VILIMON 1
1
I Pol mai Timoti raru kwaha tabetabe mai Vilimon
1Vilimon.
I nau i Pol, nu hugu lolo ingwa na gwarugwaru huri i nau a tangaloi noi Jisas Kraes*. I kamirua mai tuada i Timoti keru uli na leta hika lakwako, keru lagwa maiko haburu i nigo buluimaru hinea tuai tamo boloki haragoki. #a Eves 3.1; 4.1; Vil 1.7,13; b Vlm 9 2Keru uli vake lakwa na kwarelua* noi Jisas hinea rau vileki tabulutaki tatamu, vunu vake lakwai hagweda i Avia mai tuada i Akivas hinea keu boloki haragoki hoki na tangaloi na vuro. #Kol 4.17
3A tangaroa karea hika lakwakamu. I God i Tamada mai Jisas Kraes a noda Hugwe* raru ne hago maikamu kina nogaru domi tabetabe lakua, vake raru ne bete na magemuana ne eno maikamu. #Rom 1.7; Gal 1.3; Vil 1.2
I Pol u viti huri na lagwaana noi Vilimon mana nona hauhuriana
4Vilimon. Tigwaravu lolona nomo tiutangaroa nu domihagweko. Nu lagwaki na noda God #Rom 1.8-9 5huri nu tuku rongo na roromu kwara ku lagwa mana tangaloi noi God savia, vake kwara ku hauhuri lui Jisas a noda Hugwe*. 6Nu tiutangaroa huri kwara tamo bulu katukwale lo hauhuriana, vae ne vaiko a nomu kikikila ne bua vakevake lo kinau karekarea savia hinea tamo lai huri tau hariki lui Kraes*. #Vil 1.9; Kol 1.9 7Tuagu karea. A nomu lagwaana u vaiau u havutiau haburu mo rakati na domigu huri komo vai na domi na tangaloi noi God savia ramo lagwalagwa. #2 Kor 7.4
I Pol u viti lakwai Vilimon kwara ne lavi Onesimas taliku
8-10Lo taro hikani i nau i Pol nu ngwarasea, vake nu hugu lolo ingwa na gwarugwaru huri na hina i Jisas Kraes*. #8-10: Lo hala kairuaki a domidomi na leo hi lo duviki tomuaki na ves kaitolu hi aia hokinia hika kwara, Lo taro hikani i nau i Pol, a tangaloi na leo huri Jisas Kraes vake nu hugu lolo ingwa na gwarugwaru huri na hinana. Huri taru bulu katukwale lui Jisas Kraes nu taritarisa kwara na haharako nana viti a havakinau hinea u taritarisa kwara kona vai. Vae huri taru lagwalagwa maikitarua na kwaha tabetabeki maiko. Nu lengaia kwara na viti huri na bulamu tangaloi boloki i Onesimas. Nomo hugu lolo ingwa na gwarugwaru nomo lavia vaki mai Kraes, vae hokinia kwara aia i natugu vohoki, i nau i tamana vohoki. Vae nu lengaia kwara kona vai tabetabekinia. #a Eves 3.1; 4.1; Vil 1.7,13; Vlm 1; b 1 Kor 4.15; Gal 4.19; Kol 4.9 11Tuai i Onesimas #11: Onesimas. A hina hi, lo leoga a domianaki kwara a kaihago, vae i Pol u domidomi lo domianaki hi, mo vakovako mana leo lo ves hika. he vai na kinau te vohoki kwara ne hago maiko, vae hikani ne vai na kinau rusa kwara ne hago maiko vae ne hago maiau vake.
12Vae hikani na hokakinia muleatu taliku vaki maiko, vae a domigu aia luna. 13Hikani nu hugu lolo ingwa na gwarugwaru huri nu heretuvaki na Roro Karea noi Kraes, vae nu lengaia haburu kwara na kwiribibia ne hugu maiau kwara ne lai tanotanomu ne hago maiau. #Vil 2.30 14Vae hetea, huri nahe lengaia te kwara na bibiriko kwara kona hago maiau. Vae nu lengaia kwara i nigo kona vai lo domimu sibomu. Hokinia i nau nanahe vai na kinau tea, vae kehekeheki kona masinge luna. #2 Kor 9.7; 1 Pita 5.2
15Nahe kikilai tea, vae nu domi kwara i Onesimas u kwalao tiuko lo taro gwanugwanu vohoki kwara vae kona lavia taliku ne hugu maiko vaki tuai. 16Hikani aia hete tangaloi boloki vuroki kehekeheki, vae u sileti na tangaloi* boloki vuroki. Aia i tuada lui Kraes, hinea u taritarisa kwara tana lagwa maia. I nau nu lagwa maia vohoki, vae nu domi kwara i nigo kona lagwa maia siletiau, huri aia a bulamu tangaloi boloki, vae silesiletia hi, aia i tuamu, huri u hariki lo noda Hugwe*. #1 Tim 6.2
17Karea koe, diko i nigo a buluimu i nau, kona lavia vaki tatamu hokinia kwara ko laviau. 18Diko aia u vai kinau hati vovohiko, diko a bukuna eia maiko, vae kona tau na bukuna lugu. 19A leo hika vae na ulia kina kabagu. I nau i Pol nana vai na bukuna lakwako. Nu domi kwara ku kikilai te ba kwara a bukumu eia maiau huri komo ahi lalahiau. #Gal 6.11; 2 Tes 3.17
20Tuagu. Kona hago maiau lo kinau hika, huri taru hariki lo noda Hugwe. I kitarua taru vituatua lui Kraes, vae nu lengaia kwara kona vaiau ne havutiau taliku.
21Nu tuku uli na leta hika lakwako, vae nu kikilai kwara kona vai na havakinau hi nu viti lakwako. Kareaki, nu kikilai kwara kona vai silesiletia hi nomo viti lakwako. 22Vunu vake, ko vai rarai tanotanogu lolo ingwamu, huri tigwaravu nu tau na nogu domidomi luna hika kwara i God ne daraki na nomiu tiutangaroa i kamu vunu, vae ne tirakiau nana muleatu vaki maikamu taliku.
A leo rovonaki
23I Evavras, hinea u hugu lolo ingwa na gwarugwaru maiau huri aia a tangaloi noi Jisas Kraes*, u hokaki nona lagwaana lakwako. #Kol 1.7; 4.12 24Vunu a tangaloi aira hika hinea rau boloki haragoki maiau, i Mak, i Aristakas, i Demas mai Luk, aira vake rau hokaki noga lagwaana lakwako. #a Bol 12.12,25; 13.13; 15.37-39; Kol 4.10; 2 Tim 4.11; b Bol 19.29; 27.2; Kol 4.10; d Kol 4.14; 2 Tim 4.10; e Kol 4.14; 2 Tim 4.11
25A tangaroa karea hika lakwakamu. A noda Hugwe* i Jisas Kraes ne hago maikamu kina nona domi tabetabe lakua.
Currently Selected:
VILIMON 1: HWT
Highlight
Copy
Compare
Share
Want to have your highlights saved across all your devices? Sign up or sign in
Havakinau New Testament © Bible Society of the South Pacific, 2016.
