PAKI TEA NI ROMA 14

1Ma tea waina e manainai nasaralomauana kuga viragi soki a, masale ki namidoakip̃otaeana maga ni namidodoana maga. 2Naatam̃oli sikai e saralomau naga ega kani sara naleo, ma tea waina e manainai e gani tea lawoana maga. 3Tea waina e ganikani ega ta midoaki p̃alo ki tea waina e da ganikani mau; go tea waina e da ganikani mau, ega ta pasa p̃otae tea waina e ganikani: nalakena Sup̃e e piragi soki a. 4Nigo ku pei sei waina ku pasa p̃otae tea suasua ki tea p̃ota? E magi nawota aneana lawodu kite e dowo. Ma ega wo pei tea silaeana ega lawodu; nalakena Nawota e mari atae mari a ega lawodu. 5Naatam̃oli sikai e midoaki p̃otae naaleatia sikai naga e p̃arua liu naaleatia p̃ota sikai: tea p̃ota sikai e midoaki p̃otae sara naaleatia naga eu pataka sikai. Sara naatam̃oli euga sikasikai saralomau pakavuro doko namidodoana adeada. 6Tea waina e midoaki naaleatia, e magi Nawota midoaki nia; go tea waina e ganikani, e magi Nawota ganikani, nalakena e pasadodom̃ata ki Sup̃e; go tea waina e da ganikani mau, e magi Nawota da ganikani mau, po pasadodom̃ata ki Sup̃e. 7Nalakena te naata sikai kakagida e da dum̃ana maneana mauri mau, go te naata sikai e da dum̃ana maneana mate mau. 8Nalakena tu pe mauri, tu magi Nawota mauri; kite tu pe mate tu magi Nawota mate: nalakena tea wanogoe tu pe mauri, kite tu pe mate, tu pei tea ki Nawota. 9Nalakena raki tea wanogoe Kristo e mate, po moro mauri, naga ega vei Nawota ki tea mate maga go ki tea mauri maga. 10Ma nigo, ekasana ku pasa p̃otae taim̃a? Kite nigo ma, ekasana ku midoaki p̃alo ki taim̃a? Nalakena tuga wo mamau puti lawodu narae ni malo tasake ni navasap̃otaeana ki Sup̃e. 11Nalakena e pei tea midiriana, e naga,

Kinau a mauri, Yehovah e noa e, sara nap̃atua euga wo ditip̃atua paki nau,

Go sara namena euga wo pasadodom̃ata ki Sup̃e.

12Nalakena tea wanogoe sara naata kakagida euga wo dum̃ada atusi ra paki Sup̃e.

13Nalakena tea wanogoe tuga ta moro dum̃agida pasa p̃otae gida mau: ma kuga vasa p̃otae tea waia, naga te naata sikai ega ta doropusi tea tapilagonaana sikai narae ni taina mau, kite tea waina ega rowo asa. 14A atae, po saralomau kasua doko Nawota Yesu, naga te navatuna sikai e da dum̃ana loa mau: ma te naata e pe midoaki te navatuna naga e loa, e loa paki naata wanogoe. 15Nalakena taim̃a e pe susue nalakena navinaga, ku da moro surata pae nadodomiana mau. Tea waina Kristo e maneana mate p̃a ta mari sa ki nia ki navinaga anigo mau. 16Nalakena tea wanogoe tea wia anigo ega ta pei tea vasasakiana mau: 17nalakena namarakiana ki Sup̃e e da pei nakaniana go namunuana mau, ma e pei namarinaleoleanaana go natam̃ateana go nalaelaeaana doko Naatana Tapu. 18Nalakena tea waina e magi Kristo suasua tea wanogoe e pei tea midoakim̃atakiana ki Sup̃e, go tea maridogopiragiana ki naatam̃oli maga. 19Nalakena tea wanogoe tuga sava dausi naleo maga ni natam̃ateana, go naleo maga ni natavagiana dum̃agida paki gida. 20P̃a ta dakai nawosiana ki Sup̃e nalakena navinaga mau. Naleo maga mamau puti eu dautau lomau; ma e sa ki naatam̃oli waina e ganikani pae natapilagonaana. 21E p̃ia naga p̃a ta gani nap̃okasi mau, go naga p̃a ta munu waine mau, go naga p̃a ta mari te navatuna mau waina taim̃a e dapilagona asa. 22Nasaralomauana waina nigo ku peani a, p̃a veani a ega sikoti ko narae ni Sup̃e. Naata waina e da dum̃ana pasa p̃otae a mau nalo ni tea waina e midoaki nia naga e p̃ia e maropa. 23Ma tea waina e midoakisara e pe kanikani e pei tea tip̃akotoviana asa, nalakena e da ganikani pae nasaralomauana mau; go sara naleo waina eu da pei tea ni nasaralomauana mau eu pei namarinaleosaana.

Currently Selected:

PAKI TEA NI ROMA 14: NTB

Highlight

Copy