1 KORIN 1
1
I Pol mai Sostenes raru kwaha tabetabe mana ngwera Korin
1I nau i Pol hinea lo domikiana noi God mo kwareau mo rivukiau kwara na kwareki a kaihora* kokona noi Jisas Kraes*. I kamirua mai Sostenes i tuada, 2keru uli na leta hika lakwakamu a kwarelua* noi God lo gwatuivanua lakua Korin. I Jisas Kraes u vaikamu tulu mo kokona tulu mo kwareki a nona tangaloi, vunu i God u kwarekamu kwara tulu ne bulu mana nona tangaloi ratuaki. Lo varamana vataha na mahagweki rau tiutangaroa lo hina na noda Hugwe* i Jisas Kraes. Aia a noga Hugwe, a noda vake. #a 1 Kor 6.11; b Bol 9.14
3A tangaroa karea hika lakwakamu. I God i Tamada mai Jisas Kraes a noda Hugwe raru ne hago maikamu kina nogaru domi tabetabe lakua, vake raru ne bete na magemuana ne eno maikamu. #Rom 1.7
I Pol u lai nona lagwaana lakwai God
4I nau nu lai nogu lagwaana lakwa na nogu God tigwaravu hurikamu. Lo nona domi tabetabe lakua mo hago maikamu hinea tulu hariki lui Jisas Kraes*. 5I God u vaikamu tulu mo kukwere kina nona kinau karekarea savia lo nomiu tokaana lui Kraes, huri i kamu tulu hariki u rovo ba luna, vae hikani tulu mo kikikila mo karea lo kinau savia, tulu mo viti huri na kinau savia mo matangwasara. 6A hagoleo huri Kraes u vanamai u eno u madi ba lumiu. 7Vae lo taroki hini i kamu tulu mo hugu tara kwara vae i God ne vosangi na noda Hugwe i Jisas Kraes lakwakita, vae i kamu tulu lai savi na hilehile hinea a Tanungwe Kokona mo bete lakwakamu, hete katukwale kwara tulu he lavia tea. #Luk 17.30; 2 Tes 1.7; Taet 2.13 8Vae i God ne kwiribibikamu tulu ne tu ne madi vaki lo gwereki kwara a hatiki ne tikei lumiu lo Rani na noda Hugwe i Jisas Kraes. #1.8: Lo Rani na noda Hugwe i Jisas Kraes. Kona taga A RANI NONA HUGWE lo Deksenare lo buku hika takuni. #Vil 1.6; 1 Tes 3.13; 5.23 9I God u kwiribibi na nona leo tigwaravu, vae tulu ne domidomi tiluna hinea mo kwarekamu kwara tulu ne bulubulu tabulutaki mai Natuna a noda Hugwe i Jisas Kraes. #Dut 7.9; 1 Kor 10.13; 1 Tes 5.24; 1 Sione 1.3
A kwarelua rau makwahekwahe
10Rabela. Lo hina i Jisas Kraes* a noda Hugwe* nu seseaka hurikamu kwara i kamu vunu tulu ne viti na leo katukwale, tulu ne hatu makwahekwahe lo nomiu bulubulu, a domimiu ne katukwale, tulu ne mulemai katukwale. #Vil 2.2 11Rabela, a rabela i Kloe rau viti matangwasarakikamu lakweau kwara tulu tuku viroro mulekikamu. 12I nau nu tuku domidomi lo leomiu hikwe kwara tulu mo viti na leo rau doludolua kehe nga. Ratuaki rau viti “I nau a noi Pol”, ratuaki rau viti “I nau a noi Avolos”, ratuaki rau viti “I nau a noi Pita”, vunu ratuaki vake rau viti “I nau a noi Kraes.” #a 1 Kor 3.4; b Sione 1.42; Bol 18.24-28 13?Kworohokinia? ?Tulu domi kwara tulu ne kwaheki Kraes hokinia hi? !Hetea! I nau i Pol, vae rahe duruau te tilo kaibetu hurikamu. ?I kamu tulu lai bavtaes ba lo hinagu kwara tulu ne mulemai ki nogu tangaloi? !Hetea!
