NUMBERS 12
12
1Go Miriam go Aaron ero pasa dip̃a Moses nalakena nagoroi ni Kush waina Moses e dawiri a: nalakena e dawiri nagoroi sikai ni Kush. 2Go ero naga, Yehovah e pasa paki Moses e sikina, kite? E da moro pasa paki gami mau, kite? 3Go Yehovah e dogo e. Go naatam̃oli wanogoe Moses e pei tea matemate liu naatam̃oli maga mamau puti waina eu doko narae ni maramana. 4Go Yehovah e pasa paki Moses, go paki Aaron, go paki Miriam, po naga, Nimu dolu kuga mamau puti dave umai paki tap̃aup̃au ni nasaisaiana. 5Go eu dave umai. Go Yehovah e siwo umai, e doko tea lawodu sikai ni napopouru, po lawodu namata ni Tap̃aup̃au, po soso Aaron go Miriam: go ero dave umai. 6Go e naga, Koroga rogo navasaana aginau maga: profeta sikai e pe toko m̃aleoputo kakamu, kinau Yehovah a pe wo dum̃agu mari au a pe vei tea ataeana paki nia doko navunusiana sikai, a pe wo pasa pusum̃aki paki nia doko nap̃erea sikai. 7Tea suasua aginau e da dapala nogoe mau; nae e pei lomau doko nasum̃a aginau mamau: 8Aga wo pasa pusum̃aki paki nia nagole paki nagole dokolina, go ega ta pae navasamaluluakiana maga mau; go ega wo leo punusi natakiusiana ni Yehovah: nalakena tea wanogoe ekasana koro da mataku mau naga koroga vasa dip̃a tea suasua aginau, dip̃a Moses? 9Go namaetoana ki Yehovah e pavaga dip̃a ra; go e m̃elu pano. 10Go napopouru e m̃elu dua ki elagi ni Tap̃aup̃au po pano; go p̃a leo, Miriam e po pei lepero, e dare dapala sno: go Aaron e leo punusi Miriam, go p̃a leo, e po pei lepero. 11Go Aaron e noa ki Moses, e naga, Nawota aginau O, a pavara ni ko, p̃a ta doropusi namarinaleosaana ega toko gami mau, nalakena au mari manumatavusa, go nalakena au mari naleo sa. 12A pavara ni ko, ega ta dakiusi tea mate sikai mau, waina nap̃okasina e sirinopu ragi waina e pakilina m̃elu nap̃ele ni p̃ilana. 13Go Moses e pioso paki Yehovah, doko do naga, P̃a mari pauri a, Sup̃e O, a pavara ni ko asa. 14Go Yehovah e noa ki Moses, e naga, Tamana e pe taniu naraena, e pe ta maliere naaleatia larua, kite? Ega vei tea kokoro‐p̃onotiana etaku ni tokora ni nam̃enakiana naaleatia ega larua, go edaku ki tea wanogoe ega moro pei tea viragiana umai. 15Go Miriam e pei tea kokoro‐p̃onotiana etaku ni tokora ni nam̃enakiana naaleatia larua: go narei eu da moro paki nasurataana mau pa pa Miriam e moro pei tea viragiana umai. 16Go edaku ki tea wanogoe narei eu m̃elu dua ki Haseroth po moro surata nasurataana adeada pano, po m̃enaki doko masop̃alo ni Paran.
Currently Selected:
NUMBERS 12: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
