NUMBERS 11
11
1Go narei eu dapala tea taururu maga, doko do pasa ki tea sa nadaliga ni Yehovah: go ragi waina Yehovah e dogo e, namaetoana aneana e pavaga; go nakapu ki Yehovah e soro m̃aleoputo kakada, po gani dinomi namatap̃ago edaku ni tokora ni nam̃enakiana. 2Go narei eu pioso paki Moses; go Moses e pavara ni Yehovah, go nakapu wanogoe e mate. 3Go nagisa ni tokora wanogoe e pei tea sosoana ki Taberah: nalakena nakapu ki Yehovah e soro m̃aleoputo kakada tokora wanogoe.
4Go taua ni naatam̃oli sarisari waina eu mamau doko, eu dowo paki namasauana sa: go Israel natuna maga nara eu moro dagi, po naga, Sei ega tua gami navinaga naga auga kanikani? 5Au midoaki naika waina au gani m̃oli ki nia Ityipt sala vea; kukumpa maga, go melon maga, go liik maga, go anian maga, go kalik: 6Ma sala waia naatagami e lologara; ta navatuna e da doko mau: au da punusi te navinaga mau, ma manna waia e sikina. 7Go manna wanogoe e dakiusi napati ni koriander, natakiusiana kakana e dakiusi bedelium. 8Narei eu surata usuraki, po pila daua ki nia, po mani a, kite duki p̃oroworosi a, po peni a pot maga, po mari keke maga asa: go nakatidogoana kakana e dakiusi nakatidogoana ni naroro vau. 9Go ragi waina nasovaki a lawolawo tokora ni nam̃enakiana p̃ogi, manna wanogoe e dowo asa. 10Go Moses e dogo narei eu dagi usuraki naworada maga, sara naata sikasikai doko namata ni tap̃aup̃au adeada: go namaetoana ki Yehovah e pavaga p̃arua; go Moses nae ma e maeto. 11Go Moses e noa ki Yehovah, e naga, Ekasana ku mari tea suasua anigo e dogokitesa? Go ekasana a da pap̃ai nasaup̃iaana namatam̃a mau, naga ku doropusi natapetapeana ki narei mamau puti waia e doko au? 12Kinau a dumau ki narei mamau waia, kite? Kinau a pisola ki da, naga ku noa kinau, ku naga, P̃a tapetape pakale ra narum̃am̃a, dapala waina nagoroi vakale sikai e pakale piakiki vusavusa sikai, po pano paki navanua waina ku pivisa paki tamada maga asa naga p̃a tua ra asa, kite? 13Aga veani navinaga ega vae esava naga aga tua narei mamau waia asa? Nalakena eu do dagi po do noa kinau, eu naga, P̃a tua gami navinaga naga auga kanikani. 14Kinau a marisap̃o masikinau dapetape natapetapeana ni taua warua ni narei waia, nalakena e madaga liu au. 15Go ku pe mari ega tapala nogoe paki nau, p̃a mari punue au, a pavara ni ko asa, go ega vei te lapa, a pe vap̃ai nasaup̃iaana namatam̃a; go aga ta punusi narogokitesaana aginau mau.
16Go Yehovah e noa ki Moses, e naga, P̃a viragi saisai ki naatam̃oli rualima larua m̃elu tea matua maga ni Israel umai punusi au, tea maga waina ku atae naga eu pei tea matua maga ni narei, go tasiga maga dap̃au ra; go p̃a viragi ra umai paki ekopu ni tap̃aup̃au ni nasaisaiana, naga euga tu tokora wanogoe sikoti ko. 17Go aga wo siwo paloti punusi ko, po pasa pusum̃aki paki‐go tokora wanogoe: go aga wo dape kovai naatana waina e doko ako, go aga wo doropusi a ega toko ara; go kuga wo mamau puti dapetape natapetapeana ni narei, ega ta pei nigo sikim̃a mau. 18Go p̃a noa ki narei, p̃a naga, Kuga tum̃amu tapugoro mu raki matamai, go kuga wo gani navinaga: nalakena ku dagi nadaliga ni Yehovah, doko do naga, Sei ega tua gami navinaga naga auga kanikani, nalakena sala vea au doko p̃ia doko Ityipt? Nalakena tea wanogoe Yehovah ega wo dua mu navinaga, go kuga wo ganikani. 19Kuga wo da ganikani naaleatia ega sikai maau mau, kite naaleatia ega rua mau, kite naaleatia ega lima mau, kite naaleatia ega rualima mau, kite naaleatia ega rualima dua mau; 20Ma kuga wo ganikani atelagi sikai ega mamau, pa pa ega wo m̃elu dua ki nap̃araerae ni nagisumu, po pei tea mamaragokiana paki mu: nalakena ku dip̃adoa Yehovah waina e doko m̃aleoputo kakamu doko, go ku dagi naraena, doko do naga, Ekasana au m̃elu dua ki Ityipt umai? 21Go Moses e naga, Narei waina kinau a doko m̃aleoputo kakada, eu pei naatam̃oli manu p̃onotia latesa waina eu surata; go nigo ku naga, Aga wo dua ra navinaga, naga euga kanikani atelagi sikai ega mamau. 22Navata maga ni shiip go ni naninani, go navata maga ni kau euga madeada pei tea maripunueana, naga euga kanikani po dawosa, kite? Kite naika maga mamau puti ni natasi euga madeada pei tea viragi‐saisai‐kiana naga euga kanikani po dawosa, kite?
