PAKI TEA NI ROMA 15

1Ma nigida waina tu kasua e one gida one naga tuga tapetape namanainaiana maga ki tea maga waina eu da kasua mau, go naga tuga ta mari tea waina tu dum̃agida midoaki m̃ata ki nia mau. 2Sara naata kakagida euga mari tea waina tea ni m̃aladigi ki da eu midoaki m̃ata ki nia raki tea waina e p̃ia, paki natavagiana. 3Nalakena Kristo ma e da mari tea waina e dum̃ana midoaki m̃ata ki nia mau; ma dapala waina e pei tea midiriana, Navasapinoaana maga ki tea maga waina eu pasapinoa ki‐go eu dowo au. 4Nalakena tea maga waina eu pei tea midiriana sala vea eu pei tea midiriana raki navasapiseiki‐gida‐ana, naga tuga veani naleogoroana pae nasokiana go pae navakavakaleana ni navasaana midiriana maga. 5Ma Sup̃e ni nasokiana go ni navakavakaleana ega tua mu naga kuga midoaki tea sikai maau dum̃amu sikoti mu, ega vae Kristo Yesu: 6naga kuga samasamani ki p̃op̃o sikai maau go ki nawoka sikai maau Sup̃e go Tama ni Nawota anigida Yesu Kristo. 7Nalakena tea wanogoe kuga tum̃amu piragi soki mu, ega tapala waina Kristo ma e piragi soki mu, paki nasamasamani‐Sup̃e‐ana. 8Nalakena a noa naga Kristo e pei tea mariana e pei tea suasua sikai ni natovadaviviana nalakena nalomauana ki Sup̃e, naga ega lawosoki nasaiana maga paki tamagida maga, 9go naga nalauna p̃ota maga euga samasamani Sup̃e nalakena nadodomiana aneana; dapala waina e pei tea midiriana, e naga,

Nalakena tea wanogoe aga wo pasadodom̃ata ki‐go m̃aleoputo ni nalauna maga,

Go aga wo lega samasamani nagisam̃a.

10Go e moro naga,

Kuga kola laelaea, nalauna maga, sikoti narei aneana.

11Go e moro naga,

Kuga samasamani Yehovah, nalauna maga mamau puti;

Go narei maga mamau puti euga vasa samasamani a.

12Go e moro naga, Isaiah e naga,

Nakoa ni Yesse ega wo doko,

Go tea waina e pakilina naga ega maramara dap̃au nalauna maga;

Nalauna maga euga wo leogoro pavatu asa.

13Ma Sup̃e ni naleogoroana ega vakavuro mu ki sara nalaelaeaana go natam̃ateana ragi waina ku do saralomau, naga kuga veani p̃arua ki naleogoroana doko nakasuaana ki Naatana Tapu.

14Go a saralomau kasua, taigu maga, kinau ma nalo kakamu, naga nimu ma ku pura ki nawiaana, doko pei tea vakavuroana ki sara naataeana, po mari atae naga kuga dum̃amu dapavanau mu. 15Ma a piviari p̃arua midiri paki mu pae namagovai, dapala a mari mu kuga moro midoaki nia, nalakena nasaup̃iaana waina e pei tea vituakiana pae Sup̃e paki nau, 16naga aga vei tea suasua sikai ki Kristo Yesu paki tea ni nalauna p̃ota maga, doko do mari nawosiana ki tea viri narogorogoana wia ki Sup̃e, naga navituakiana ni nalauna p̃ota maga ega vei tea tapem̃atakiana, tea maridautaukiana pae Naatana Tapu. 17Nalakena tea wanogoe a peani navakavakaeana doko Kristo Yesu nalo ni naleo maga waina eu pei tea ki Sup̃e. 18Nalakena aga wo da piviari pasa te navatuna sikai ni tea maga waina Kristo e da mari ra pae au mau, raki narogoparatikiana ki tea ni nalauna p̃ota maga, ki navasaana go ki nawosiana, 19doko nakasuaana ni navaivaiana maga go ni tea ni namagaana maga, doko nakasuaana ki Naatana Tapu; dapala waina a dogorogo pakavuro ki narogorogoana wia ki Kristo pae Yerusalem, go daliviri pa pa paki Illirikon; 20ma dapala nogoe a midoaki dutua ki naga aga rogorogo ki narogorogoana wia tokora maga waina nagisa ni Kristo e da pei tea noaana ara mau, naga aga ta davagi doko laketano ki naatam̃oli p̃ota sikai mau; 21ma dapala waina e pei tea midiriana, e naga,

Tea maga waina e da pei tea rogorogokiana paki da nalo kakana mau, euga wo punusi,

Go tea maga waina eu da dogo mau, euga wo midoaki atae.

22Nalakena tea wanogoe a pei tea tugoroana paka laapa wanogoe naga aga ta paloti punusi mu mau: 23ma ragi waia, waina a da moro peani tokora navanua maga wanogoe mau, go waina a peani namasauana warua natau laapa naga aga valoti punusi mu, 24ragi waina a pe surata paki Spania (nalakena a leogoro naga aga vunusi mu ragi waina aga surata duaduru, go naga aga vei tea vusiana pae mu paki tokora wanogoe, a pe vea pei tea vakavuroana pae namagovai kiamu) 25ma ragi waia a surata paki Yerusalem pano, a magi tea tautau maga suasua. 26Nalakena Masedonia go Akaia eu midoaki m̃ata ki nia naga euga magi tea tika maga ni tea tautau maga waina eu doko Yerusalem mari te navituam̃olikiana sikai. 27Nalakena eu midoaki m̃ata ki nia, go naleo adeada e one ara one. Nalakena tea ni nalauna p̃ota maga eu pe saisai peani tea ni naatana adeada maga, e pe one ara one naga nara ma euga madeada suasua nalo ni tea ni nap̃okasi maga. 28Nalakena tea wanogoe ragi waina aga mari sua tea wanogoe, po madeada pulusoki sua nawa wanogoe, aga wo paloti pae mu paki Spania pano. 29Go a atae naga, ragi waina aga valoti punusi mu, aga wo paloti pilake navakavuroana ni navasam̃atakiana ki Kristo.

30Ma a pavarani mu, taigu maga, pae Nawota anigida Yesu Kristo, go pae nadodomiana ki Naatana, naga kuga maginau mari kasua sikoti au natapasavasaana animu maga paki Sup̃e; 31naga aga vei tea vualuaana m̃elu dua ki tea maga ni Yudea waina eu da saralomau mau, go naga nasuasuaana aginau paki Yerusalem ega vei tea tapem̃atakiana ki tea tautau maga; 32naga aga valoti punusi mu pilake nalaelaeaana pae namasauana ki Sup̃e po maromaro sikoti mu. 33Ma Sup̃e ni natam̃ateana ega sikoti puti mu. Amen.

Currently Selected:

PAKI TEA NI ROMA 15: NTB

Highlight

Copy