NUMBERS 28
28
1Go Yehovah e pasa paki Moses, po naga, 2P̃a tip̃aki Israel natuna maga, po noa ki da, p̃a naga, Naviriana ni navinaga aginau, navinaga ni navituaana aginau maga pae nakapu, tea ni nap̃o wia paki nau, kuga vavaigoro naga kuga vitua ki da paki nau ragi tatutakiana kakada. 3Go p̃a noa ki da, p̃a naga, Navituaana pae nakapu waina kuga vitua ki nia paki Yehovah, ega vei tea waia; shiip natuna anoai maga ni natau sikai, tea mamaau p̃ia, ega rua sara naaleatia, ega vei navituaana tap̃arakiana sikai ni sara ragi. 4Kuga vitua ki shiip natuna sikai malip̃ogi, go kuga vitua ki shiip natuna kerua ragi melu; 5Go namagovai kerualima sikai ni efah sikai ni flaur wia ega vei navituaana ni flaur, tea sarisariana pilake namagovai kevati ni hin sikai ni naroro tuki‐p̃oroworosiana. 6E pei navituaana tap̃arakiana sikai ni sara ragi, waina e pei tea tawonakiana tava Sinai naga ega vei tea ni nap̃o wia, navituaana sikai pae nakapu paki Yehovah. 7Go navituaana takiana kakana ega vei namagovai kevati ni hin sikai, ega vilake shiip natuna sikai: p̃a taki lua navituaana takiana sikai ni namunuana kasua paki Yehovah tokora tapu. 8Go p̃a vitua ki shiip natuna kerua ragi melu: p̃a vitua ki nia ega tapala navituaana ni flaur ni malip̃ogi, go ega tapala navituaana takiana kakana, navituaana sikai pae nakapu, tea ni nap̃o wia paki Yehovah.
9Go naaleatia ni sabbath, shiip natuna anoai dua ni natau sikai, tea mamaau p̃ia, go namagovai kerualima dua ni efah sikai ni flaur wia naga ega vei navituaana sikai ni flaur, tea sarisariana pilake naroro, go navituaana takiana kakana: 10Tea wanogoe ega vei navituaana tap̃arakiana ni sara sabbath, ega vilake navituaana tap̃arakiana ni sara ragi, go navituaana takiana kakana.
11Go ragi ni naatulakeana ni atelagi animu maga sikasikai, kuga vitua ki navituaana tap̃arakiana sikai paki Yehovah; kau anoai vusavusa dua, go shiip anoai sikai, go shiip natuna anoai larua ni natau sikai, tea mamaau p̃ia; 12Go namagovai kerualima dolu ni efah sikai ni flaur wia, tea sarisariana pilake naroro, ega vei navituaana sikai ni flaur ega vilake kau anoai sikasikai sarasara ra; go namagovai kerualima dua ni flaur wia, tea sarisariana pilake naroro, ega vei navituaana sikai ni flaur, ega vilake shiip anoai sikasikai; 13Go namagovai kerualima p̃ota sikai ni flaur wia tea sarisariana pilake naroro ega vei navituaana sikai ni flaur ega vilake shiip natuna sikasikai sarasara ra; ega vei navituaana tap̃arakiana sikai tea ni nap̃o wia, navituaana sikai pae nakapu paki Yehovah. 14Go navituaana takiana kakada maga euga vei namagovai sikai ni hin sikai ni waine ega vilake kau anoai sikasikai, go namagovai ketolu ni hin sikai ega vilake shiip anoai, go namagovai kevati ni hin sikai ega vilake shiip natuna sikasikai: tea wanogoe e pei navituaana tap̃arakiana ni sara atelagi sikasikai usuraki natau. 15Go naninani anoai sikai ega vei navituaana sikai ni namarinaleosaana paki Yehovah; ega vei tea vituakiana ega vilake navituaana tap̃arakiana ni sara ragi, go navituaana takiana kakana.
16Go nakup̃a kerualima sikai tamate pati ni atelagi vea, e pei navakalauana ki Yehovah. 17Go nakup̃a kerualima sikai tamate lima ni atelagi wanogoe, e pei nasaisaiana tatutakiana sikai: naaleatia ega larua bred waina leven e dika asa ega vei tea kaniana. 18Naaleatia vea kuga veani nasososaisaikiana tapu sikai; kuga ta mari te nawosiana kasua seara asa mau: 19Ma kuga vitua ki navituaana sikai pae nakapu, navituaana tap̃arakiana sikai paki Yehovah; kau anoai vusavusa dua, go shiip anoai sikai, go shiip natuna anoai larua ni natau sikai: euga vei tea mamaau p̃ia: 20Go navituaana ni flaur kakada, flaur wia tea sarisariana pilake naroro: kuga vitua ki namagovai kerualima dolu ega vilake kau anoai sikasikai, go namagovai kerualima dua ega vilake shiip anoai wanogoe; 21Go p̃a vitua ki namagovai kerualima sikai ega vilake shiip natuna larua sikasikai sarasara ra; 22Go naninani anoai sikai ega vei navituaana sikai ni namarinaleosaana, naga ega manimu mari natap̃augoroana. 23Kuga vitua ki tea maga wanogoe ega vilake navituaana tap̃arakiana ni malip̃ogi, waina e pei navituaana tap̃arakiana ni sara ragi. 24Kuga vitua ki nia ega tapala nogoe sara naaleatia ni naaleatia ega larua, navinaga ni navituaana pae nakapu, tea ni nap̃o wia paki Yehovah: ega vei tea vituakiana ega vilake navituaana tap̃arakiana ni sara ragi, go navituaana takiana kakana. 25Go naaleatia kelarua kuga veani nasososaisaikiana tapu sikai; kuga ta mari te nawosiana kasua seara asa mau.
26Go naaleatia ni nawa vea maga ni takavea, ragi waina kuga vitua ki navituaana sikai ni flaur vau paki Yehovah, ragi ni nasaisaiana tatutakiana animu ni wiik maga, kuga moro peani nasososaisaikiana tapu sikai; kuga ta mari te nawosiana kasua seara asa mau: 27Ma kuga vitua ki navituaana tap̃arakiana sikai ni tea ni nap̃o wia paki Yehovah; kau anoai vusavusa dua, shiip anoai sikai, shiip natuna anoai larua ni natau sikai; 28Go navituaana ni flaur kakada, flaur wia tea sarisariana pilake naroro, namagovai kerualima dolu ega vilake kau anoai sikasikai, namagovai kerualima dua ega vilake shiip anoai. 29Go namagovai kerualima sikai ega vilake shiip natuna maga sikasikai sarasara ra; 30Go naninani anoai sikai, naga ega manimu mari natap̃augoroana. 31Euga sokari navituaana tap̃arakiana ni sara ragi, go navituaana ni flaur kakana, waina kuga vitua ki da, (euga vei tea mamaau p̃ia), go navituaana takiana kakada maga.
Currently Selected:
NUMBERS 28: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
