1 KORIN 15
15
I Jisas u maraka taliku
1Rabela. Nu lengaia kwara na viti huri na Roro Karea hi taliku lakwakamu hinea nu viti huria lakwakamu u rovo ba. A Roro Karea hi i kamu tulu lavia ba, vae a nomiu hauhuriana u tu u madi luna radu nga. 2Diko tulu hauhuri u madi lo Roro Karea hi u taritarisa hokinia hi nomo vitia lakwakamu, vake diko tulu hauhuri luna kareaki, vae i God ne vakahikikamu lalahi na Roro Karea hi.
3Nu viti na kinau vano hika lakwakamu ba hinea nomo lavira, vae rau haburu sileti na kinau savia. Aira hika kwara i Kraes* u mate huri na noda vaivai hati hokinia a Uliuli* Kokona mo viti. #Aes 53.8-9 4Rau taua lo gwaru-malanga. Lo rani kaitoluki i God mo rakatia tina mateana mo taritarisa hokinia a Uliuli Kokona mo viti. #Sam 16.10; Hos 6.2; Sione 1.17; Mat 12.40; Bol 2.24-32 5Vunu i Kraes mo maravuti mai Pita, i Pita mo tagaia, vunu mori maravuti mana nona kaihora* kokona hangavulu dongwana kairua ramo tagaia. #a Luk 24.34; b Mat 28.16-17; Mak 16.14; Luk 24.36; Sione 20.19 6Vunu takuni tiua mo maravuti mana nona tangaloi rau siletia vidolua vakailima hinea rau bulu tabulutaki, vae aira vunu rau tagaia vakatukwale lo taro hi. Ratuaki lo bulubulu aia hi rau mate ba vae u rusa rau ahi radu nga. 7Vunu takuni tiua hi, mote maravuti mai Semis, i Semis mo tagaia, vunu mori maravuti mana nona kaihora kokona savia ramo tagaia. #Luk 24.50
8Vunu vaki takuni tina tangaloi vano hi mote maravuti maiau nomo tagaia, vae i nau hoki na natu hinea u vora utu vula. #Bol 9.3-6; 1 Kor 9.1 9I nau evina karakara tina kaihora kokona savia, vae hokinia nahe taritarisa tea kwara rana kwarekiau kwara a kaihora kokona katukwale, huri tuai nomo toko vai bulakiki na kwarelua* noi God. #a Eves 3.8; 1 Tim 1.15; b Mat 5.19; d Bol 8.3 10Vae huri i God mo hago maiau kina nona domi tabetabe lakua, nomo mulemai hokinia hika. Vae a domi tabetabe lakua hinea i God mo hago maiau kinia, hete huri kwara ne va rovo kwehi, vae a kwaiki rau eia. Vae i nau nu boloki u huira sileti na kaihora kokona savira. Vae kareaki hete kwara i nau kehekeheki nu boloki, vae i God u hago maiau kina nona domi tabetabe lakua, mo boloki lalahiau. #a 2 Kor 6.1; b 2 Kor 11.5,23 11Venaha diko i kamu tulu lavi na Roro Karea tiau diko tiura, vae a Roro Karea hi aia hi vohoki hinea i kami vunu keu heretuvakinia, vunu vake aia hi vohoki hinea tulu mo hauhuri luna.
A mateana rana maraka taliku
12Lo nomai heretuva tigwaravu lakwakamu keu tuku viti kwara i Kraes* u maraka tina mateana. ?Vae kworohokinia ratuaki tikamu ramo toko viti kwara a tangaloi hinea rau mate ranahe maraka te taliku? 13Diko a leomiu hi u kareaki u vosangi kwara i Kraes he maraka te tina mateana, 14vake diko i Kraes he maraka te tina mateana keu heretuva haro vuroki vohoki, vunu i kamu tulu hauhuri haro vuroki vake. 15Vunu hivoulu lo kinau hi, a leomiu vano hi rau vosangi kwara i kami keu viti huri God lo leo kurakura, huri keu hago leo maia kwara aia u rakati Kraes tina mateana. Vae diko a leomiu u kareaki kwara a tangaloi hinea rau mate ranahe maraka lai tea, i Kraes vake, i God he rakatia te tina mateana. #Bol 1.22; 4.33; 5.32 16Diko a tangaloi ranahe maraka te taliku tina mateana, i Kraes vake, i God he rakatia te tina mateana. 17Diko i Kraes he maraka te tina mateana, vunu i kamu tulu hauhuri haro vuroki, vake tulu hugu radu lo nomiu vaivai hati. 18Vunu vake, kwara vae diko a leomiu hi tulu viti u kareaki, kwara vae a tangaloi hinea rau hauhuri lui Kraes rau mate ba, rau sala. 19Kwara vae diko tau tau na domida u madi lui Kraes huri na noda tokaana lo varamana hika kehekeheki, aia hi u hati vohoki. Kwara vae hokinia hi, u taritarisa kwara a tangaloi rana hakavikita haburu u siletia hi rana hakavi na tangaloi savia hike lo varamana.
