1 KORIN 14
14
A leo vake huri na hilehile na huirana tina Tanungwe Kokona
1Tulu huira kwara tulu ne huri na hala na lagwaana. Vunu tulu vai na domimiu ne huira huri kwara tulu ne lai lavi na hilehile na huirana hinea a Tanungwe Kokona mo toko betera. Vae a kinau haburu aia hi kwara a domimiu ne huira kwara tulu ne duruki na leo ti God. #1 Kor 12.31; 14.39 2A tangaloi hinea u kwahakwaha lo leo dolua, hinea a Tanungwe Kokona u bete lakwae, he kwaha te mana tangaloi vae u kwaha mai God, huri a tangaloi tikei kwara u kikilai na leona. Vae a Tanungwe u bete na huirana lakwae kwara ne viti huri na vitikareaki hinea rau eno tavuniki. 3Vae a tangaloi hinea u duruki na leo ti God u kwahabibi na tangaloi, mo rakati na domiga, mo kwaha tabetabeki maira mo vaira ramo rongo karea. 4A tangaloi hinea mo toko kwaha lo leo dolua, aia kehekeheki u huira kinia. Vae a tangaloi hinea u duruki na leo ti God u vai na kwarelua* doluaki ramo huira.
5Nu lengaia kwara i kamu vunu tulu ne kwaha lo leo mataroi, vae silesiletia hi nu lengaia kwara i kamu vunu tulu ne duruki na leo ti God. Diko a tangaloi hinea u kwaha lo leo mataroi he matangwasaraki na leo te hi kwara a kwarelua doluaki rana huira kinia, vae a tangaloi hinea u duruki na leo ti God u hago mana tangaloi siletia hi. #Nam 11.29 6Rabela. ?Diko na vanamai vaki maikamu, na kwaha maikamu lo leo mataroi, vae na hago kworohokinia maikamu? Diko nahe matangwasaraki na kinau karagwa tea hinea i God u vosangia lakweau, diko nahe viti na leo na kikikila tea lakwakamu, vae he karea tea. Vake diko nahe duruki na leo te ti God, diko nahe huhuikamu te kina kinau, vae nehe hago te maikamu vohoki.
7Tulu domidomi lo kinau hoki na bue horohoro mana gita. A kinau aira vano hi hete kinau mauri, a tangaloi vohoki ramori vaira ramo tatangi lai. Vae diko rahe rororo te kwara ne ngwalingilingi, vae tulu nehe kikilai te kwara a bolo aia makive hi ramo vai luga. 8?Vae diko te tavui ne horoana vae nehe tangi te kwara ne karea, a tangaloi rana kikilai kworohokinia kwara a taro na vuro u maravuti? 9?Lo hala hokinia hi diko tulu ne kwahakwaha lo leo dolua hinea he matangwasara te lakwa na tangaloi, rana kikilai kworohoki na nomiu leo? Vae a nomiu leo hi ne mule ki kinau vuroki vohoki. 10A leo mataroi hike lo varamana, vae vatavatahakinira a domianaki eia. 11Vae diko nahe kikilai na leo te hinea a tangaloi hi mo vitia, vae i nau nu kwarekinia kwara aia a taureure. Vunu a tangaloi hi vake u kwarekiau kwara i nau a taureure. 12Vae aia hokinia hi lakwakamu vohoki. Tulu lengaia haburu kwara a Tanungwe Kokona ne lalahikamu, vae ne vosangi kwara a nona huirana aia lumiu. Vae tulu ne huira vakevake luna kwara tulu ne vai na kwarelua rana huira vakevake kinia.
