PAKI TEA NI ROMA 6

1Nalakena tea wanogoe tuga wo noa nasava? Tuga toko namarinaleosaana doko naga nasaup̃iana ega laapa kite? 2Ega ta dapala nogoe mau. Nigida waina tu mate paki namarinaleosaana tuga to mauri doko asa dapale sava? 3Kite ku pei sap̃o naga tea maga waina tu pei tea bapetisoana paki Kristo Yesu tu pei tea bapetisoana paki namateana aneana? 4Nalakena tea wanogoe tu pei tea ovakiana sikoti a pae nabapetisoana paki namateana: naga dakiusi waina Kristo e pei tea sikeana duleana m̃elu dua ki tea mate maga pae nasamasamaana ki Tamana, dapala nogoe nigida ma tuga surata pae naveiteavauana ni namauriana. 5Nalakena tu pe saisai ki nia natakiusiana ni namateana aneana, tu pe wo moro saisai ki nia natakiusiana ni namoroduleanaana aneana; 6doko atae tea waia, naga naatam̃oli tuai kakagida e pei tea turiana sikoti a nakau valadagoto, naga nap̃atoko ni namarinaleosaana ega vei tea maripuolikiana, naga nigida tuga ta moro pei naviti ni namarinaleosaana mau; 7nalakena tea waina e mate e pei tea marileanakiana m̃elu dua ki namarinaleosaana. 8Ma tu pe mate sikoti Kristo, tu pe saralomau naga tuga wo moro mauri sikoti a; 9doko atae naga Kristo waina e pei tea sikeana duleana m̃elu dua ki tea mate maga ega wo da moro mate mau; namateana e da moro maramara dap̃au sa mau. 10Nalakena namateana waina e mate asa, e paka sikai maau mate paki namarinaleosaana: ma namauriana waina e mauri asa e mauri paki Sup̃e. 11Dapala nogoe nimu ma kuga tum̃amu midoaki mu naga ku pei tea mate paki namarinaleosaana, ma tea mauri paki Sup̃e doko Kristo Yesu.

12Nalakena tea wanogoe namarinaleosaana ega ta maramara nap̃atokomu mau waina ega wo mate, naga kuga rogo paratiki namasauana sa kakana maga: 13go kuga ta pitua ki naleo kakamu maga paki namarinaleosaana mau, dapala naleo ni nawosiwosiana maga ni namarinaleotageleana; ma kuga tum̃amu pitua ki mu paki Sup̃e, dapala tea mauri maga m̃elu dua ki tea mate maga, go naleo kakamu maga euga tapala naleo ni nawosiwosiana maga ni namarinaleoleanaana paki Sup̃e. 14Nalakena namarinaleosaana ega wo da maramara dap̃au mu mau: nalakena ku da doko etano ki nawotaeana mau, ma ku doko etano ki nasaup̃iaana.

15Nalakena tea wanogoe nasava? Tuga mari naleo sa, nalakena tu da doko etano ki nawotaeana mau, ma tu doko etano ki nasaup̃iaana kite? Ega ta dapala nogoe mau. 16Ku da atae naga tea waina ku dum̃amu pitua ki mu paki asa dapala tea suasua maga paki narogoparatikiana, ku pei tea suasua maga ki tea waina ku dogo parati ki nia; tea suasua maga ki namarinaleosaana paki namateana, kite ki narogoparatikiana paki namarinaleoleanaana? 17Ma Sup̃e ega vei tea vasadodom̃atakiana, nalakena ku pea pei tea suasua maga ki namarinaleosaana, ma ku dogo parati ki pae nap̃op̃omu naatulakeana ni navasapiseikiana waina ku pei tea vituakiana paki asa; 18go ragi waina ku pei tea veresiana m̃elu dua ki namarinaleosaana, ku pei tea suasua maga ki namarinaleoleanaana. 19A pasa pae naatam̃oli maga nalakena namanainaiana ni nap̃okasimu: nalakena dakiusi waina ku pitua ki naleo kakamu maga naga euga vei tea suasua maga ki naloaana go ki namarinaleotageleana paki marinaleotageleana, kuga vitua ki ega tapala nogoe ragi waia naleo kakamu maga, naga euga vei tea suasua maga ki namarinaleoleanaana paki namaridautaukiana. 20Nalakena ragi waina ku pei tea suasua maga ki namarinaleosaana, ku pei tea veresiana nalo ni namarinaleoleanaana. 21Nalakena tea wanogoe ku peani nawa nasava ragi wanogoe nalo ni tea maga waina ku maliere ara ragi waia? Nalakena ragi edaku ni tea maga wanogoe e pei namateana. 22Ma ragi waia waina ku pei tea veresiana asa m̃elu dua ki namarinaleosaana, po pei tea suasua maga ki Sup̃e, ku peani nawamu paki namaridautaukiana, go namatap̃ago edaku kakana namauriana waina e du mau du. 23Nalakena namoriana ni namarinaleosaana e pei namateana; ma navituam̃olikiana ki Sup̃e e pei namauriana waina e du mau du doko Kristo Yesu Nawota anigida.

Currently Selected:

PAKI TEA NI ROMA 6: NTB

Highlight

Copy