20Vae a vitikareaki u dolua. I Kraes u maraka tina mateana ba. Aira hinea rau mate ba, vae aia u maraka tomua tiura, vae aia a kaimatai lakwakita kwara kareaki aira vunu hinea rau mate, rana maraka taliku vake. #Kol 1.18 21A mateana aia a kinau hinea a tangaloi katukwale u lavia vanamai vaki lo varamana, vae hokinia, a marakaana tina mateana vake, aia a kinau hinea a tangaloi katukwale u lavia vanamai. #Jen 3.17-19; Rom 5.12,18 22A tangaloi doluaki rau vora vanamai lui Atam, vae rau mate. Vae lo hala hokinia hi, aira vunu hinea rau vora taliku lui Kraes, vae rana ahi taliku. 23Vatavataha na tangaloi rana maraka taliku lo taroga bakotoki. I Kraes u maraka tomua halaradu, vunu lolona ne mulemai taliku a nona tangaloi savia rana maraka vake. #1 Tes 4.16; Rev 20.5 24Vunu takuni tina kinau hi a gwereki vae ne vanamai. Vae a tangaloi noi Setano* hinea rau lalakua, mana kavman, maira hinea a noga huirana eia, vae i Kraes ne gui savira. Vunu ne tiraki na bolokiana na hugwe lakwai God a Tamaki. #Dan 2.44 25Vae tomua i Kraes ne hugwe koro na tangaloi savia tarisaki i God neri gui savi na nona tavaluivuro ne taura tavutina. #Sam 110.1; Mat 22.44 26A tavaluivuro rovonaki aia a mateana, vae i God neri guia. #Rev 20.14; 21.4 27A Uliuli* Kokona u viti kwara, “I God u tau savi na kinau tavutina.” Vae u matangwasara kwara a leo vano hi “savi na kinau” rahe viti huri God tea hinea u tau savi na kinau tavuti na huirana noi Kraes. #Sam 8.6 28Tomua i God ne tau savi na kinau tavuti na huirana noi Kraes. Vunu takuni tiua hi i Kraes hinea i Natu i God, vae aia kehekeheki ne taua sibona tavuti na huirana noi God hinea tomua mo tau vunuhi na kinau tavuti na huirana noi Kraes. Vunu i God kehekeheki ne hugwe koro na kinau savia kina nona huirana.
29?Vunu taliku diko a mateana ranahe maraka te taliku, vae kworohokinia a tangaloi ramo lai bavtaes lo tanotano na tangaloi hinea rau mate rahe lai te bavtaes radu? ?A domianaki kworohokinia? ?A tangaloi vano hi rau lai bavtaes lo tanotanoga huri naha?
30-31Rabela. Tulu domidomi luna hika. ?I kami keu rarai tigwaravu kwara kena tiraki na mamaurianamai huri naha? Keu vai kwehini huri keu kikilai kwara vae kena maraka taliku. Nu viti kareaki lakwakamu kwara vataha na rani i nau lo hala na mateana. Nu viti kwehi huri nu domidomiau maikamu huri tau hariki lui Jisas Kraes a noda Hugwe*. #a Rom 8.36; b 2 Kor 4.10-11 32Lo gwatuivanua hi Evesas hokinia nu vai vuro mana boboroa ovi maira. ?Vae huri naha? Kwara vae diko a mateana ranahe maraka te taliku, vae nanahe lavi na kinau tea. Kwara vae kwehi u karea kwara tana huri na leo katukwale hinea mo viti kwara, “Ta va kanikani, ta va inuinu, huri mavuko tana mate.” #Aes 22.13; 56.12; Luk 12.19-20
33I kamu tulu hatu tiraki na tangaloi rana sinakamu. Lo leoki katukwale mo viti kwara, “A tangaloi hinea rau bakoto, a noga buluana hinea rahe bakoto tea rana magaraki na bohibohianaga karea.” 34Tulu vai a domimiu rana bakoto, tulu tiraki na doridorimiu hinea rau hati. I kamu tuaki tulu he kikilai God te vohoki. Nu viti kwehi, vae aia a maemaeana lakua lakwakamu. #a Rom 13.11; Eves 5.14; b Bol 26.8; d 1 Kor 6.5
A tangaloi rana maraka tina mateana vae a tarabehiga rana dolua
35Karea, vae a tangaloi tuaki rana uduhuri kwara, “?A tangaloi rana maraka kworohokinia tina mateana taliku? ?A tarabehiga rana hoki na havakinau?” 36I kamu tulu reraka haburu. Diko tulu rivu a biu tilolo tano, vae a vinuki he madamada tea, vae a biu nehe mauri lai tea. #Sione 12.24 37Vake a biu hinea tulu mo rivukia tilo tano, tulu tagaia u dolua tina tubuki. Diko a biu na sila, diko a biu na hava rivurivu tea, vae tulu rivuki na biu kehekeheki. 38Vae i God u vaia mo tubu hokinia hi aia u domiki, vunu a biu u mulemai kina tubu hinea u taritarisa maia. #Jen 1.11
39A vihiko gwatu na rusa rau doludolua kehe nga. A vihiko na tangaloi u dolua, a vihiko na boboroa u dolua, a vihiko na manu u dolua, vake a vihiko na ika u dolua.