A hala kwara tana kwaha lo leo mataroi
13Vae huri hi, a tangaloi hinea u kwaha lo leo dolua, vae ne tiutangaroa kwara ne lavi na huirana kwara ne matangwasaraki na leo hi. 14Vae diko nu tiutangaroa lo leo dolua, aia hi a tanungwegu u tuku tiutangaroa, vae a domidomigu he kikilai na kinau te hinea nomo toko vitira. #14.14: Lo hala kairuaki a domidomi na leo hi aia hokinia hika kwara Vae diko nu tiutangaroa lo leo dolua, aia hi a Tanungwe Kokona hinea u toka lugu u tuku tiutangaroa, vae a domidomigu he kikilai na kinau te hinea nomo toko vitira. 15?U karea, vae nana vai kworoho? Nana tiutangaroa, na kwaha lo leo mataroi hokinia a Tanungwe Kokona u bete lakweau, vake na kwaha lo leo hinea nu kikilai. Nana kaho lo leo mataroi hokinia a Tanungwe Kokona u bete lakweau, vake na kaho lo leo hinea nu kikilai. #Eves 5.19 16Diko tulu ne lagwaki God lo leo mataroi kehekeheki, vae a tangaloi haro nga hinea rau bulu tabulutaki maikamu ranahe daraki lavi na leo te hi kwara rana viti “Aia hi kareaki,” huri rahe kikilaia tea. 17Diko te nomiu tiutangaroa hinea tulu lagwaki God kinira rau karea haburu, vae rahe hago lai te vohoki mana tangaloi.
18Nu lagwaki God huri nu kwahakwaha lo leo mataroi u siletikamu vunuhia. 19Vae lo nako na kwarelua*, nu lagwa kwara na viti na leo kailima vohoki hinea rau kikilai kwara vae na huhuira luna, u siletia hi kwara na viti na leo u tari vakarusa lo leo dolua.
20Rabela. Tulu hatu domidomi hoki na sakwarigi, aia tulu ne domidomi hoki na sakwarigi hinea a domiga hete lo hatiki. Vae lo nomiu domidomi tulu ne hoki na ngwarasea. #a Eves 4.14; b Vil 3.15 21Lo Uliuli* Kokona a Hugwe i God u viti kwara,
“Nari viti na leogu
lakwa na tangaloi vano hika.
Nari kwaha maira
lalahi na leo na taureure.
Nari kwaha maira
lalahi na leo na vanamaiana,
vae hetea,
a bulagu tangaloi vano hi
ranahe rongohuriau tea.” #Aes 28.11-12; Dut 28.49
22Vae huri na kinau hi, u matangwasara kwara a hilehile na huirana kwara a tangaloi rana kwahakwaha lo leo mataroi, u kwareki a kaivosangi lakwara hinea rahe hauhuri te lui God, hete lakwara hinea rau hauhuri. Vae a hilehile na huirana kwara a tangaloi rana duruki na leo ti God, aia hi u kwareki a kaivosangi lakwa na tangaloi hinea rau hauhuri lui God, hete lakwara hinea rahe hauhuri tea.
23Diko i kamu vunu tulu bulu tabulutaki, vae te tangaloi haro nga, diko aira hinea rahe hauhuri te lui God, rau vanamai vaki maikamu i kamu a kwarelua, vunu vatavatahakikamu tulu kwaha lo leo mataroi, vae a tangaloi vano hi rana viti kwara tulu reraka. #Bol 2.13 24Vae diko i kamu vunu tulu duruki na leo ti God, vunu te katukwale ne vanamai vaki maikamu hinea he hauhuri tea, diko aia a tangaloi tavalavarea, vae a nomiu leo ne kelia huri na nona vaivai hati. I God ne arekinia kina leo savia hinea mo rongo tikamu. #Sione 16.8 25A leo vano hi rana matangwasaraki savi na nona domidomi tavuniki. Vunu a tangaloi hi ne sovi hivo ne lai nona mavakiana lakwai God, ne viti lakwakamu kwara, “Kareaki i God aia lo livukamiu takwa-hi.” #Aes 45.14; Dan 2.47; Sek 8.23; Sione 4.19
A bohiana lo taro na kaikaluhakiana rana taritarisa