14Nu lagwaki God huri nahe bavtaesikamu te kwara te katukwale, vae kehekeheki i Krisvas mai Gaeas. #a Bol 18.8; b Rom 16.23; d Bol 19.29 15Vae hika hete katukwale kwara ne viti lai kwara tulu lai bavtaes lo hinagu. 16Io, nu domihagwe, nu bavtaes i Stevanas mana nona vakabela vake. Vae nohe domihagwe tea kwara nu bavtaes na tangaloi te vake. #1 Kor 16.15 17I Kraes he horeau tea kwara na vai bavtaes, vae aia u horeau kwara na heretuvaki na Roro Karea. Vake he horeau tea kwara na viti huri na Roro Karea hi kina leo na kikikila nona tangaloi. Kwara vae diko nu heretuvakinia kina kikikila hokinia hi, vae a kikikila hi ne mai vai na mateana noi Kraes lo kaibetu ne mule ki kinau vuroki, a huiranaki ne tikei. #Mat 28.19; Sione 4.2
I Kraes aia a huirana noi God, a lolorani noi God
18A leo huri na mateana noi Kraes* lo kaibetu aia hoki na leo reraka lakwara hinea, vae rana sala. Vae lakwakita hinea i God u tuku vakahikikita, a leo hi aia a huirana noi God. #2 Kor 4.3; Rom 1.16 19A Uliuli* Kokona u viti kwara,
“A kikikila nona tangaloi kikikila
vae nana magarakinia,
Vunu a domidomi sea
nona tangaloi domidomi sea,
vae nana vaia
ne mule ki kinau vuroki.” #Aes 29.14
20?A tangaloi kikikila aira ave? ?A tangaloi domidomi sea aira ave? ?A tangaloi hinea rau kwahakwaha tigwaravu lo kinau na varamana aira ave? Rau tikei. I God u vosangi kwara a kikikila nona tangaloi na varamana hika rau reraka vohoki. #a Aes 19.12; b Aes 33.18; d Aes 44.25
21I God u kikikila vohoki, vae u domikinia ba kwara a tangaloi ranahe kikilaia te kina noga kikikila siboga. Aia i God u domikinia kwara ne vakahiki na tangaloi hinea rau hauhuri luna kina leo hika tamo toko heretuvakinia. Vae lo nako na tangaloi a leo hika aia hoki na leo na rera vohoki. #Mat 11.25 22A gwaloana noi Isrel* rau lengai na kaivosangi na huirana noi God. A ngwera Gris rau soro haro na kikikila. #a Mat 12.38; Sione 4.48; b Bol 17.18,32 23Vae i kita tau heretuvaki Kraes mo mate lo kaibetu. A leo hi a gwaloana noi Isrel rau domi kwara he taritarisa te vohoki, rau rongo hati kinia. Vunu a tangaloi tavalavarea tina gwaloana noi Isrel rau rongoa hoki na leo na rera. #a Rom 9.32; b 1 Kor 2.14 24Vae i kita vunu hinea i God u kwarekita, kinahavaki i kita a gwaloana noi Isrel diko a tangaloi tavalavarea, vae tau rongo kwara a leo hi u viti i Kraes aia a huirana noi God, a kikikila noi God. #Kol 2.3 25A havakinau hinea i God u vai, hinea a tangaloi rau tuku domi kwara a domidomi na rera, aia u sileti na kikikila mana domidomi sea nona tangaloi. Vake a havakinau hinea i God u vai, hinea a tangaloi rau domi kwara a huiranaki tikei, vae u huira sileti na huirana nona tangaloi. #2 Kor 13.4
26Rabela. Tulu domidomi. Lolona hinea i God mo kwarekamu lo domidomi nona tangaloi na varamana, te kairua vohoki tikamu rau domidomi sea, rau huira, rau lalakua. #Mat 11.25; Sione 7.48; Sem 2.1-5 27Vae i God a nona domikiana kwara ne vivilokinira hinea a tangaloi na varamana rau viti kwara a rera luga, kwara vae ne vaira hinea rau domidomi sea rana maemae. Vunu u vivilokinira hinea a tangaloi rau domi kwara a huirana tikei luga, kwara vae ne vai na tangaloi huira rana maemae. 28Aia u vivilokinira hinea a tangaloi na varamana rahe domidomi te tiluga, rau domi kwara aira a tangaloi vuroki, rau domi bulakikinira. I God u vai kwehini kwara ne magaraki na kinau hinea a tangaloi na varamana rau domidomi luga kwara rau hahaburuka. 29Vae hikani hete tangaloi kwara ne kwaha domidomia lo nako i God. #Rom 3.27; Eves 2.9 30Vae i kamu, i God u harikikamu lui Kraes ba, vae hikani u vai i Kraes u kwareki a gwataki na noda kikikila, u vaikita tamo bakoto lo nako i God. U vaikita tamo kokona tamo kwareki a tangaloi noi God, u kasatukuhikita tina noda vaivai hati. #Jer 23.5-6; Sione 17.19; 2 Kor 5.21 31Vae hokinia a Uliuli Kokona u viti “Ihe te u lengaia kwara ne kwaha domidomia ne kwaha domidomia lo kinau hinea a Hugwe* mo vai lakwae.” #Jer 9.24; 2 Kor 10.17
Currently Selected:
1 KORIN 1: HWT
Highlight
Copy
Compare
Share
Want to have your highlights saved across all your devices? Sign up or sign in
Havakinau New Testament © Bible Society of the South Pacific, 2016.
