NUMBERS 27
27
1Go natu nagoroi maga ni Selofehad, natu ni Hefer, natu ni Cilead, natu ni Makir, natu ni Manasseh, ni nawora maga ni Manasseh natu ni Yosef, eu rumai paki m̃aladigi: go natuna nagoroi maga nagisada maga; Mahlah, Noah, go Hoklah, go Milkah, go Tirsah. 2Go eu lawodu narae ni Moses, go narae ni Eleasar tea viri, go narae ni tea maraki maga go nasaisaiana mamau, namata ni tap̃aup̃au ni nasaisaiana, 3po naga, Tamagami e mate masop̃alo, go nae e da pei tea sikai ni taua naatam̃oli waina eu dum̃ada saisai ki da, nara ma taua ni Korah, dip̃a Yehovah mau: ma e dum̃ana mate namarinaleosaana aneana; go e dika natuna naanoai. 4Ekasana nagisa ni tamagami ega vei tea tapeluaana m̃elu dua ki naworana nalakena e dika natuna naanoai? Kuga tua gami tea veanipiolikiana sikoti tamagami taina maga. 5Go Moses e dape navululuana adeada umai paki narae ni Yehovah. 6Go Yehovah e pasa paki Moses, po naga, 7Selofehad natuna nagoroi maga eu pasa leana: p̃a tua ra matele sikai ni tea veanipiolikiana sikoti tamada taina maga; go p̃a mari tea veanipiolikiana ki tamada ega vei tea adeada. 8Go p̃a vasa paki Israel natuna maga, po naga, Naata sikai e pe mate po dika natuna naanoai, kuga mari tea veanipiolikiana aneana ega vei tea ki natuna nagoroi. 9Go e pe tika natuna nagoroi, kuga tua taina maga tea veanipiolikiana aneana. 10Go e pe tika taina, kuga tua tamana taina maga tea veanipiolikiana aneana. 11Go tamana e pe tika taina, kuga tua namatarau aneana asa, waina e pei namatarau m̃aladigi ki nia, go nae ega wo peani a: go ega wo magi Israel natuna maga pei natawonakiana sikai ni navasap̃otaeana, dapala waina Yehovah e dip̃aki Moses asa.
12Go Yehovah e noa ki Moses, e naga, P̃a sake paki tava Abarim waina pano, po leo navanua waina a dua Israel natuna maga asa. 13Go ragi waina p̃a vunusi sua e, nigo ma p̃a wo pei tea saisaikiana paki namatarau anigo, dapala waina taim̃a Aaron e pea pei tea saisaikiana paki asa: 14Nalakena ku mari p̃auluulu dip̃a natip̃akiana aginau masop̃alo ni Sin, ragi waina nasaisaiana eu mari navululuana, ku da mari au a dapu namatada maga doko noai maga. (Noai maga wanogoe eu pei noai maga ni Meribah, ni Kadesh, masop̃alo ni Sin.) 15Go Moses e pasa paki Yehovah, 16po naga, Yehovah, Sup̃e ni naata ni naatam̃oli maga mamau puti, ega vasa dawona ki naatam̃oli sikai naga ega tap̃au nasaisaiana, 17Waina ega tave pano kivea ki da, go waina ega liliu umai kivea ki da, go waina ega maraki ra dave pano, go waina ega viragi ra liliu umai; naga nasaisaiana ki Yehovah euga ta dakiusi shiip waina tea leo parati ki da e dika. 18Go Yehovah e noa ki Moses, e naga, P̃a viragi Yoshua natu ni Nun, naatam̃oli sikai waina naatana sikai e doko asa, go p̃a toropusi nam̃elearum̃a asa; 19Go p̃a lawo ki nia narae ni Eleasar tea viri, go narae ni nasaisaiana mamau; go p̃a tua e natip̃akiana sikai namatada. 20Go p̃a kovagoro e ki nadodomadaganiana anigo seara kakana, naga nasaisaiana mamau ni Israel natuna maga euga rogo parati ki nia. 21Go ega lawodu narae ni Eleasar tea viri, waina ega wo maneana pusuusu pae navasap̃otaeana ni Urim narae ni Yehovah: pae navasaana aneana euga tave pano, go pae navasaana aneana euga moro liliu umai, nara ma Israel natuna maga euga mamau, nasaisaiana mamau puti. 22Go Moses e mari dakiusi waina Yehovah e dip̃aki nia asa: go e piragi Yoshua, po lawo ki nia narae ni Eleasar tea viri, go narae ni nasaisaiana mamau: 23Go e doropusi nam̃elearuna maga asa, po dua e natip̃akiana sikai, dakiusi waina Yehovah e noa e pae nam̃elearu ni Moses.
Currently Selected:
NUMBERS 27: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
