PAKI TEA NE EFESO 6
6
1Piakirikiri maga, kuga rogo parati ki nadaleo ni tea matua animu maga doko Nawota: nalakena tea wanogoe e leana. 2P̃a dodomadagani tamam̃a go p̃ilam̃a (tea wanogoe e pei natip̃akiana vea waina e pilake nasaiana), 3naga p̃a wia doko, go naga p̃a mauri doko parau doko maramana. 4Go tamada maga kuga ta mari natumu maga euga maeto mau: ma kuga vakalepisei ki da doko navasapiseikiana go natapavanauana ki Nawota.
5Tea suasua maga, kuga rogo parati ki nadaleo ni tea maga waina eu pei nawota animu nalo ni nap̃atokomu, ega vilake namatakuana go narururuana, doko nasikaimaauana ni nap̃op̃omu, ega tapala ku pe magi Kristo mari a; 6ega ta pae nasuasuaana ni namata mau, dapala tea mari namasauana ki naatam̃oli maga, ma kuga tapala tea suasua maga ki Kristo, doko do mari namasauana ki Sup̃e m̃elu naatamu; 7doko do rakaraka suasua, ega tapala ku pe magi Nawota suasua, po da magi naatam̃oli maga suasua mau: 8ku atae naga tea wia waina sara naata sikasikai eu pe mari a, tea wanogoe eu pe wo dape a ki Nawota, eu pe vei naviti maga kite eu pe vei tea tum̃ada doko. 9Go nawota maga kuga mari tea sikai maau maga wanogoe paki da, go kuga toropusi navasadip̃akotoviana: ku atae naga Nawota adeada ma animu e doko nakoroatelagi, go naviraginaraeana e da doko sikoti a mau.
10Tea edaku, kuga vei tea mariana kuga kasua doko Nawota, go doko namaridagaragaraana ni nakasuaana aneana. 11Kuga suni pulum̃a ki nalikau maga ki Sup̃e, naga kuga mariatae lawodu dip̃a namidoakip̃aiana maga ki diabolo. 12Nalakena napauana anigida e da dip̃a nap̃okasi go nada mau, ma e dipa namarakiana maga, dip̃a naveinawotaana maga, dip̃a tea maraki maga ni namaligo ni maramana waia, dip̃a taua maga ni naatana sa maga tokora maga ni nakoroatelagi. 13Nalakena tea wanogoe kuga tape dakati pulum̃a ki nalikau maga ki Sup̃e, naga kuga mari atae lawodugoro naaleatia sa, go naga kuga mari sua tea maga mamau puti, po lawodu. 14Nalakena tea wanogoe kuga lawodu, doko dasoki sua namalomu ki nalomauana, po suni sua kororum̃a ni namarinaleoleanaana, 15po pasi sua nam̃elevasiana ni namarim̃atakiana ni narogorogoana wia ni natam̃ateana; 16doko dape dakati sua sokari tea maga mamau puti nakokoro ni nasaralomauana, waina kuga wo mari atae mari punue puti natip̃a waina eu soro ki tea sigisigileo asa. 17Go kuga tape kalup̃au ni vatu ni namautipauriana, go lova ki Naatana, waina e pei navasaana ki Sup̃e: 18doko do dapasavasa sara ragi pae sara natapasavasaana go sara navavaraniana doko Naatana, po do leleogoro paki asa doko sara nanoadalikiana go sara navavaraniana nalo ni tea tautau maga mamau puti, 19go maginau, naga navasaana ega vei tea vituakiana paki nau ragi waina aga vasa, naga aga viviari dogorogo ki p̃aia ni narogorogoana wia, 20waina a maneana pei tea tautauana sikai doko namori ni vatu; naga aga viviari pasa asa, ega tapala waina e one au one naga aga vasa.
21Ma naga nimu kuga atae naleo aginau maga, dapala waina a doko, Tukiko, taigida dodomiana go tea suasua lomau doko Nawota, ega wo noakisai mu tea maga mamau puti: 22waina a dip̃aki lua e paloti punusi mu nalakena tea waia, naga kuga atae naleo maga nalo kaka gami, go naga ega vasapakavakale nap̃op̃omu.
23Natam̃ateana ega vei agi taigida maga, go nadodomiana pilake nasaralomauana, m̃elu Sup̃e Tamana go Nawota Yesu Kristo. 24Nasaup̃iaana ega sikoti tea maga mamau puti waina eu dodomi Nawota anigida Yesu Kristo doko nalomauana.
Currently Selected:
PAKI TEA NE EFESO 6: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