23Go Yehovah e noa ki Moses, e naga, Naru ni Yehovah e po puru, kite? P̃a wo punusi navasaana aginau, e pe wo pei lomau, kite e pe wo dika. 24Go Moses e dave pano, po noakisai narei ki navasaana maga ki Yehovah: go e piragi saisai ki naatam̃oli rualima larua ni tea matua maga ni narei, po lawo ki da eu du dalivirigoro Tap̃aup̃au. 25Go Yehovah e siwo umai e doko napopouru, po pasa paki nia, po dape kovai naatana waina e doko asa, po doropusi a e doko tea matua rualima larua wanogoe: go e pakilina, ragi waina naatana e lawo ara, naga eu peanoasai, ma eu paka sikai maau mari a, po da moro mari a mau. 26Ma naatam̃oli dua ero ko doko tokora ni nam̃enakiana doko, sikai nagisana Eldad, go kerua nagisana Medad: go naatana e lawo ara; go ero pei tea maga seara kakada waina nagisada eu pei tea midiriana, ma ero da m̃elu dua ki tokora ni nam̃enakiana paki Tap̃aup̃au pano mau: go ero peanoasai tokora ni nam̃enakiana. 27Go natureai sikai e sava pano po noa ki Moses asa, e naga, Eldad go Medad ero do peanoasai tokora ni nam̃enakiana. 28Go Yoshua natu ni Nun, tea suasua ki Moses, tea matadoaana aneana maga sikai kakada, e pasadara, po naga, Nawota aginau, nawota Moses, p̃a tip̃agoro ra. 29Go Moses e noa ki nia, e naga, Nigo ku dotowo kasua nalakena kinau, kite? Narei mamau puti ki Yehovah eu pe vei profeta maga, naga Yehovah e pe toropusi naatana e pe toko ara, e pe wia! 30Go Moses e liliu paki tokora ni nam̃enakiana, nara ma tea matua maga ni Israel eu mamau. 31Go nalagi sikai e m̃elu Yehovah po pano, po piragi kuel maga pae natasi umai, go eu dowo m̃aladigi ki tokora ni nam̃enakiana, nasurataana e alagoro pei naaleatia sikai taleva sikai kakana, go nasurataana e alagoro pei naaleatia sikai taleva kerua kakana, dalivirigoro tokora ni nam̃enakiana, go eu pakanoe navanua navakipuaana kakada narae ni natano e alagoro pei kubit dua. 32Go narei eu da maturu mau naaleatia mamau wanogoe, go p̃ogi ki nia mamau, go matamai ki nia mamau, ma eu doko do pila daua ki kuel maga: go tea waina e pila daua ki tea kiki, e pila daua ki omer rualima sikai: go eu dum̃ada madeada peravera ki da usuraki tokora ni nam̃enakiana daliviri. 33Go ragi waina nap̃okasi kakada e ko doko namawota ni napatida, e ko da pei tea katip̃oraeana mau, namaetoana ki Yehovah e pavaga dip̃a narei, go Yehovah e atugi narei ki naatugiana warua liu sikai. 34Go eu soso nagisa ni tokora wanogoe ki Kibroth‐hattaavah: nalakena tokora wanogoe eu ova ki narei maga waina eu mari namasauana sa. 35Narei eu m̃elu dua ki Kibroth‐hattaavah po surata paki Haseroth pano; go eu m̃enaki doko Haseroth doko.
Currently Selected:
NUMBERS 11: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