40Vunu a kinau hinea rau eno lolo taetae rau dolua tina kinau hinea rau eno lo varamana. A karekarea na kinau lolo taetae u dolua tina karekarea na kinau lo varamana. 41A hahaviada na mataniaho u dolua, a hahaviada na vula u dolua, a hahaviada na vitu rau dolua, vunu a hahaviada na vitu ratuaki rau doludolua tiura ratuaki.
42Lo taroki hinea a tangaloi rana maraka taliku tina mateana, vae ne hoki na leo aira vano hi. A tarabehi hinea tau tanomia vae ne madamada, vae a tangaloi ne maraka taliku, a tarabehina nehe madamada lai tea. 43A tarabehi hinea tau tanomia u hati vohoki, vake he huira tea. Vae ne maraka taliku ne karea vohoki, ne huira. #Vil 3.20-21 44A tarabehi hinea tamo tanomia, aia a tarabehi huri na mauriana lo varamana. Vae lo taroki a tangaloi ne maraka taliku a tarabehina ne dolua, vae neri ahi mai God.
A tarabehi huri na mauriana lo varamana eia, vunu a tarabehi huri na ahiana mai God eia vake. 45A Uliuli* Kokona u viti kwara, “A tangaloi tomua halaradu i Atam, i God u taua, vae u bete na mauriana na varamana hika lakwae,” vae i Atam rovonaki, aia a Tanungwe Kokona, aia u bete na ahiana. #a Jen 2.7; b Sione 6.63; 2 Kor 3.16,17 46A ahiana hi a Tanungwe Kokona mo bete he vanamai te tomua, vae a mauriana hi lo varamana aia u vanamai tomua, vunu vari a ahiana na Tanungwe mori vanamai. 47A tangaloi hi tomua halaradu i God u kihia kina tano, vae aia a tangaloi na varamana, vae a tangaloi kairuaki hi, aia u vanamai tina taetae. #Jen 2.7 48A tangaloi na varamana savia aira hoki na tangaloi hinea i God u kihia kina tano tomua halaradu. A tangaloi na taetae savia aira hoki na tangaloi hinea u vanamai tina taetae. 49Hikani i kita hoki na tangaloi hinea i God u kihia kina tano, vae lo hala hokinia hi, tanari hoki na tangaloi hinea u vanamai tina taetae. #Jen 5.3
50Rabela. A nogu leo aira vano hi a domianaki aia hika. A tarabehi hika, a vihikona eia, a daina eia, vae nehe soro lai te tilolo Vanua Karagwa hinea i God u hugwe koroa. A tarabehi hika aia a tarabehi na mateana. Vae a tarabehi hi nehe kwiribibi lavi na ahiana tea hinea a mateana tikei luna. #1 Kor 6.13
51-52Tulu taga. Hika a leo hinea u eno tavuniki. Hete kwara i kita vunu tana mate. Vae a tavui na rani ki rovonaki ne tangi, vakatukwale vohoki hokinia tamo mataru, i God ne bohiki na tarabehida i kita vunu. A tavui hi ne tangi a mateana rana maraka vae ranahe mate lai te taliku. Vunu i kita hinea tau ahi radu, i God neri bohiki na tarabehida vake. #a 1 Tes 4.15-17; b Mat 24.31 53A tarabehida hinea rau tuku hati, vae rana bohi rana mulemai kina tarabehi hinea ranahe hati lai tea. Vunu vake a tarabehida hinea rau tuku mate, vae rana bohi rana mulemai kina tarabehi hinea ranahe mate lai tea. #2 Kor 5.4 54Vae ne mule luna hokinia hi, a tarabehida hinea rau mate lai hika, rana bohi, rana mulemai kina tarabehi hinea ranahe mate lai tea. Vunu a leo hika lo Uliuli Kokona ne mule luna hinea mo viti kwara,
“A mateana,
i God u magarakinia.
!U guia u rovo ba!
55?Mateana,
kona gui kworohokikami?
?Mateana,
kona magaraki kworohokikami?” #Hos 13.14
56A mateana u lavi na nona huirana tina vaivai hati kwara ne magarakikita. A vaivai hati u lavi na nona huirana tina Tangwata*. #a Rom 7.13; b Rom 6.14 57Vae tau lagwaki God hinea u hago maikita tamo gui na hatiki lalahi na noda Hugwe* i Jisas Kraes*.
58Rabelagu. Vae huri hi tulu tu ne madi tulu hatu kilukilu. Tulu boloki karakara tigwaravu lo nomiu bolokiana lakwa na noda Hugwe, huri tulu kikilai kwara vatavataha na kinau tulu vai lo bolokiana nona Hugwe, vae a kwaiki ne eia. #2 Kron 15.7; Rev 14.13
Currently Selected:
1 KORIN 15: HWT
Highlight
Copy
Compare
Share
Want to have your highlights saved across all your devices? Sign up or sign in
Havakinau New Testament © Bible Society of the South Pacific, 2016.
