2 KORIN 12
12
I Pol u viti huri na vakatabobo hinea i God u vosangia kinia
1A kwaha kalukalu he vai na kinau te kwara ne karea, vae nu rongo kwara na kwaha radu nga luna. Hika na viti huri na vakatabobo hinea a noda Hugwe* u vosangiau #12.1-5: Lo Buku Kokona hika lo leo nona ngwera Gris tuai, lo ves 1 vaki ves 5 i Pol u kwahakwaha hokinia kwara u viti huri na tangaloi dolua, vae kareaki u viti huria sibona. Kona taga lo ves 7. U kwaha hokinia hi kwara ne veveki rera kina tangaloi hinea rau domi kwara a tangaloi hinea u taga a vakatabobo aia a tangaloi lakua. Vae lo leo ngwera leia tanahe kwaha tea kwehini. Kwara vae diko tana kwaha hokinia, a tangaloi rana lavi na domikiana dolua luna, hinea he taritarisa tea. kinira mana kinau hinea u matangwasarakinira lakweau. 2Hika a kinau kelekele vohoki, vae a hukao hangavulu dongwana kaivati koro ba, aia hokinia i God u laviau tagaulu vaki lolo taetae kaitoluki, hinea aulu sea tina vanua lolo taetae. Lolona hi i nau a tangaloi noi Kraes* ba. Nohe kikilai tea kwara a kinau hika u kareaki diko aia hokinia nu tagai na vakatabobo vohoki. I God kehekeheki u kikilai na kinau hika. 3Na viti taliku, nahe kikilai tea kwara a kinau hika u kareaki diko aia a vakatabobo vohoki, i God kehekeheki u kikilai. Vae i nau nu kikilai kwara aia hokinia i God u laviau tagaulu vaki Parataes. 4Takwahini nomo rongo na kinau hinea tanahe viti lavira tea kina noda leo, vake a korokoro luga, tahe taritarisa tea kwara tana vitira. 5Nu kwaha domidomiau mana kinau hinea i God mo vosangira lakweau, vae nahe kwaha domidomiau te huri na kinau hinea nomo vaira sibogu. I nau nu kwaha domidomiau huri na kinau kehekeheki hinea rau vosangi kwara i nau a nogu huirana tikei. #2 Kor 11.30 6Kwara vae diko nu lengaia kwara na kwaha domidomiau, a tangaloi nehe viti lai tea kwara nu reraka, huri nu viti na vitikareaki. Vae nahe kwaha domidomiau tea, huri nu lengaia kwara a tangaloi rana taga kikilakiau lo kinau hinea ramo tagaiau nomo vai, vake ramo rongo nomo viti, vunu rana domi mavakiau huri na kinau vano hi kehekeheki. #2 Kor 10.8; 11.16
7Kareaki i God u vosangiau kina kinau karekarea rusa, vae huri hi, u tu koroau kwara na hatu domidomi hakekiau haburu, vae mo tiraki na rongoana hati mo kihiau tigwaravu. A rongoana hati hi aia hoki na kasi mo toko keliau. Aia hoki na kaihora noi Setano* mo toko kwohiau. A rongoana hati hi u tu koroau kwara na hatu domidomi hakekiau haburu. #Job 2.6 8Vakaitolu nu tiutangaroa lakwa na noda Hugwe huri na kinau hi, nomo uduhuri kinia kwara ne lavia letiu. 9Vae mo daraki mo viti “I nau nana hago maiko kina nogu domi tabetabe lakua, aia hini u taritarisa kwara ne kwiribibiko. Lo taro hinea a nomu huirana tikei a nogu huirana u huira haburu lumu.” Vae huri na kinau hi, u havutiau haburu kwara na kwaha domidomiau mana kinau hinea rau vosangi kwara a nogu huirana tikei. Lo hala hini, nu rongo kikilaki kwara i Kraes u tagahuriau kina nona huirana. 10Lo taroki nu rongo nahe huira tea, a tangaloi rau kwahakwaha hati vovohiau, nu hagwe kwara a nogu vai-lengalengakiana eia, a tangaloi rau vai bulakikiau, nu hagwe na madiki. A rongoana hati vano hi ramo kihiau huri i nau a tangaloi noi Kraes, vae venaha u karea nu lagwa. Lo taro hinea nu rongo hokinia kwara nahe huira tea, vae lo taro hini vohoki nu huira. #Vil 4.11,13
I Pol u domidomi haburu huri na ngwera Korin hinea aira a tangaloi noi Kraes
