2 KORIN 11
11
I Pol u kwaha vovohi na kaihora kurakura
1Nu lengaia kwara tulu ne tirakiau na kwaha rerera te kelekele. Tulu tirakiau na vai kwehi. 2I nau nu taga korokamu, vae a domigu u ngwangwavi hurikamu kwara tulu ne kwareki a tangaloi noi God kehekeheki hokinia hinea aia u lengaia. Nu tagaikamu hoki na vavine takwae hinea u ngwasara, u toka kokona, vae i nau nu vai bakotoki na kinau huria kwara ne laki mana tangaloi katukwale vohoki, aia hi i Kraes*. #Eves 5.26-27 3Nu mataku huri vae a domidomimiu ne mai hogora. Nu mataku huri vae tulu mai tiraki na nomiu lagwaana vovohi Kraes, hinea tulu mo lagwa maia haburu lo hala u bakoto vohoki u ngwasara. Nu mataku huri vae tulu mai sovi, hoki na vavine tomua halaradu hi i Iv hinea mo sovi, a ngwata mo sinae kina nona leo kurakura. #Jen 3.13 4I kamu tulu lagwa kehe nga kwara tulu ne tiraki na tangaloi dolua rana vanamai rana heretuva lakwakamu. A tangaloi tuaki rau heretuva rau viti i Jisas, u dolua tiua hini i kami kemo viti, vae tulu rongohuri na leoga. Tuaki rau lavi na tanungwe vanamai u dolua tina Tanungwe Kokona hinea tulu mo lavia tomua, vae i kamu tulu lavia. Vunu tuaki rau matangwasaraki na roro karea u dolua tina Roro Karea hinea tulu mo rongoa tikami, vae tulu hauhuri luna. #Gal 1.8-9
5I nau nohe domi tea kwara nu evina tina kaihora* kokona vano hi, hinea tulu mo toko vitira kwara aira rau hahaburuka. #1 Kor 15.10; 2 Kor 12.11; Gal 2.6,9 6Venaha diko nu sekulu he karea te lo kwahakwaha, vae nohe gwanugwanu te lo nogu kikikila. A kinau hi keu vaia u matangwasara lakwakamu vataha na taroki lo kinau vatahae hinea kemo toko vai maikamu. #a 1 Kor 1.17; 2.1,13; b Eves 3.4
7Vae lolona nomo heretuvaki na Roro Karea noi God lakwakamu nohe vaikamu tea kwara tulu ne voli. I nau kehekeheki nu hivokiau kwara na tabe hakekikamu. ?Vae kworohokinia? ?Tulu domi kwara nu vai he bakoto tea hokinia hi? #1 Kor 9.12,18 8Lolona nomo toko boloki lo livukamiu, a kwarelua* dolua aira rau voliau. Aia mala kwehini kwara nu tuku balu tiura kwara vae na hago maikamu. #Vil 4.15 9Lolona nomo hugu maikamu vae nomo gwanugwanu lo mane*, vae nohe viti te kwara tulu ne hago maiau. I rabelada hinea rau ngwalua tina vanua Masetonia rau vanamai rau lai kinau hinea nomo gwanugwanu luga. A doridori hinea nu vai ba, vae nana kwiribibia. Vae nanahe tau na hagohago mava te lumiu kwara vae tulu ne hago maiau. #2 Kor 12.13 10Lo vitikareaki noi Kraes hinea u eno lugu, na viti kareaki lakwakamu hika. Nomo kwaha domidomiau mana hala na mane, vae a tangaloi tikei laliki lo vanua Gris kwara ne tu koroau luna, te lo taroki. #1 Kor 9.15 11Nu viti kwehini hete kwara nu begu kikamu. I God u kikilai kwara nu lagwa maikamu.
12Vae nana vano nga lo hala hinea nomo toko vai hika, huri kwara vae na tu korora hinea rau viti kwara aira a kaihora kokona. Nahe lengaia tea kwara na bete mahao lakwara kwara rana toko kwaha domidomira, rana toko viti kwara rau boloki lo hala hinea u taritarisa hokinia i kami kemo toko vai luna. 13A tangaloi aira vano hi aira hete kaihora kokona kareaki, aira a kaihora kurakura. Rau tuku kura hinea ramo viti huri na noga bolokiana, vunu rau bohiki na doridoriga kwara rana vai na tangaloi rana tagaira kwara aira a kaihora kokona kareaki noi Kraes. #Vil 3.2 14Vae tana hatu idila kina kinau hi. I Setano, vae ne vai lai kwara ne bohiki na doridorina huri kwara vae a tangaloi rana tagaia kwara aia a kaihora na leleha tina taetae. 15Vae huri na kinau hi, tana hatu idila kinia diko a tangaloi boloki noi Setano* rau bohiki na doridoriga kwara a tangaloi rana tagaira kwara aira a tangaloi boloki hinea rau boloki huri na bakotoana. Vae lo gweregwereki rana lavi na kaitakwe aia hi u taritarisa mana kinau vano hi ramo toko vaira.
