HIBRU 4
4
1Vae i God u hile na tulikileo lakwakita ba kwara vae tana lavi na mabuana maia hinea mo viti huria. Karea, ta tagahuri ne karea. He karea tea kwara te katukwale tikamu ne vakasile, vae nehe lavi na mabuana te hi mo tulikinia. 2I kita tau rongo na Roro Karea ba u taritarisa hoki na tangaloi tuai ramo rongoa. Aira tuai rau rongo na leo hi, vae he hago tea maira, huri rau rongoa, vae rahe hauhuri te luna.
3Vae i kita hinea tau hauhuri, tau lavi na mabuana mai God. Aia hi a mabuana hinea i God mo toko viti huria kwara,
“Nomo lologute
vae nomo hahariki kwara,
‘Ranahe soro lai te vohoki
vaki lo vanua hinea kwara vae
nana bete na mabuana lakwara eia.’ ”
Mo viti kwehini, kinahavaki lo taro hinea mo tau na varamana hika mo rovo a nona bolokiana u rovo savia. #a Sam 95.11; b Hib 3.11; 4.5 4A leo katukwale eia lo Uliuli Kokona u viti kwara,
“Lo rani kaibituki i God u mabu
tina nona bolokiana savia.” #Jen 2.2
5Vae a leo hika u viti huri na mabuana hi taliku, u viti kwara,
“Ranahe soro lai te vohoki
vaki lo vanua hinea kwara vae
nana bete na mabuana lakwara eia.” #a Sam 95.11; b Hib 3.11; 4.1
6Aira hinea rau rongo na Roro Karea hika tomua vae rahe lavi na mabuana te mai God huri rahe rongorongohuri tea. Vae hika u matangwasara kwara a tangaloi te dolua eia, vae rana lai lavi na mabuana hi mai God. 7Vae huri hi, i God mo tau na rani dolua vake. A hukao u rusa rau vano ba, vunu mo viti taliku kwara, “Hika karagwa.” Mo lalahi Devit mo viti huria lo leoki hini nu vitia ba hinea mo viti kwara
“Hika karagwa diko tulu rongo na leo i God,
vae tulu hatu vai gwatu madi.” #Sam 95.7-8; Hib 3.7-8
8Kwara vae diko i Sosua u bete na mabuana lakwa na tangaloi, hinea i God mo tulikinia lakwara, kwara vae vaki takuni i God nehe viti na rani te dolua vake. #Dut 31.7; Jos 22.4 9Vae aia hete kwehi. Huri hi, a mabuana u eno radu huri na tangaloi noi God hoki na mabuana noi God hinea mo mabu lo rani kaibituki. 10Ihe hi u lavi na mabuana hinea i God mo tulikinia, ne mabu tina nona bolokiana hokinia hini tomua i God mo mabu tina nona bolokiana savia. #Jen 2.2; Hib 4.4 11Vae huri hi tana huira kwara tana lai lavi na mabuana hi. He karea tea kwara te katukwale tikita ne huri na tanoi-garuga hinea tuai, hinea rahe rongohuri God tea, vae nehe lai lavi na mabuana te hi mai God.
A leo i God a huirana luna
12A leo i God aia a kinau mauri, u kilukilu, u hoko haburu, u sileti na bue na vuro hinea u hoko dalidali. U keli lavi na domi mana tarabehi savia lalahia vaki lo tovutovu na hui lolona. Hokinia u sio utuutuhi na hokehoke na mauriana na varamana tina mauriana noi God lo tangaloi. Aia hoki na bue na vuro hinea u soro lai vaki lo hokehoke na hui, lalahia vaki lo tovutovu lolona. A leo i God u tagakwahe lavi na domidomi savia nona tangaloi, mana kinau savia hinea a tangaloi u lengaia lolo domina. #a 1 Pita 1.23; b Aes 49.2; Eves 6.17; Rev 19.15; d Sione 12.48 13A kinau tikei vohoki kwara ne hili lai tina mata i God. A kinau savia i God mo taura, vae rau tu ngalangalakinira koro na nakona. Vunu i kita vunu tana viti matangwasaraki na noda tokaana koro na nakona.
I Jisas aia noda Hugwe na Tangaloi Lingilingi lakua
14A hauhuriana hinea tau matangwasarakinia kwara tau hauhuri luna, vae tana kwiribibia ne madi. Kareaki, a noda Hugwe na Tangaloi* Lingilingi lakua eia, aia hi i Jisas i Natu i God, hinea u soro ba vaki lolo taetae, u hugu koro na nako i God. #a Hib 3.1; 6.20; 7.26; 8.1; 9.11; b Hib 10.23 15A noda Hugwe na Tangaloi Lingilingi aia hete tangaloi hinea lolona a noda huirana tikei he hakavikita tea. Aia a hahakavina eia, huri a kinau savia hinea rau vai rongohikita rau vai rongohia ba, vae aia u dolua tikita luna hika vohoki, he vai na hatiki tea. #Hib 2.17 16Vae huri hi, ta hatu mataku, a domida ne huira kwara tana vanamai koro na nako i God, hinea mo toko hago maikita kina nona domi tabetabe lakua. Aia ne hakavikita, vae lo taro bakotoki hinea a noda rongoana hati eia, ne hago maikita kina nona domi tabetabe lakua. #Hib 10.19
Currently Selected:
HIBRU 4: HWT
Highlight
Copy
Compare
Share
Want to have your highlights saved across all your devices? Sign up or sign in
Havakinau New Testament © Bible Society of the South Pacific, 2016.
