiki na tangaloi kakaravi! ?A hava tangaloi hi ramo toko vai bulakikikamu? ?A hava tangaloi ramo toko lavikamu vaki lo tanotano na arekiana? Hete kwara a tangaloi kakaravi vae aira a tangaloi hugwe. 7?A hava tangaloi hi ramo toko kwaha bulakiki na hina karea hinea i God mo tau lumiu? Aira a tangaloi hugwe kehekeheki.
8A tangwata eia lo Uliuli* Kokona hinea a gwataki na tangwata savia noi God a Hugwe Lakua, hinea u viti kwara, “Kona lagwa mana tangaloi hinea rau hugu laliki maiko, kona vai tabetabekinira hokinia komo vai tabetabekinigo sibomu.” Diko tulu rongohuri na tangwata hi, vae tulu ne vai kinau rau bakoto. #Lev 19.18; Mat 19.19; 22.39; Mak 12.31; Luk 10.27; Rom 13.9; Gal 5.14 9Vae diko tulu domi mavaki na tangaloi hugwe, vunu tulu domi bulakiki na tangaloi kakaravi, vae tulu galo lo tangwata hi. Vunu a Tangwata* ne vosangi kwara i kamu a tangaloi na magaraki Tangwata, vae tulu ne kwali na kakadiki huri. #Dut 1.17 10A tangaloi hinea u galo lo tangwata katukwale vohoki u vai na vaivai hati, vae aia hokinia kwara u galo lo Tangwata savia. #Mat 5.19 11I God hinea u viti kwara, “Tulu hatu balu vavine,” aia hi vohoki hinea u viti kwara, “Tulu hatu ua mate tangaloi.” Diko tulu he balu te vavine aia tulu ua mate tangaloi, vae i kamu a tangaloi na magaraki Tangwata. #a Eks 20.14; Dut 5.18; Mat 5.27; 19.18; Mak 10.19; Luk 18.20; Rom 13.9; b Eks 20.13; Dut 5.17; Mat 5.21; Mak 10.19; Luk 18.20; Rom 13.9 12Tulu ne kwahakwaha tulu ne bohibohi hoki na tangaloi hinea vae i God ne kwaheki na doridorimiu kina tangwata hinea mo teri na gwarugwaru tikita. #Rom 8.2; Gal 6.2; Sem 1.25; 1 Pita 2.16 13A tangaloi hinea a hahakaviga tikei, lolona i God ne taga kwaheki na doridoriga ne arekinira, nehe hakavira tea. Vae a tangaloi hinea a hahakaviga eia ranahe mataku tea kina arekiana. #Mat 5.7; 18.32-35
A hauhuriana mana bohianaki
14Rabela. ?Diko te tangaloi u tuku viti kwara u hauhuri lui Kraes* vae he hagohago te mana tangaloi maira, vae a doridorina hi ne hago kworohokinia maia? A nona hauhuriana nehe vakahikinia tea. #Mat 7.21 15?Diko i ratuamiu, i rahagwemiu, a gwanaga tikei, a kaga hinaka tikei, 16vae hete kwara te katukwale tikamu ne hago maira, vae kworohokinia? ?Diko te katukwale tikamu ne viti lakwara kwara, “I God ne vai tabetabekikamu, tulu ne ngwavingwavi, tulu ne kugwa,” vae he bete na gwana te lakwara diko te hinaka, vae kworohokinia maira? A nomiu leo rau vuroki vohoki. 17Vae a noda hauhuriana aia hokinia hi. Diko tau hauhuri kehekeheki vae a bolokiki tikei, a noda hauhuriana hi u mate. #Sem 2.20,26
18Vae te tangaloi ne viti kwara, “A tangaloi katukwale u hauhuri, a tangaloi katukwale vake u hagohago mana tangaloi.” U karea, vae diko kona vosangi lakweau kwara kohe hagohago te mana tangaloi aia vae i nigo a tangaloi hauhuri, i nau vae na vosangi lakwako kwara i nau a tangaloi hauhuri kina bohianagu hinea nu tuku hagohago mana tangaloi. 19I nigo ku hauhuri kwara a God katukwale vohoki. Hi u karea. A tanungwe hati vake rau hauhuri hokinia hi vae a huiga rau rururu kina matakuta. #Mat 8.29; Mak 1.24; Luk 4.34 20!I nigo a domidomimu tikei! ?Ku lengaia kwara na matangwasaraki lakwako kwara a tangaloi hinea u hauhuri vae a bolokiki tikei, a nona hauhuriana u vuroki vohoki? 21U karea, tulu domidomi lui tubuda i Evraham. ?I God u vaia mo bakoto lo nakona huri naha? Huri mo lavi i natuna i Aesik mo gwarua, mo taua lo voda mo hilea lakwai God. #Jen 22.9,12 22?Kohe tagaia tea kwara a nona hauhuriana mana bohianana raru vano tabulutaki? A bohianana u vai na nona hauhuriana mo bakoto vohoki. #Hib 11.17 23Vae a Uliuli* Kokona hi u kworo hinea u viti kwara, “I Evraham u hauhuri lui God, vae huri na nona hauhuriana hi i God u lai tabetabekinia mo vaia mo bakoto.” Vunu i God mo kwareki i Evraham kwara aia a nona buluana. #a Jen 15.6; Rom 4.3,9,22; Gal 3.6; b 2 Kron 20.7; Aes 41.8 24Vae huri na kinau vano hi tau viti lai kwara i God u vai na tangaloi u bakoto lo nakona huri na bohiana nona tangaloi hi, hete huri na nona hauhuriana kehekeheki.
25Vunu ko domidomi lo vavine hi i Rehav, a vavine tu huri hala. ?I God u vaia u bakoto lo nakona huri naha? Huri u hahavaki tabetabeki na ngwera a gwaloana noi Isrel* kairua hinea raru vano vaki Seriko kwara raru ne tagabalu na vanua takwa-hi. U lavirarua vaki tatana mo hago mairarua, raru mo ahi tina nogaru tavaluivuro takwa-hi, raru mo mule lo hala dolua. #Jos 2.4,15; 6.17; Hib 11.31
26A tarabehi hinea a tanungwena tikei u mate. Vae lo hala hokinia hi, a hauhuriana, vae a bolokiki tikei, aia u mate vake. #Sem 2.17,20
Currently Selected:
SEMIS 2: HWT
Highlight
Copy
Compare
Share
Want to have your highlights saved across all your devices? Sign up or sign in
Havakinau New Testament © Bible Society of the South Pacific, 2016.