A rongoana hati rusa rau kihi Pol huri na nona bolokiana
16Na viti taliku, he karea tea kwara tulu ne domi kwara i nau a rera. Vae diko tulu tuku domi kwehi, karea, tulu tirakiau na vai na doridori na rera te kelekele vunu na kwaha domidomiau te kelekele. #2 Kor 12.6 17A nogu leo hika aia hete kinau kwara a noda Hugwe* u viti lakweau kwara na viti. Lo hala hinea nomo toko kwaha domidomiau nu tuku kwaha hoki na rera vohoki. 18Vae huri a tangaloi rusa rau tuku kwaha domidomira mana doridoriga, i nau vake na vai kwehi. 19I kamu tulu kikikila haburu, vae huri hi tulu lagwa kwara a rera rana tuku kwaha nga. 20I kamu tulu tuku tiraki na tangaloi haro nga kwara rana toko gwarubibikamu hokinia i kamu a bulaga tangaloi boloki vohoki. Rau tuku balu tikamu, rau livutikamu kwara rana magarakikamu, rau taga hivokikamu, rau rabakamu, vae tulu he domi huri tea. 21I nau nu maemae kwara na viti i kami keu mala mataku kwara kena vaikamu kwehini.
I nau nu kwaha hoki na rera, vae a havakinau a tangaloi vano hi rau rarai kwara rana kwaha domidomira luna, vae i nau vake nu rarai kwara na vai kwehini. 22?Kworohokinia? ?Kwara aira a Hibru*? I nau vake a Hibru. ?Aira a gwaloana noi Isrel*? I nau vake a gwaloana noi Isrel. ?Aira a gwaloana lui Evraham? I nau vake a gwaloana lui Evraham. #Vil 3.5 23?Aira a tangaloi boloki noi Kraes*? Nu kwaha hoki na rera, vae i nau a tangaloi boloki karea noi Kraes nu sileti na tangaloi vano hi. Nu boloki u madi siletira, nu vano vaki lolo ingwa na gwarugwaru vakarusa u siletira. A tangaloi rau takwiliau siletira, vae vakarusa u garagarani kwara na mate. #1 Kor 15.10 24A gwaloana noi Isrel rau takwiliau kina karo hala na vakailima, vae lo taro katukwale kehe nga nu kwali na noga kaitakwili ngavu kaitolu dongwana kaihikwa. #11.24: A korokoro eia lo vanua Isrel u viti kwara rana hatu takwili na tangaloi vakatukwale vohoki, lo rani, a kaitakwili mo siletia ngavu kaivati. Ko taga lui Dutronome 25.3. 25Vakaitolu a ngwera Rom rau sanguniau kina ngwasa kehe nga, vunu vakatukwale rau vohoiau ki vatu. Hala na vakaitolu i nau lo aga hinea rau takwaka lo karata kehe nga, vunu vakatukwale nu halehale lo karata a bongi katukwale a rani katukwale. #a Bol 16.22; b Bol 14.19 26Tigwaravu nu tuku lakao laliki nomo vai na bolokiana hi, vae i nau lo hala na mateana, huri na kwai rau huki lalakua, huri na tangaloi babalua, huri na ngwera tatagu a gwaloana noi Isrel, vunu vake huri na tangaloi tavalavarea tina gwaloana noi Isrel. I nau lo hala na mateana lo gwatuivanua lalakua, lolo bubu, lo livuka na tahi. I nau lo hala na mateana huri na tangaloi hinea rau viti kwara aira a nogu buluana, vae rau kura. #a Bol 9.23; b Bol 14.5 27Nu boloki haburukiau vohoki, vae a tarabehigu rau kadikadiau. Vakarusa nu tuku boloki lolo bongi, nahe maturu tea. Taroki tuaki u marakatiau, nu madoku, vakarusa a kagu hinaka tikei, a tanotanogu tikei kwara na hili eia, vake a lugwagu tikei. #2 Kor 6.5 28A kinau ratuaki nahe vitira tea, vae na vitia hika vohoki. Tigwaravu nu rongo hoki na kinau u mava lugu, huri vataha na rani nu domidomi haburu huri na kwarelua vataha na vanua. 29Diko te tangaloi katukwale u keokeo, i nau nu keokeo vake. Vunu diko te tangaloi u sovi tilo vaivai hati, i nau nu rongo hati. #1 Kor 9.22
30Diko nana kwaha domidomiau, vae na kwaha domidomiau mana kinau vano hi hinea rau vosangi kwara i nau a nogu huirana tikei. #2 Kor 12.5 31I God, hinea a God a Tama na noda Hugwe i Jisas Kraes, hinea tamo toko tabe hakeki na hinana tigwaravu, aia u kikilai kwara nohe kura tea. #2 Kor 1.23 32Lolona nomo hugu Damaskes, a Kavman hinea u hugu tavuti na hugwe lakua i Aretas mo lengaia kwara ne kwiribibiau, vae mo tau na nona kaitagahuri kwara rana tu koro na matakihala na titiba na gwatuivanua lakua hi. #Bol 9.24-25 33Vae i rabuluigu ramo tauau lo kete lakua, ramo tuli duruhiau lo kwido na titiba hi, ramo tirakiau hivo vaki lo tano, nomo kwalao tina Kavman hi.
Currently Selected:
2 KORIN 11: HWT
Highlight
Copy
Compare
Share
Want to have your highlights saved across all your devices? Sign up or sign in
Havakinau New Testament © Bible Society of the South Pacific, 2016.
