APOKALUPESI 11
11
1Go nau sikai e pei tea vituakiana paki nau e dakiusi tiko sikai: go naata sikai e naga, P̃a tuleana, go p̃a rowogi nasum̃a tapu ki Sup̃e, go wede ni naviriana, go tea maga waina eu do lotu asa. 2Go roara waina e doko etaku ni nasum̃a tapu, p̃a toropusi a ega toko etaku, go p̃a ta dowogi a mau; nalakena e pei tea vituakiana paki nalauna p̃ota maga: go euga wo pasi pakitano natokoana tapu atelagi rualima pati tamate dua. 3Go aga wo dua tea noa sokisoki dua aginau, go eroga wo pea noa sai naaleatia manu sikai p̃onotia dua rualima takuna latesa, doko do suni nakulukulu ni sak. 4Nara ero pei oliva dua go nakau ni nasulu dua, waina ero lawodu narae ni Nawota ni maramana. 5Go te naata e pe masauna naga ega mari sa ki da, nakapu e dave m̃elu dua ki nawokada, po ganidinomi tea kokona ki da maga: go te naata e pe masauna naga ega mari sa ki da, e one asa one naga ega vei tea maripunueana ega tapala nogoe. 6Nara ero peani nakasuaana naga eroga kokoro nakoroatelagi, naga ega ta p̃owo mau naaleatia maga ni naveanoasaiana adeada: go ero peani nakasuaana dap̃au noai maga naga eroga roa ra euga vei nada, go naga eroga wokati maramana ki sara naatugiana, ragi maga waina ero pe masauna. 7Go ragi waina eroga mari sua nanoasokisokiana adeada, nalo mila waina e sake m̃elu dua ki epua umai ega wo mari navakalo paki da, po mari matua ki da, po mari punue ra. 8Go nap̃atokoda ero one napua welewelea ni natokoana warua, waina pae naatana e pei tea salagisaana ki Sodom go Ityipt, tokora waina Nawota adeada e pei tea turiana asa nakau valadagoto. 9Go tea ni narei maga, go ni naworawora maga, go ni namena maga, go ni nalauna maga seara kakada eu do leopunusi nap̃atokoda naaleatia dolu go namagovai, go eu da suasua ki nap̃atokoda naga eroga vei tea toropusiana paki matigo mau. 10Go tea maga waina eu doko maramana eu laelaea nalo kakada, po mari katakata; go euga wo dip̃aki lua dum̃ada dua ra navituaana maga, nalakena profeta dua wanogoe ero mari tea maga waina eu doko maramana eu pitinu. 11Go ragi waina naaleatia dolu go namagovai wanogoe eu nopu namero ni namauriana m̃elu Sup̃e e sili ara, go ero lawodu nam̃eleda; go namatakuana warua e dowo tea maga waina eu leopunusi ra. 12Go ero dogo nadaleo warua sikai m̃elu nakoroatelagi e noa ki da, e naga, Koroga sake umai paki nea. Go ero sake paki nakoroatelagi pano doko napopouru; go tea maga waina eu kokona ki da eu leopunusi ra. 13Go aura wanogoe naruru warua sikai e pakilina, go namagovai kerualima ni natokoana e dowo; go naatam̃oli manu larua eu pei tea maripunueana ki naruru wanogoe; go tea p̃ota maga eu pei tea mariana eu mataku, go eu pitua ki nasamasamaana paki Sup̃e ni nakoroatelagi.
14Ai kerua e pano sua: kuga leo, Ai ketolu e do umai m̃araverave.
15Go agelo kelarua e sui paiga; go nadaleo warua maga eu doko nakoroatelagi, eu naga, Namarakiana ni maramana e po pei agi Nawota anigida, go agi Kristo aneana: go ega wo maramara pa pa ega tu du po du mau du. 16Go tea matua rualima dua tamate pati, waina eu dasake narae ni Sup̃e doko malo tasake adeada maga, eu dowo dap̃olosiwo, po lotu ki Sup̃e, 17eu naga, Au pasadodom̃ata ki‐go, Nawota Sup̃e O, Tea Kasua mau, waina ku doko ragi waia go waina ku doko tuai; nalakena ku dape nakasuaana warua anigo, go ku maramara. 18Go nalauna maga eu maeto, go namaetoana anigo e umai, go ragi ni tea mate maga naga euga vei tea vasap̃otaeana, go naga p̃a vitua ki namoriana paki tea suasua anigo maga profeta maga, go paki tea tautau maga, go paki tea maga waina eu matauki nagisam̃a, tea kiki maga go tea warua maga; go naga p̃a mari sa ki tea maga waina eu do mari sa ki maramana.
19Go nasum̃a tapu ki Sup̃e waina e doko nakoroatelagi e pei tea wolagatiana; go areka ni navasasokiana aneana e pei tea vunusiana doko nasum̃a tapu aneana, go navila maga eu pakilina, go nadaleo maga, go tovae maga, go naruru sikai, go usa ni vatu warua.
Currently Selected:
APOKALUPESI 11: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