11I nau nu domi kwara nu tuku vai na rera, vae i kamu vohoki tulu vaiau nomo kwahakwaha kwehi. U taritarisa vohoki kwara i kamu tulu ne tabe hakeki na hinagu. Venaha diko i nau a tangaloi vuroki, vae i nau nahe evina te tina kaihora* kokona vano hi hinea tulu mo toko vitira kwara aira rau hahaburuka. #2 Kor 11.5 12Lolona nomo hugu maikamu, nu vai na domigu u bua, vae nomo vai a kaivosangi mana idilakiana mana vaisea lo nakomiu, vae a kinau vano hi rau vosangi kwara i nau kareaki a kaihora kokona. #Rom 15.19 13?Kworohokinia? ?Tulu domi kwara nu vaikamu tulu evina sileti na kwarelua* ratuaki? Hetea. Vae a kinau katukwale vohoki, nohe longi na hagoana te tikamu lo mane*. !Nu hahakavi vohoki! Tulu domidomi koro lakweau huri nu vai he taritarisa tea lakwakamu lo kinau hi. #2 Kor 11.9
14Hikani vakaitoluki hika nu rarai kwara na venatu na tirokikamu. Vae nanahe longi te tikamu kwara tulu ne hago maiau lo mane. I nau nu lengaikamu, nohe lengai na nomiu mane tea, huri hete boloki nona sakwarigi kwara rana tagahuri ratamaga mai raretahiga, vae a tama mana retahi aira rana tagahuri raranatuga. #2 Kor 13.1 15I nau nu lagwa kwara na mahuki vunuhi na nogu kinau, na tiraki na mamaurianagu vake, kwara na hago maikamu. ?Vae kworohokinia maikamu? ?Tulu lagwa maiau kelekele vohoki huri nomo lagwa haburu maikamu hokinia hi? #Vil 2.17
16Nu domi kwara tulu ne daraki lai luna hika kwara nohe tau te hagohago mava lumiu vohoki. Vae i kamu te ratuaki tulu ne viti kwara i nau nu tuku kwaekikamu, vae hikani nomo toko sinakamu kina nogu leo kurakura. 17?Kworohokinia? ?Tulu domi kwara nu balu tikamu lalahi na tangaloi na leo vano hini, nomo horara vaki maikamu? Hetea. 18Nu madimadi lui Taetas kwara ne vano, vunu nomo hokaki belada hika kwara ne huria. ?Tulu domi kwara i Taetas u balu tikamu? Tulu kikilai kwara i kamirua a nomaru domidomi katukwale, keru bohibohi u taritarisa. #2 Kor 8.6,16-18 19?Tulu domi kwara keu tuku vaivai koro na nomiu leo tigwaravu kwara kena tabe hakekikami lo nakomiu? Hetea. Keu kwaha hokinia hinea i Kraes* aia u lengaia kwara kena kwaha, hokinia i kami keu tu koro na nako i God.
Rabela. A kinau vunuhira hi kemo toko vai, keu vaira kwara kena hago maikamu. 20I nau nu mataku kwara vae lolona hini na maravuti maikamu, namai tagaikamu kwara tulu dolua vohoki, a bohibohianamiu dolua tiua hinea nomo lengaikamu kwara tulu ne bohi luna. Vunu nu mataku kwara vae tulu mai tagaiau kwara nu dolua vohoki, vake a doridorigu u dolua tiua hinea tulu lengaia kwara ne hokinia. Nu mataku kwara vae namai tagai na tangaloi hinea rau tuku viroro, a kinau kadikadira, rau lologute heheri, vake rau domi hurira siboga. Nu domi kwara vae namai tagai na tangaloi hinea rau tuku kwahakwaha hati vovohira ratuaki, rau vitiviti huri tangaloi, rau domidomira, rau vai bulabula. #2 Kor 2.1-4 21Nu mataku kwara vae lolona na venatu taliku vaki maikamu, vae a nogu God ne mai hivokiau lo nakomiu. Vunu nana rongo hati, na tangi huri na tangaloi rusa hinea tuai rau vai doridori hati, vae rahe bohiki na domidomiga te radu nga tina noga doridori hati vano hi. A tangaloi vano hi, tuai rau vai doridori rahe bakoto tea, a ngwera rau livu ravavine, a ravavine rau livu ngwera, vake rau huri na lengalengaiana hati na tarabehiga kehe nga. #2 Kor 13.2
Currently Selected:
2 KORIN 12: HWT
Highlight
Copy
Compare
Share
Want to have your highlights saved across all your devices? Sign up or sign in
Havakinau New Testament © Bible Society of the South Pacific, 2016.
