NUMBERS 36
36
1Go nap̃au maga ni nasum̃a maga ni tamada maga ni namatarau ni naworawora ni Cilead natu ni Makir, natu ni Manasseh, ni natamarau maga ni Yosef natuna maga, eu rumai paki m̃aladigi, po pasa narae ni Moses, go narae ni tea maraki maga, nap̃au maga ni nasum̃a maga ni tamada maga ni Israel natuna maga: 2Go eu naga, Yehovah e dip̃aki nawota aginau naga ega vitua ki navanua naga ega vei tea veanipiolikiana pae gole paki Israel natuna maga: go nawota aginau e pei tea tip̃akiana pae Yehovah naga ega vitua ki tea veanipiolikiana ki taigami Selofehad paki natuna nagoroi maga. 3Go nara eu pe laki paki te naanoai ni naworawora p̃ota ni Israel natuna maga, tea veanipiolikiana adeada e pe wo pei tea tapeluaana m̃elu dua ki tea veanipiolikiana ki tamagami maga, go e pe wo pei tea vituakiana sokari tea veanipiolikiana ni naworawora waina ega wo pei adeada: dapala nogoe ega wo pei tea tapeluaana m̃elu dua ki matele ni tea veanipiolikiana aginami. 4Go ragi waina yubele ki Israel natuna maga ega wo umai, tea veanipiolikiana adeada ega wo pei tea vituakiana sokari tea veanipiolikiana ki naworawora waina ega wo pei adeada: dapala nogoe tea veanipiolikiana adeada ega wo pei tea tapeluaana m̃elu dua ki tea veanipiolikiana ki naworawora ni tamagami maga. 5Go Moses e dip̃aki Israel natuna maga pae navasaana ki Yehovah, doko do naga, Naworawora ni Yosef natuna maga eu pasa leana. 6Tea waia e pei naleo waina Yehovah e pitip̃aki asa nalo ni Selofehad natuna nagoroi maga, e naga, Euga laki paki naanoai waina eu dum̃ada midoa m̃ata ki nia; ma euga wo laki paki namatarau ni naworawora ni tamada ega sikina. 7Dapala nogoe tea veanipiolikiana ki Israel natuna maga ega wo da pei tea tapeluaana m̃elu dua ki naworawora sikai paki naworawora p̃ota: nalakena Israel natuna maga euga sikasikai puluti tea veanipiolikiana ni naworawora ni tamada maga. 8Go nagoroi atara maga mamau puti ni naworawora ni Israel natuna maga, waina eu peani tea veanipiolikiana sikai, euga wo sikasikai laki paki naanoai sikai ni namatarau ni naworawora ni tamada, naga Israel natuna maga euga sikasikai peani pioli ki tea veanipiolikiana ki tamada maga. 9Dapala nogoe tea veanipiolikiana ega wo da pei tea tapeluaana m̃elu dua ki naworawora sikai paki naworawora p̃ota; nalakena naworawora maga ni Israel natuna maga euga wo sikasikai puluti tea veanipiolikiana adeada. 10Dapala waina Yehovah e dip̃aki Moses asa, dapala nogoe Selofehad natuna nagoroi maga eu mari patakana. 11Nalakena Mahlah, Tirsah, go Hoklah, go Milkah, go Noah, Selofehad natuna nagoroi maga, eu laki paki tamada taina maga natuda maga. 12Eu laki paki namatarau maga ki natu maga ki Manasseh natu ni Yosef, go tea veanipiolikiana adeada e doko naworawora ni namatarau ki tamada doko.
13Tea maga wanogoe eu pei natip̃akiana maga go navasap̃otaeana maga waina Yehovah e pitip̃aki ara pae nam̃elearu ni Moses, paki Israel natuna maga malo matemate maga ni Moab nadigi ni Yordan leana dip̃a Yeriko.
Currently Selected:
NUMBERS 36: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