26Rabela, a nogu leo aira vano hi a domianaki aia hika. Diko tulu ne bulubulu tabulutaki huri na kaikaluhakiana, i kamu vunu a nomiu boloki ne eia. A tangaloi te katukwale ne kaho bolo, te katukwale ne huhui na tangaloi, te katukwale ne viti huri na kinau karagwa hinea i God u vosangi lakwae, te katukwale ne kwaha lo leo dolua, vunu te katukwale vake ne matangwasaraki na leo hi. Vae vatavataha na kinau vano hi tulu ne vai kwara a kwarelua* rana huira vakevake. #a 1 Kor 11.18; 12.8-10; b Eves 4.12 27Diko a tangaloi rana kwaha lo leo mataroi, a tangaloi kairua diko kaitolu vohoki rana kwaha. Vake diko a tangaloi katukwale ne kwaha, aia vohoki ne kwaha tarisaki ne kwaha ne rovo, vunu kairuaki takuni tiua. Vunu te tangaloi katukwale vake neri matangwasaraki na leo vano hi kwara a tangaloi rana kikilai. 28Vae diko a tangaloi tikei kwara ne matangwasaraki na leo hi, a tangaloi hinea u kwaha lo leo dolua ne hugu butu. Ne kwaha tabetabeki aia sibona mai God. 29A tangaloi* duruduruki kairua diko kaitolu rana duruki na leo ti God, vae rana kwaha, a tangaloi ratuaki rana rongo kwaheki na noga leo. #Bol 17.11; 1 Tes 5.21 30Vae diko te katukwale tikamu u hugu u rongo kwara i God u vosangia kina kinau karagwa, a tangaloi hi mo toko kwaha ne hugu butu kwara a tangaloi kairuaki hi ne viti na kinau hinea i God u vosangia kinia. 31Vatavatahakikamu tulu ne duruki lavi na leo ti God katukwale kehe nga kwara i kamu vunu tulu ne huhuhui tikamu muleki, tulu ne rakati na domimiu. 32A tangaloi hinea u lavi na huirana kwara ne duruki na leo ti God ne vai lai kwara ne kwiribibia sibona kwara ne kwaha diko ne hugu butu. 33I God he lengaia te kwara tulu ne kurekurere, vae u lengaia kwara tulu ne kwaha ne taritarisa lo hala na magemuana.
Tulu huri na bohiana hinea a kwarelua noi God doluaki ramo toko bohi luna lo noga bulubulu tabulutaki huri na kaikaluhakiana. 34A ravavine rana hugu butu lo taro na bulubulu hokinia hi. Rahe taritarisa tea kwara rana kwahakwaha, hokinia a Tangwata* nona gwaloana noi Isrel* u viti kwara, “Rana hugu tavuti na ngwera.” #Jen 3.16; 1 Kor 11.3; Eves 5.22; 1 Tim 2.12; Taet 2.5 35Diko te ravavine rau lengaia kwara rana uduhuri te kinau, rana uduhuri ki ratuaga ngwarasea tataga. Diko te vavine u kwahakwaha lo bulubulu na kwarelua, hi u kwareki a maemaeana lakua lakwakamu.
36?Kworohokinia? ?Tulu domi kwara a leo i God u vanamai tikamu tomua? ?Diko tulu domi kwara a leo i God u maravuti maikamu kehekeheki? 37Vae diko te katukwale tikamu u domi kwara aia a tangaloi duruduruki, diko u domi kwara a Tanungwe Kokona aia u tuku tomuakinia, vae ne kikilai kwara a leo vano hi nomo ulira lakwakamu aira a tulikileo nona Hugwe*. #1 Sione 4.6 38Vae diko te tangaloi hokinia hi he lagwa te kwara ne rongohuri na leogu, he karea te kwara tulu ne rongohuria.
39U karea rabela. Tulu vai na domimiu ne madi huri kwara vae tulu ne duruki na leo ti God. Vae tulu hatu tu koro na tangaloi hinea rau kwaha lo leo mataroi. 40Tulu vai savi na kinau vano hi lo hala bakoto hinea u taritarisa kwara vae a tangaloi rana lagwa luna. #1 Kor 14.33; Kol 2.5
Currently Selected:
1 KORIN 14: HWT
Highlight
Copy
Compare
Share
Want to have your highlights saved across all your devices? Sign up or sign in
Havakinau New Testament © Bible Society of the South Pacific, 2016.
